Қазақстан футбол федерациясы (ҚФФ) Қазақстанның Бірінші, Екінші және Әйелдер лигаларының матчтарын көрсететін компаниямен ынтымақтастықты тоқтататынын хабарлайды.
2026 жылғы наурызда ҚФФ телевизиялық өндіріс қызметтерін көрсету бойынша ашық конкурс өткізді. Дайындық барысында негізгі продакшн саласының өкілдері қатысқан жұмыс кеңестері ұйымдастырылып, трансляция сапасына қойылатын техникалық талаптарды анықтайтын сипаттама әзірленіп, бекітілді.
Конкурс қорытындысы бойынша Қазақстанның Бірінші, Екінші және Әйелдер лигасының матчтарын трансляциялау құқығына ие компания анықталды.
Алайда, Бірінші және Екінші лиганың бірінші тур матчтарын түсіру сапасын тексеру кезінде көрсетілген қызметтердің нақты сапасы техникалық талаптарға сәйкес еместігі анықталды.
Осы сәйкессіздіктерге байланысты компаниямен әріптестікті тоқтату туралы шешім қабылданды.
Қазіргі уақытта ҚФФ қолданыстағы нормативтік рәсімдерге сәйкес жаңа конкурс ұйымдастыру жұмыстарын бастады. Матчтарды теледидар арқылы көрсету тәртібі туралы қосымша ақпарат кейінірек жарияланады.
