16-17 наурыз күндері футболдан Қазақстан Премьер-лигасының 2-турының ойындары өтті. Қатарынан екі турда жеңіске жеткен алматылық «Қайрат» 6 ұпай жинап, турнир кестесінде көш бастады. Сондай-ақ осы турда «Ордабасы» мен «Ұлытау» чемпионаттағы алғашқы жеңістеріне қол жеткізді.
«Ұлытау» (Жезқазған) – «Қызылжар» (Петропавл) – 1:0
Гол: Бугулов, 14 (1:0).
Екінші турдың алғашқы матчында күтпеген нәтиже тіркелді. Жезқазғанға қонаққа барған «Қызылжар» футболшылары алғашқы турдағы қарқынын көрсете алмады. Бірінші турда «Каспийге» қарсы камбэк жасаған петропавлдықтар бұл жолы сүрінді.
Кездесуді қарқынды бастаған алаң иелері 13-минутта есеп ашты. Георгий Бугулов бұрыштамадан асырылған пасты голға айналдырды. Матч соңына дейін «Қызылжар» есепті теңестіруге тырысқанымен, алаң иелері оған мүмкіндік бермеді. Осылайша, «Ұлытау» маусымдағы алғашқы жеңісіне қол жеткізді – 1:0.
«Елімай» (Семей) – «Алтай» (Өскемен) – 1:1
Голдар: Оразов, 10 (1:0). Попов, 90 (1:1).
Жанкүйерлердің қызығушылығын тудырған «Шығыс дербиінде» командалар тең тарқасты. Премьер-лига дебютанты «Алтай» алғашқы турда «Қайратқа» лайықты қарсылық көрсеткен болса, бұл жолы «Елімайдың» да қарқынына төтеп берді.
Кездесудің 10-минутында Рамазан Оразовтың жойқын соққысынан кейін семейліктер алға шықты. Ойын алма-кезек шабуылмен өрбіп, екі командада да есепті өзгертуге мүмкіндік болды. Тек матч соңына қарай «Алтай» көп мүмкіндіктің бірін пайдаланып, таразы басын теңестірді. 92-минутта Сеиф Попов Оразовтың голына ұқсас әдемі гол соғып, командасын жеңілістен құтқарып қалды – 1:1.
Айтпақшы, арада екі минут өткенде «Елімай» пенальти тебуге мүмкіндік алған. Алайда Иван Свиридовтың соққысын қақпашы Абулхаил Әлиакбар қайтарып, матчтың қаһарманы атанды.
«Тобыл» (Қостанай) – «Жетісу» (Талдықорған) – 2:2
Голдар: Милованович, 58 (1:0). Жұмашев, 60 (2:0). Жақыпбаев, 67 (2:1). Мужиков, 97-пенальтиден (2:2).
Қостанайда өткен матч аса тартысты өтіп, 2:2 есебімен аяқталды. Бірінші турдан кейін екі команданың жағдайы бір-біріне ұқсас еді. Алғашқы турда «Тобыл» «Ақтөбеден», «Жетісу» Астанадан 4:1 есебімен жеңілді. Сол матчтан кейін екі командаға жағдайын дұрыстап алу үшін осы турда қалайда жеңіске жету керек еді.
Алғашқы таймда есеп ашылмады. Екінші таймда «Тобыл» сапынан Урош Милованович (58-минут) пен Жасұлан Жұмашев (60) екі минут ішінде қос гол соғып, алаң иелерін алға шығарды. Алайда талдықорғандықтар берілмеді. 67-минутта есеп айырмасын қысқартқан қонақтар 98-минутта пенальтиден таразы басын теңестірді. Гол авторлары – Мәди Жақыпбаев пен Серікжан Мужиков. Осылайша, командалар чемпионаттағы алғашқы ұпайларына қол жеткізді.
«Ертіс» (Павлодар) – «Атырау» (Атырау) – 1:1
Голдар: Нечаев, 5 (1:0). Дорофеев, 21 (1:1).
Павлодарда өткен матчта да тең нәтиже тіркелді. «Ертіс» өз алаңында жеңіске жақын болғанымен, үш ұпайдан айырылып қалды. Ойынның 5-минутында Данила Нечаев бұрыштамадан кейін есеп ашты. Алайда 22-минутта Константин Дорофеев таразы басын теңестірді. Қалған уақытта есеп өзгерген жоқ.
75-минутта «Ертіс» ойыншысы Ибрагим Фард қызыл қағаз алғанымен, «Атырау» сан басымдығын пайдалана алмады. Нәтижесінде екі команда да бір ұпайдан еншіледі.
«Қайрат» (Алматы) – «Ақтөбе» (Ақтөбе) – 1:0
Гол: Сәтпаев, 76 (1:0).
Турдың орталық матчында «Қайрат» минималды есеппен жеңіске жетті. Кездесудің тағдырын жалғыз гол шешті. Бірінші тайм тең дәрежеде өтсе, екінші таймда алаң иелерінің басымдығы байқалды. 76-минутта ойынға тыңнан қосылған жас шабуылшы Дастан Сәтпаев жеңіс голын соқты.
«Ақтөбе» сапында алаңға шыққан танымал футболшы Нани де ойынға өзгеріс енгізе алмады. Осылайша, «Қайрат» қатарынан екінші жеңісіне жетіп, турнир кестесінде көш бастады.
«Қайсар» (Қызылорда) – «Астана» (Астана) – 0:0
Бұл матчта есеп ашылған жоқ. «Қайсар» өз алаңында «Астанаға» гол соғуға мүмкіндік бермеді. Айта кетейік, «Астана» бірінші турда «Жетісу» қақпасына төрт гол соққан болатын. Дегенмен Қызылордада елордалық клуб үшін ойын әрдайым қиын өтеді. Былтыр да бұл командалар тең тарқасқан еді.
«Жеңіс» (Астана) – «Ордабасы» (Шымкент) – 0:2
Голдар: Астанов. С, 69 (0:1). Әмір, 79 (0:2).
«Ордабасы» сырт алаңда «Жеңісті» жеңіп, маусымдағы алғашқы жеңісіне қол жеткізді. Екі гол да екінші таймда соғылды: 49-минутта Сұлтанбек Астанов есеп ашса, 74-минутта Жасұлан Әмір матчтың нүктесін қойды.
Осылайша, шымкенттік клуб 4 ұпай жинап, турнир кестесінде үшінші орынға көтерілді. Ал «Жеңіс» екі турдан кейін 1 ұпаймен төменгі сатыда қалып отыр.
«Каспий» (Ақтау) «Оқжетпес» (Көкшетау) – 1:3
Голдар: Совпель, 25 (0:1). Ндомбази, 71 (1:1). Өміртаев, 80 (1:2). Өміртаев, 82 (1:3).
Турдың соңғы ойыны Қызылордада өтті. Ақтаудың «Каспий» клубы өз алаңындағы матчтарды енді осында өткізеді. Пірәлі Әлиев шәкірттері бұл жолы Көкшетаудың «Оқжетпес» клубын қабылдаған. Қонақтар 71-минутқа дейін Совпельдің голының арқасында алда тұрған. Дегенмен, Ндомбази таразы басын теңестіріп, «Каспийге» үміт сыйлағандай көрінген. Бірақ бұған шабуылшы Оралхан Өміртаев келіспей, екі минуттың ішінде дубль жасады. Сөйтіп, «Оқжетпес» 3:1 есебімен жеңіске жетті.
Қазақстан Премьер-лигасының 3-турының ойындары 20, 21 және 22 наурыз күндері өтеді.