3-4 сәуірде футболдан Премьер-лиганың 4-тур ойындары өтті. Алматыда өткен «Ел классикода» «Қайрат» елордадан келген «Астананы» ірі есеппен тізе бүктіріп, чемпионатта қайта көш бастады. Ал семейлік «Елімай» қостанайлық «Тобылды» жеңіп, екінші орынға көтерілді. Өз кезегінде «Тобыл» жалқы ұпаймен соңғы орында қалды.
«Ертіс» (Павлодар) – «Алтай» (Өскемен) – 1:1
Голдар: Шимамура, 36 (1:0)
Қызыл қағаз: Шмидт, 91 («Алтай»)
Павлодарда басталған турдың алғашқы матчында «Ертіс» чемпионаттағы маңызды әрі алғашқы жеңісіне қол жеткізді. Бірінші таймда алаң иелері есеп ашып, жанкүйерлерін қуантты. Гол авторы – Юши Шимамура. Екінші таймда да «Ертістің» есепті еселеуге тамаша мүмкіндігі болды, алайда Вячеслав Швырев пенальтиден мүлт кетті. Бұған дейін павлодарлықтар қатарынан үш мәрте тең ойнаған еді. «Алтай» екінші рет жеңілістің кермек дәмін татты.
«Елімай» (Семей) – «Тобыл» (Қостанай) – 1:0
Голдар: Мұртазаев, 75 (1:0)
Өткен турда «Ақтөбені» сырт алаңда ірі есеппен жеңген «Елімай» қатарынан екінші турда үш ұпай олжалады. Бұл жолы семейліктер Астанада «Тобылды» тізе бүктірді. Ойынның тағдырын 75-минуттағы жалғыз пенальти шешті. Қостанайлықтардың қақпасына белгіленген 11 метрлік айып добын Роман Мұртазаев сәтті орындап, командасына маңызды жеңіс сыйлады. Төрт турдың үшеуінде жеңіліп, бір мәрте тең ойнаған «Тобыл» турнир кестесінде соңғы орында тұр.
«Қайсар» (Қызылорда) – «Қызылжар» (Петропавл) – 0:0
Қызылорданың «Қайсары» бұл турда да тең ойнады. Өткен турда «Ордабасыдан» жеңілгенімен, алдындағы екі турда қарсыластарымен ұпай бөліскен еді. Бұл жолы да «Қызылжармен» тең түсті. Сондай-ақ бұл матч турда гол соғылмаған жалғыз ойын болды. «Қызылжар» қатарынан екінші ойында жеңіске жете алмай келеді.
«Ордабасы» (Шымкент) – «Атырау» (Атырау) – 1:1
Голдар: Астанов, 9+1 (1:0); Дорофеев, 20 (1:1)
Қызыл қағаздар: Сұлтаниязов, 90+14; Жұматов, 90+13
«Атырау» футболшылары Шымкентте турдың сенсациясын жасап, чемпионаттағы алғашқы жеңісіне жетуге шақ тұрды. Кездесудің 20-минутында Константин Дорофеев қонақтарды есепте алға шығарса, екінші таймның 82-минутында дубль авторы атанып, көрсеткішті 2:0-ге жеткізді. Алайда төреші бейнеқайталаудан кейін Дорофеевтің екінші голын есептемеді. Осыдан кейін алаң иелері тең ойынға қол жеткізуге тырысып, қосымша минутта пенальти орындауға мүмкіндік алды. Оны Эльхан Астанов мүлтіксіз орындап, «Ордабасыны» жеңілістен құтқарып қалды.
«Ұлытау» (Жезқазған) – «Ақтөбе» (Ақтөбе) – 1:1
Голдар: Вачиберадзе, 71 (1:0); Соса, 81 (1:1)
Чемпионаттың алғашқы үш турынан кейін бапкер ауыстырған «Ақтөбе» 4-турда да жеңіске жете алмады. Штефан Таркович шәкірттері Жезқазғанға қонаққа барып, «Ұлытаумен» тең ойнады. Екінші таймның 71-минутында жезқазғандық команданың ойыншысы Бека Вачиберадзе есеп ашса, 81-минутта «Ақтөбе» сапынан Даниэль Соса таразы басын теңестірді. Осылайша командалар 1:1 есебіне қанағат білдірді.
«Каспий» (Ақтау) «Жетісу» (Талдықорған) – – 0:1
Голдар: Амарал, 44 (автогол – 0:1)
«Жетісу» Қызылордаға қонаққа барды. Ақтаудың «Каспий» клубы Қайрат Нұрдәулетов шәкірттерін «Қайсар-Арена» стадионында қабылдады. Матч «Жетісу» клубының» пайдасына шешілді. Олар чемпионаттағы алғашқы жеңісіне қол жеткізді. Бұл ретте Пірәлі Әлиев шәкірттері талдықорғандықтарға үш ұпай олжалауға өздері мүмкіндік беріп қойды. Өйткені 44-минутта «Каспий» футболшысы Андре Амарал абайсызда өз қақпасына гол соғып, «Жетісуға» жеңіс сыйлады. Бұл кездесудегі жалғыз гол болды. Осылайша Қайрат Нұрдәулетов баптайтын «Жетісу» алғашқы үш ұпайын алды.
«Қайрат» (Алматы) – «Астана» (Астана) – 4:0
Голдар: Жоржиньо, 10 (1:0); Сәтпаев, 22 (2:0); Жоржиньо, 41 (3:0); Мартынович, 46 (4:0)
Турдың орталық әрі ең нәтижелі ойыны Алматыда өтті. Жанкүйерлер «Ел классико» деп аталған «Қайрат» пен «Астана» арасындағы кездесуде төрт голдың куәсі болды. Жалпы екі команда арасындағы ірі есеп сирек тіркеледі, бірақ бұл жолы алаң иелері бірінші таймда-ақ елордалықтардың қақпасына төрт гол соғып, ойынның тағдырын ерте шешті.
Осы жеңістен кейін алматылықтар турнир кестесінде 10 ұпаймен қайтадан көш бастады, ал «Астана» 7 ұпаймен 5-орынға түсті.
«Жеңіс» (Астана) – «Оқжетпес» (Көкшетау) – 1:1
Голдар: Тевзадзе, 30 (1:0); Ассунсау, 90+4 (1:1)
Елорданың «Жеңісі» өз алаңында «Оқжетпесті» қабылдап, тағы да тең ойнады. Бұл астаналықтардың чемпионаттағы үшінші тең нәтижесі. Жалпы екі команда төрт жылдан бері бір-бірін жеңе алмай келеді. Соңғы рет 2022 жылы Бірінші лига аясында өткен матчта «Оқжетпес» сырт алаңда «Жеңісті» 3:0 есебімен тізе бүктірген, одан кейінгі төрт матч тең аяқталған.
Премьер-лиганың 5-тур ойындары 11-12 сәуірге жоспарланған.