16-17 наурыз күндері Қазақстан Премьер-лигасының екінші тур ойындары өтеді. Бұл турдың орталық ойыны Алматыда ел чемпионы «Қайрат» пен құрамын әлемдік деңгейдегі жұлдыздармен толықтырған «Ақтөбе» арасында болмақ. Сондай-ақ «Қайсар» – «Астана», «Жеңіс» – «Ордабасы» арасындағы матчтар да жанкүйерлер үшін ерекше қызығушылыққа ие.
16 наурыз
«Ұлытау» (Жезқазған) – «Қызылжар» (Петропавл)
Басталуы – 14:00
Өтетін жері: «Металлург» стадионы (Жезқазған)
Бас төреші: Бағдат Абдуллаев (Тараз)
Кездесулер тарихы:
Ойындар саны – 2
«Ұлытаудың» жеңісі – 0
«Қызылжардың» жеңісі – 1
Тең ойындар – 1
Турдың шымылдығы «Ұлытау» мен «Қызылжар» арасындағы ойынмен түріледі. Былтырғы маусымда қос ұжым екі мәрте кездескен. Петропавлдағы алғашқы ойында алаң иелері 2:1 есебімен жеңіске жетсе, Жезқазғандағы матч 1:1 есебімен тең аяқталған.
Өткен турда «Ұлытау» сырт алаңда «Атыраумен» тең түссе (0:0), «Қызылжар» өз алаңында «Каспиден» басым түскен – 2:1. Сондықтан бұл матчта алаң иелері жеңіске жетуге, кем дегенде тең түсуге тырысады. Ал алғашқы турдан кейін үш ұпай олжалап, көшбасшылар қатарына қосылған «Қызылжар» тағы да жеңіске жетіп, жағдайын жақсартып алуға тырысады.
«Елімай» (Семей) – «Алтай» (Өскемен)
Басталуы – 15:00
Өтетін жері: «Астана Арена» стадионы (Астана)
Бас төреші: Денис Тевяшов (Орал)
Кездесулер тарихы:
Матчтар саны – 0
Астанада «Шығыс дербиіне» куә боламыз. Семейдің «Елімай» клубы елордада Премьер-лига дебютанты «Алтайды» қабылдайды. Өскемен және Семей командаларының Премьер-лигада жолықпағанына бірнеше жыл болған. Енді, міне, сол сәт туындап тұр. «Елімай» маусымның алғашқы турында Көкшетауда «Оқжетпеспен» тең түсті. «Алтай» Алматыда «Қайратпен» кездесіп, 0:1 есебімен есе жіберді. Соған қарамастан Вахид Масудов шәкірттерінің ел чемпиондарына лайықты қарсылық көрсеткенін ерекше айта кеткен жөн.
Бұл жолы жанкүйерлер «Шығыс дербиіне» және Вахид Масудов пен Андрей Карповичтің алаңдағы бапкер ретіндегі тартысына куә болады. Әзірге екі команда бұған дейін бір-бірімен кездеспеген.
«Тобыл» (Қостанай) – «Жетісу» (Талдықорған)
Басталуы – 17:00
Өтетін жері: «Тобыл Арена» (Қостанай)
Бас төреші: Саят Қарабаев (Астана)
Кездесулер тарихы:
Матчтар саны – 65
«Тобылдың» жеңісі – 36
«Жетісудың» жеңісі – 14
Тең ойын – 15
Әр жылдары футболдан ұлттық құраманың капитаны болған Нұрбол Жұмасқалиев пен Қайрат Нұрдәулетов енді өзара бапкер ретінде кездеседі. Талдықорғанның «Жетісу» командасы Қостанайға қонаққа барады. Бірінші турдан кейін екі команданың да жағдайы аса мәз емес. Алғашқы турда «Тобыл» «Ақтөбемен» кездесіп, 4:1 есебімен ойсырай жеңілсе, «Жетісу» да сырт алаңда «Астанаға» дәл осындай есеппен жол берді. Сондықтан бұл турда қос команда жанкүйерлерін қуанту үшін барын салатыны анық.
Жалпы, статистикаға келер болсақ, өзара екі ұжым жасыл алаңда 65 рет жолыққан. Басым бөлігінде «Тобыл» жеңіске жеткен. Бұл жолы қалай болар екен?
«Ертіс» (Павлодар) – «Атырау» (Атырау)
Басталуы – 19:00
Өтетін жері: Павлодар орталық стадионы (Павлодар)
Бас төреші: Георгий Чеховский (Астана)
Кездесулер тарихы:
Матчтар саны – 49
«Ертістің» жеңісі – 27
«Атыраудың» жеңісі – 11
Тең ойын – 11
Ел чемпионатының бес дүркін чемпионы «Ертіс» араға жеті жыл салып Премьер-лигаға қайта оралды. Алғашқы турдағы нәтижесі де жаман емес. Павлодарлықтар бірінші турда сырт алаңда Шымкенттің «Ордабасы» клубымен кездесіп, 2:2 есебімен тең түсті. Сырт алаңдағы команданың ойыны көпшіліктің көңілінен шықты. Енді олар өз алаңында «Атыраумен» жолығады. Павлодар халқы да бұл матчты асыға күтіп отырғаны белгілі. «Атырау» болса, жақында бас бапкерін ауыстырды. Араға бірнеше жыл салып отандық маман Владимир Чебурин елге оралып, «мұнайлы» өлкенің командасының тізгінін ұстады. Бірінші турда «Атырау» Түркістанда «Ұлытаумен» тең түскен. Матчта есеп ашылмады. Осыған дейін екі ұжым өзара 49 рет жолыққан. Бұл жолы 50-рет кездескелі тұр.
Турдың орталық ойыны
«Қайрат» (Алматы) – «Ақтөбе» (Ақтөбе)
Басталуы – 19:00
Өтетін жері: Орталық стадион (Алматы)
Бас төреші: Санжар Ысқақов (Қостанай)
Кездесулер тарихы:
Матчтар саны – 79
«Қайраттың» жеңісі – 37
«Ақтөбенің жеңісі» – 31
Тең ойын – 11
Алматыда «Қайрат» пен «Ақтөбе» кездеседі. Билеттер бір сағаттың ішінде сатылып кетті. Жанкүйерлер ерекше асыға күтіп отырған ойын. «Қайрат» екі жыл қатарынан ел чемпионы атанды. Былтыр Чемпиондар лигасының жалпы кезеңіне дейін жетті.
«Ақтөбе» болса, жекеменшікке өткен соң, амбициясы жоғары екенін бірден байқатты. Командаға әлемдік деңгейдегі жұлдыздар келе бастады. Англияда атой салған, Еуропа чемпионы атанған Луиш Нани бар. Одан да басқа танымал ойыншылар жетерлік.
«Қайраттың» да құрамы біраз жаңарды. Финляндияның екі ойыншысы қатарға қосылды. Алматы клубы Суперкубокта «Тобылға» пенальти сериясында есе жіберді. Чемпионатта «Алтай» қақпасына бір гол соғып, минимальды есеппен жеңіске жетті.
«Ақтөбе» бірінші турда Түркістанда «Тобыл» командасының қақпасын төрт рет көздеді. Енді Алматыдан үш ұпай алуды көздейді. Оған «Қайрат» келісе қоя ма? Екі ұжым бұған дейін 79 рет жолыққан. Осы жолы 80-рет ойнамақшы.
«Қайсар» (Қызылорда) – «Астана» (Астана)
Басталуы – 19:00
Өтетін жері: «Қайсар Арена» (Қызылорда)
Бас төреші: Сәкен Байымбет (Тараз)
Кездесулер тарихы:
Матчтар саны – 39
«Қайсардың» жеңісі – 3
«Астананың» жеңісі – 29
Тең ойын – 7
Былтырғы маусымда тек отандық футболшылармен өнер көрсеткен Қызылорданың «Қайсары» клубы биыл құрамын бірнеше шетелдік ойыншылармен нығайтты. Маусымаралық үзіліс кезінде «Челси», «Ливерпуль», «Интер» және «Фенербахче» клубтарында ойнаған нигериялық шабуылшы Виктор Мозес командаға қосылады. Сондай-ақ сербиялық Никола Цуцкич, чилилік Томас Джонс және словакиялық Адам Ковач сияқты футболшылар да «Қайсар» құрамын толықтырды.
Керісінше, елорданың «Астанасы» маусымаралық үзілісте бірнеше шетелдік көшбасшы футболшыларынан айырылды. Дегенмен олардың орнын Әлібек Қасым, Бауыржан Исламхан сияқты отандық ойыншылар және клубтың жас дарындары басты.
Алғашқы турда Виктор Мозес қызылордалықтарға көмектесе алмаса да, «Қайсар» өз алаңында елордалық «Жеңіс» командасымен 1:1 есебімен тең ойнады. Ал «Астана» өз алаңында «Жетісу» командасын 1:1 есебімен жеңді. Статистикаға көз жүгіртсек, «Қайсар» «Астана» үшін қарапайым қарсыластардың бірі саналады. Дегенмен былтырғы маусымда «Қайсар» өз алаңында «Астанадан» ұпай алған болатын. Биыл қызылордалықтар сол нәтижені қайталай ала ма?
«Жеңіс» (Астана) – «Ордабасы» (Шымкент)
Басталуы – 20:00
Өтетін жері: «Астана Арена» (Астана)
Бас төреші: Антон Кучма (Көкшетау)
Кездесулер тарихы:
Матчтар саны – 32
«Жеңістің» жеңісі – 14
«Ордабасының» жеңісі – 12
Тең ойын – 6
Екінші турдың бірінші ойын күніне жоспарланған соңғы матч Астанада жергілікті «Жеңіс» пен «Ордабасы» клубтары арасында өтпек. Екі ұжым да биылғы маусымға жақсы дайындықпен келеді. Алайда, алғашқы турда екі ұжым да жанкүйерлерін жеңіспен қуанта алмады. «Жеңіс» сырт алаңда «Қайсардың» осал тұсын таба алмаса (1:1), «Ордабасы» өз алаңында Павлодардың «Ертісін» қабылдап, соңғы минуттарда ғана жеңілістен құтылып қалды – 2:2.
Сондықтан екі ұжым да бұл турда жеңіске жетуді көздейді. Статистика бойынша «Жеңістің» басымдығы байқалғанымен, кейінгі төрт ойынның екеуінде «Ордабасының» мерейі үстем болған. Біреуінде «Жеңіс» жеңіске жетсе, бір матч тең аяқталған.
17 наурыз
«Каспий» (Ақтау) – «Оқжетпес» (Көкшетау)
Басталуы – 17:00
Өтетін жері: «Қайсар Арена» (Қызылорда)
Бас төреші: Айдын Тасыбаев (Астана)
Кездесулер тарихы:
Матчтар саны – 27
«Каспийдің» жеңісі – 9
«Оқжетпестің» жеңісі – 14
Тең ойындар – 4
Араға екі жыл салып жоғары топқа оралған «Каспийдің» Премьер-лигадағы алғашқы ойыны сәтсіз басталды. Пірәлі Әлиевтің шәкірттері алғашқы турда «Қызылжарға» қонаққа барып, 2:1 есебімен қарсыластарына жол берді. Ал «Оқжетпес» өз алаңында былтырғы маусымды сәтті өткізіп, Конференция лигасына жолдама алған Семейдің «Елімай» командасымен ымырасыз тең ойын өткізді – 1:1.
Екі команда үшін де бұл кездесудің маңызы зор. «Каспий» премьер-лигада тұрақты ойын өрнегін қалыптастырып, алғашқы ұпайын алуды мақсат етсе, «Оқжетпес» былтырғы ойынын жалғастырып, чемпионаттағы көшбасшылар қатарына қосылуды көздейді.