– Ойва, «Қайрат» сапындағы дебютіңізбен құттықтаймыз. Алғаш рет алаңға шыққанда қандай эмоцияда болдыңыз?
– Рахмет! Бұл мен үшін өте толқытатын әрі мақтанышқа толы сәт болды. Осындай үлкен клубта дебют жасау – әр футболшы үшін керемет мүмкіндік. Матчқа дейін матч кезінде және одан кейін көрсетілген қолдау үшін алғысым шексіз. Мен дәл осындай ойындар үшін келдім және алдағы кездесулерді асыға күтемін.
– Қазақстан чемпионаты туралы алғашқы әсеріңіз қандай? Келмей тұрып ел туралы зерттедіңіз бе?
– Әзірге нақты қорытынды айту қиын, себебі мен тек бір ғана матч өткіздім. Дегенмен, мұндағы футбол Финляндиямен салыстырғанда мүлдем басқа. Техникаға қарағанда физикалық күшті көп қажет ететін сәттер көп. Бірге-бір ойнайтын сәттер жиі кездеседі. Бұл стиль маған ұнайды.
Келмей тұрып Қазақстан туралы аздап мәлімет қарадым. Шынымды айтсам, бұл ел маған аса таныс емес еді. Бірақ көкпар деген спорт түрі туралы бір фин телебағдарламасы арқылы естігенмін.
– Неліктен дәл «Қайратты» таңдадыңыз? Басқа ұсыныстар болды ма?
– Иә, мен клубтың былтырғы еурокубоктардағы табысты ойындарын бақыладым. Еурокубоктарда ойнау – менің үлкен арманым. «Қайрат» – амбициясы жоғары, тұрақты әрі ойыншы ретінде дамуға барлық жағдай жасалған үлкен клуб. Сондықтан осы мүмкіндікті таңдадым.
– Өзіңіздің ойын мәнеріңізді қалай сипаттар едіңіз?
– Мен жылдам, доппен белсенді ойнағанды ұнатамын. Қарсыласты алдап өтуді, бастаманы өз қолыма алуды жақсы көремін. Жылдамдығым бар, соны шабуылда тиімді пайдалануға тырысамын.
– Осы маусымдағы жеке мақсаттарыңыз қандай?
– Менің мақсаттарым команданың мақсаттарымен тығыз байланысты. Шабуылшы ойыншы ретінде гол соғып, нәтижелі пас беру – менің негізгі міндетім. Командаға жеңіс әкелу үшін әр ойында барымды салғым келеді.
– «Қайратпен» бірге қандай басты арманыңыз бар?
– Ең үлкен арманым — Қазақстан чемпионы атану және УЕФА Чемпиондар лигасының жалпы кезеңіне шығу.
– Қазақстанға келмей тұрып біздің ел туралы қандай ойда болдыңыз? Аз уақыттың ішнде қай нәрсе сізді таңғалдырды?
– Мен Қазақстан туралы көп білмедім. Бірақ осында келіп, адамдармен танысқаннан кейін өзімді өте жылы қарсы алғанын сезіндім. Мұндағы адамдар мейірімді, ашық әрі еңбекқор. Кейбір тұрғыда фин халқына ұқсайды. Мұнда өзімді жайлы сезінемін.
– Бала кезіңіздегі кумиріңіз кім болды?
– Бала кезімде менің басты кумирім Лионель Месси болды. Кейін Эден Азар мен Хвича Кварацхелия ойындарын ұнаттым. Олардың барлығы керемет дриблинг шеберлері, мен де солардан үйренуге тырыстым.