Көкшетаудың «Оқжетпес» командасының қорғаушысы Борис Лотоцкий үшін бұл маусым Украинадан тыс алғашқы тәжірибе болып отыр. Ол Қазақстанға тез бейімделіп, алғашқы үш турда командасына 7 ұпай жинауға көмектесті. KFF League сайтына берген сұхбатында футболшы жаңа локацияға бейімделуі, ұжымдағы атмосфера және маусымға клубтың қойған мақсаты туралы айтып берді.
– Алғаш рет Украинадан тыс жерде өнер көрсетіп жатырсың. Неліктен таңдау «Оқжетпеске» түсті?
– «Окжетпеске» ауысу – менің мансабымдағы сөзсіз алға жасалған қадам, әрі дәл осы жерде жүргеніме өте қуаныштымын. Ең алдымен, бұл даму мен өзімді жетілдіруге деген ұмтылыспен байланысты. Сонымен қатар, мұнда Украинаға қарағанда әлдеқайда тыныш.
– Қазақстанға көшер алдында қандай үміт болды?
– Қазақстанға көшу жүзеге асатынын білгенде, бір жағынан қуандым, бір жағынан толқыдым. Бұл – менің шетелдегі алғашқы тәжірибем, оның үстіне Қазақстан сияқты елде: басқа мәдениет, адамдар, дәстүр. Бірақ сонымен бірге Қазақстан мен үшін әрқашан жағымды әсерлермен байланысты болды.
– Жаңа ел мен командаға бейімделу қалай өтіп жатыр?
– Бейімделу өте жақсы өтуде. Маған командамен, ұжыммен және клубтағы әрбір адаммен жолым болды. Бәрі туғанындай қабылдады.
– Команда үш матчта 7 ұпай жинады. Маусымның осылай жағымды басталуын қалай бағалайсың?
– Бұл – тамаша бастама. Менің білуімше, «Окжетпес» бұрын алғашқы үш турда ешқашан 7 ұпай жинамаған. Максимум мақсат деуге болады, соған жақындап қалдық.
– «Елімаймен» тең ойыннан кейін команда қатарынан екі рет жеңіске жетті. Қалай ойлайсың, бұған не әсер етті?
– Біз бастапқыдан-ақ жақсы бастауға дайындалдық. Қарсыластар да осал болған жоқ, бірақ жігер мен әр ойында жеңіске деген ұмтылыстың арқасында нәтижеге жеттік.
– «Ұлытауды» қосымша уақытта жеңгенде команда қандай сезімде болды?
– Бұл – керемет эмоциялар. Бізге Ринат Мұратұлы (Алеюетов) Түркиядағы жиын кезінде-ақ соңғы минуттарда эмоциямен келетін жеңістер қажеттігін айтқан.Осындай сәттерде команда жай ғана футболшылар ұжымы емес, одан да үлкен күшке айналады. Ешкім бей-жай қарамай, нәтиже үшін барын салады. Бұл керемет сезім.
– Жаттықтырушы алаңда саған қандай рөл береді?
– Менің позициям – орталық сол жақ қорғаушы. Негізгі міндетім – қарсыластың шабуылын тоқтатып, өзіміздің шабуылдарды бастау. Сондай-ақ бапкерлер құрамына ерекше алғыс айтқым келеді: мұндағы жұмыс деңгейі мен ойыншылармен байланыс өте жоғары.
– Осы маусымда «Окжетпес» жоғары орындар үшін күресуге қаншалықты дайын?
– Біз әр ойынға тек жеңіс мақсатымен шығамыз. Жоғарыда айтқанымдай, біздің командада өз ісіне салғырт қарап жүрген ешкім жоқ, сондықтан жақсы нәтижеге жету үшін бар күшімізді саламыз.
– Осындай жақсы бастамадан кейін жанкүйерлерге не айтқың келеді?
– Жанкүйерлерге Қазақстанда мені жылы қабылдағаны, қолдауы мен мейірімі үшін үлкен рахмет айтқым келеді. Сондай-ақ трибунадағы атмосфера мен керемет энергия үшін алғыс! Сіздер – кереметсіздер!
