Футболдан 2026 жылғы Бірінші лига ойындарының шымылдығы түрілді. 2-3 сәуір күндері біріншіліктің алғашқы тур ойындары өтіп, бірнеше тосын нәтижелер тіркелді.
Матч нәтижелері:
«Арыс» – «Жайық» – 0:1
«Хан-Тәңірі» – «Каспий-Ж» – 2:2
«Тұран» – «Оңтүстік Академиясы» – 1:2
«Тобыл-Ж» – «Елімай-Ж» – 1:1
«Қайрат-Жастар» – «Шахтер» – 0:0
«Тараз» – «Батыр» – 3:0
«Астана-Ж» – «Ақтөбе-Ж» – 2:2
2 сәуір
«Арыс» – «Жайық» – 0:1
Былтыр Екінші лиганың «Оңтүстік-батыс» конференциясында жеңімпаз атанып, Бірінші лигаға жолдама алған Оралдың «Жайық» клубы чемпионатты сәтті бастады. Оңтүстікке қонаққа барған Батыс Қазақстан облысының клубы биылдан бастап жеке инвестордың қолына өткен жергілікті «Арыс» клубынан басым түсті – 0:1. Кездесудің тағдырын Темірлан Үмбетовтің 29-минутта айып тепкісінен соққан голы шешіп кетті.
«Хан-Тәңірі» – «Каспий-Ж» – 2:2
Лигадағы тағы бір жеке клуб – «Хан-Тәңірі» былтыр чемпионатты өз алаңында жеңіспен бастаған еді. Алайда биыл Ақтаудан келген «Каспий-Ж» жастарымен тең ойнады. Бірінші тайм аяқталар тұста қонақтар сапынан Нұрмұхаммед Ислам мергендік танытып, командасын есепте алға шығарса, екінші тайм басталған бетте командасының екінші голын соқты.
Дегенмен алаң иелері тез ес жинап, алдымен есепті қысқартса, кейіннен таразы басын теңестіріп кетті. 54-минутта Рустам Эмиров көзге түссе, 91-минутта Дархан Меделхан командасын жеңілістен құтқарып қалды.
«Тұран» – «Оңтүстік» – 1:2
Турдың тосын нәтижесі Түркістанда тіркелді. «Тұран» мен «Оңтүстік Академиясы» арасындағы оңтүстік дербиінде алаң иелері айқын фаворит саналған. Команда құрамында Думан Нәрзілдаев бастаған ҚПЛ-да тәжірибесі бар футболшылар өте көп. Соған қарамастан Азат Нұрғалиев жаттықтыратын «Оңтүстік» ойыншылары фавориттерге биылғы маусымда оңайлықпен ұпай бермейтінін аңғартты.
Кездесудің 4-минутында қонақтар сапынан Әділбек Жәнібекұлы жылдам гол соғып, командасын алға шығарды. Бірақ қонақтардың қуанышы ұзаққа созылмады. Небәрі 7-минутта «Тұран» сапынан Қуаныш Дүйсенбекұлы таразы басын теңестіріп кетті. Дегенмен шабуылда сәтті ойнаған қонақтар 80-минутта жеңіс голын соғып, чемпионаттағы алғашқы үш ұпайын олжалады. Гол авторы – Әлібек Халдар.
«Тобыл-Ж» – «Елімай-Ж» – 1:1
Былтыр Екінші лигада өнер көрсеткен қос клуб биылғы Бірінші лиганың алғашқы турында кездесті. Бір қызығы, былтыр да екі ұжым Екінші лиганың бірінші турында қарсылас атанған. Сол кезде алаң иелері 2:1 есебімен жеңіске жеткен. Ал биылғы маусымды командалар тең нәтижемен бастап отыр.
«Қайрат-Жастар» – «Шахтер» – 0:0
Алғашқы турдың екінші күніне жоспарланған Алматыдағы «Қайрат-Жастар» пен «Шахтер» арасындағы матч тең есеппен аяқталды. Бірінші лиганың былтырғы маусымында соңғы турларда сәтсіздікке ұшырап, жоғары лига жолдамасынан қағылған қарағандылық ұжым биыл қалай да Премьер-лигаға жолдама алуды көздейтіні анық.
«Тараз» – «Батыр» – 3:0
Биыл Премьер-лигадан үмітті клубтардың бірі – «Тараз». Құрамын жергілікті жетекші ойыншылармен күшейткен жамбылдық ұжым маусымды ірі жеңіспен бастады. Өз алаңында биылдан бастап атауын өзгерткен «Батыр» (бұрынғы – «Екібастұз») клубын қабылдап, қонақтардың қақпасына жауапсыз үш гол соқты. Осы жеңісінің нәтижесінде «Тараз» бірінші турдан кейін турнир кестесінде көш бастады.
«Астана-Ж» – «Ақтөбе-Ж» – 2:2
Алғашқы турдың соңғы матчы Астанада өтті. Былтырғы Екінші лиганың «Солтүстік-шығыс» конференциясының жеңімпазы «Астана-Ж» клубы Бірінші лиганың былтырғы маусымында соңғы орындардың бірін иеленген «Ақтөбе-Ж» командасын қабылдады. Голдарға бай өткен матчта командалар 2:2 есебімен тең тарқасты. Алаң иелері екі рет есепте алға шықса да, қонақтар екі ретінде де есепті теңестіріп, Астанадан бір ұпай олжалап қайтты. Қорытынды есеп – 2:2.
Келесі тур ойындары 16-17 сәуірге жоспарланған.
