Үш күнге жалғасқан футболдан Қазақстан Премьер-лигасының 3-тур ойындары мәресіне жетті. Турдың орталық кездесуі «Ақтөбе» мен «Елімай» арасындағы матчта қонақтар чемпионаттағы алғашқы жеңісіне қол жеткізсе, «Астана» өз алаңында «Тобылды» тізе бүктірді. Екі турдан кейін чемпионатта көш бастаған «Қайрат» Алматыда «Жетісумен» ұпай бөлісуге мәжбүр болды.
«Қызылжар» (Петропавл) – «Ертіс» (Павлодар) – 2:2
Голдар: Мульдинов, 55 (1:0), Бугре, 70 (2:1); Мбодж, 66 (1:1), Тұрлыбек, 87 (2:2)
Үшінші тур ойындары Петропавлдағы «Қызылжар» мен «Ертіс» арасындағы тартысқа толы матчпен басталды. Бұл кездесуде жанкүйерлер алғашқы таймда гол көре алмағанмен, екінші таймда төрт бірдей голды куәсі болды. Алаң иелері екі рет есепте алға шыққанымен, жеңісті ұстап қала алмады. Есесіне, «Ертіс» футболшылары әр голға жауап қайтарып, матч соңына дейін таразы басын теңестіріп кетті – 2:2.
Бірінші таймда екі клуб сапынан бір-бір ойыншы қызыл қағаз алып, алаңнан қуылды. Алаң иелері сапынан Юрий Прецух, «Ертіс» клубынан Тамерлан Ағыманов өрескел ойынымен көзге түсті.
Осылайша үшінші турдан кейін «Ертіс» қатарынан үшінші ойында тең ойнап, үш ұпаймен турнир кестесінің бел ортасына жайғасты. Ал алаң иелері төрт ұпаймен «Ертістен» жоғары тұр.
«Атырау» (Атырау) – «Жеңіс» (Астана) – 0:0
Атырауда өткен матч та тең есеппен аяқталды. Екі ұжым да гол соғып, чемпионаттағы алғашқы жеңісіне қол жеткізгісі келгенімен, қақпашылар мен қорғаушылар сауатты ойын көрсетті. Қонақтар допты көбірек өз бақылауында ұстап, алаң иелеріне қарағанда көп шабуылдады, бірақ шабуылға нүкте қоятын ойыншы табылмады.
«Атырау» да «Ертіс» сияқты осымен үшінші ойында қарсыластарымен ұпай бөлісуге мәжбүр болды. Ал «Жеңіс» өткен турда «Ордабасыға» есе жіберген соң, бұл турда қоржынына бір ұпай салды.
«Ордабасы» (Шымкент) – «Қайсар» (Қызылорда) – 2:0
Голдар: Митков, 13 (1:0), Антич, 16 (2:0)
Маусым аралық үзілісте «Ордабасы» да, «Қайсар» да құрамын шетелдік легионерлермен күшейтті. Бірақ әзірге шымкенттіктердің ойыншылары команда басшылығының да, жанкүйерлердің де сенімін ақтап, тәуір ойын көрсетіп жатыр деуге болады. Өйткені бұл турда «Ордабасыға» маңызды жеңісті сыйлаған екі голды легионерлер соқты. 13-минутта Димитар Митков мергендік танытса, үш минуттан кейін Никола Антич есепті 2:0-ге жеткізді.
«Қайсар» бұған дейінгі екі нәтижелі тең ойыннан кейін чемпионатта алғаш рет жеңілістің кермек дәмін татты. Елордалық екі ұжыммен тең ойнағанымен («Жеңіс» – 1:1, «Астана» – 1:1), бұл жолы шымкенттіктерге шамалары жетпеді.
«Астана» (Астана) – «Тобыл» (Қостанай) – 2:0
Голдар: Башич, 24 (1:0); Қасым, 66 (пенальти, 2:0)
Елордалық «Астана» үшінші турда өз алаңында биылғы Суперкубок иегері Қостанайдың «Тобылын» қабылдап, 2:0 есебімен басым түсті. Иван Башич 24-минутта есеп ашса, Әлібек Қасым 66-минутта пенальтиден гол соғып, ойынның нүктесін қойды.
Бұл жеңістен кейін «Астана» турнир кестесінде 7 ұпаймен бірінші орынға көтерілді. Алғашқы турда «Ақтөбеден» ірі есеппен жеңілген «Тобыл» өткен турда «Жетісумен» тең түсті. Енді Нұрбол Жұмасқалиев халықаралық ойындарға байланысты үзілісті сәтті пайдаланып, келесі ойындарға сауатты дайындалмаса, «Тобылдың» жағдайы тіптен қиындайды.
«Оқжетпес» (Көкшетау) – «Ұлытау» (Жезқазған) – 2:1
Голдар: Бөрібаев, 18 (1:0); Харада, 49 (1:1); Мұхаметханов, 90+3 (2:1)
Еінші турда өз алаңында «Қызылжарды» жеңген «Ұлытау» бұл турда жеңісті жолын жалғастыра алмады. «Оқжетпес» үшін «Ұлытау» ыңғайлы қарсылас саналады. Кездесудің есебін 18-минутта Нұрғайни Бөрібаев ашып, командасына басымдық сыйлады. Екінші таймда қонақтар белсенді бастап, 49-минутта Хироки Харада таразы басын теңестірді.
Хараданың голынан кейін матч біраз қыза түсті. Екі ұжым да матч соңына дейін жеңіс үшін барын салды. Бірақ матч соңында алаң иелері мергендік танытып, жеңісті жұлып алды. Голдың авторы – Жансұлтан Мұхаметханов. Бұл жеңістен кейін «Оқжетпес» 7 ұпаймен турнир кестесінде үшінші орынға жайғасты.
«Жетісу» (Талдықорған) – «Қайрат» (Алматы) – 0:0
«Қайрат» үшінші турда күтпеген нәтиже тіркеп, «Жетісу» командасымен ұпай бөлісуге мәжбүр болды. Екі ұжым да гол соғып, үш ұпай иелену үшін барын салды. Алматылықтардың гол соғатын бірнеше мүмкіндігі болды, бірақ «Қайрат» футболшылары ұрымтал сәттерді тиімді пайдалана алмады.
Екінші таймның бел ортасына таяғанда Луиш Мата қатарынан екі сары қағаз алып, алаңнан қуылды. «Жетісу» ойыншылары сан басымдығын пайдаланып, таразы басын өздеріне аударуға тырысқанымен, қонақтар гол соғуға мүмкіндік бермеді. Осылайша командалар 0:0 есебіне қанағат білдірді.
«Ақтөбе» (Ақтөбе) – «Елімай» (Семей) – 1:4
Голдар: Шушеначев, 16 (1:0); Плакка, 58 (1:1); Мұртазаев, 79 (1:2); Жақсылықов, 85 (1:3); Мұртазаев, 92 (1:4)
Турдың ең нәтижелі ойыны Түркістанда тіркелді. Өз алаңындағы матчтарын уақытша Түркістанда өткізіп жатқан «Ақтөбе» үшінші турда «Елімайды» қабылдап, 1:4 есебімен жеңіліп қалды. 16-минутта Артур Шушеначевтің голынан кейін алаң иелері бірінші тайм қорытындысы бойынша жеңіске жақын болды.
Дегенмен, екінші таймда семейліктер бұл есеппен келіспейтіндерін айқын аңғартып, екінші 45 минутта «Ақтөбе» қақпасына жауапсыз төрт гол соқты. Алдымен 58-минутта Фессу Плакка пенальтиден есепті теңестірсе, одан кейін 79-минутта Роман Мұртазаев командасының екінші голын соқты. Ал 85-минутта Айбар Жақсылықов мергендігімен көзге түссе, 92-минутта Роман Мұртазаев дубль авторы атанып, ойынның нүктесін қойды – 1:4.
«Алтай» (Өскемен) – «Каспий» (Ақтау) – 0:0
Турдың соңғы ойыны Алматыда өтті. Былтыр Бірінші лигада ойнаған «Алтай» мен «Каспий» алғаш рет Премьер-лигада жолықты. Бұл кездесуде есеп ашылмады. Екі команда да бір ұпайға қанағат білдірді.
Премьер-лига ұлттық құрамалардың ойындарына байланысты екі апталық үзіліске кетті. Енді төртінші тур 4 сәуірде жалғасын табады.
