8 сәуірде футболдан Қазақстан кубогінің жаңа маусымы басталады. Кубок бәсекесінің форматы соңғы жылдары мазмұндық тұрғыдан өзгеріп, жаңа сипатқа ие болуда.
Биыл да Кәсіби клубтар арасында жарыстар өткізу дирекциясы бірқатар жаңашылдық енгізді. Атап айтқанда, енді командалар алдын ала іріктеу кезеңін өткізбейді. Барлық лига (Премьер-лига, Бірінші және Екінші лига) командалары жеребе арқылы жұптасып, турнирді бірден 1/16 финал кезеңінен бастайды.
Сондай-ақ биылғы маусымның басты ерекшеліктерінің бірі – отандық әуесқой клубтарға да кубок бәсекесіне қатысуға мүмкіндік берілуі. Яғни, бұрын тек кәсіби клубтардың бәсекесі ретінде қабылданған ел кубогы бүгінде әуесқой командаларды да қамтитын ашық турнирге айналып отыр.
Мәселен, биылғы кубок жолындағы жарысқа Премьер-лига мен Бірінші лига командаларынан бөлек, Екінші лигаға жаңадан қосылған Алматы облысының «Қаршыға», Павлодар облысының «Аңсат» клубтары, сондай-ақ әуесқой командалар – Jelaev Nan мен БКС қатысады.
Кубок жеребесіне сәйкес, аталған командалар алғашқы кезеңде-ақ еліміздің іргелі клубтарымен кездесуге мүмкіндік алды. Мәселен, БКС командасы алғашқы ойынын жеті дүркін ел чемпионы, үш мәрте Қазақстан кубогінің жеңімпазы «Астанамен» өткізсе, «Аңсат» былтырғы кубок иегері «Тобылмен», Jelaev Nan Премьер-лига дебютанты «Алтаймен», ал «Қаршыға» тәжірибелі «Жетісумен» өз алаңында ойнайды. Бұл – жергілікті жанкүйерлер үшін де, командалардың өздері үшін де айрықша оқиға болмақ.
БКС – еліміздегі ең үздік әуесқой командалардың бірі. Себебі алматылық ұжым былтырғы әуесқой лига чемпионатында топ жарған. Команданы жергілікті кәсіпкер Бақтияр Әубәкіров қолдайды. Сонымен қатар БКС әр жылдары әртүрлі әуесқой лигалардың чемпион атанған тәжірибелі ұжым саналады.
Jelaev Nan – әуесқой лигадағы танымал команда. Олар футбол, футзал, шағын футбол жарыстарына қатысып тұрады. Әуесқойлар арасындағы 2024 жылғы Қазақстан чемпиондары. Команданы жергілікті «Желаев Нан» қаржыландырады. Ойыншыларының арасында мұғалім, дәрігер, студенттер бар.
Жалпы, әуесқой командалардың кубок бәсекесіне қатысуы елдегі бұқаралық футболды дамытуға және спортты халық арасында кеңінен насихаттауға серпін береді. Себебі мұндай мүмкіндік болашақта басқа да әуесқой ұжымдарға берілуі мүмкін. Екіншіден, бұл – өңір футболын жандандырудың тиімді тетігі.
Қазақстан кубогына әуесқой командаларды тарту – отандық футболды дамытудың стратегиялық шешімдерінің бірі. Бұл модель бұқаралық спортты кеңейтіп қана қоймай, футбол пирамидасының төменгі қабатын нығайтуға мүмкіндік береді. Ал бұл өз кезегінде ұлттық футболдың жалпы сапасына тікелей әсер етеді.
Қазақстан Кубогіне әу баста 32 команда қатысу жоспарланған. Дегенмен SDFamily клубы жабылғандықтан «Ертіс» автоматты түрде келесі кезеңге өтті.
Қазақстан кубогының қазіргі жеңімпазы – Қостанайдың «Тобыл» клубы.
1/16 финалда кездесетіндер:
«Оңтүстік Академиясы» – «Ордабасы»
• «Батыр» – «Каспий»
• «Жас Қыран» – «Атырау»
• «Каршыға» – «Жетісу»
• «Арыс» – «Ақтөбе»
• «Тұран» – «Елімай»
• Jelaev Nan – «Алтай»
• «Тараз» – «Ұлытау»
• «Талас» – «Қайсар»
• «ЖайыҚ» – «Қайрат»
• BKS – «Астана»
• «Аңсат» – «Тобыл»
• «Шахтёр» – «Оқжетпес»
• «Хромтау» – «Жеңіс»
• «Хан-Тәңірі» – «Қызылжар».
