Қазақстан Премьер-лигасының жаңа маусымы нәтижелі басталды. Бірінші турда сегіз матч өтіп, бірнеше қызықты нәтижелер тіркелді. «Астана» мен «Ақтөбе» қарсыластарын 4:1 есебімен ойсырата жеңсе, чемпион «Қайрат» сырт алаңда минималды жеңіске жетті. Төрт кездесуде командалар ұпай бөлісті.
«Оқжетпес» (Көкшетау) – «Елімай» (Семей) – 1:1
Маусымды Көкшетаудағы тартысты ойын ашты. Кездесудің басында семейлік команда шабуылды белсенді бастап, 16-минутта Иван Свиридовтың голының арқасында есеп ашты.
Екінші таймда «Оқжетпес» шабуылды үдете түсті. Соның арқасында гол көп күттірген жоқ. Қонақ команданың Владимир Стойкович қақпашысы оң қапталдан ұйымдастырылған шабуыл кезінде допты дұрыс ұстай алмады. Нәтижесінде автогол тіркелді. Бұдан кейін таблодағы көрсеткіш өзгерген жоқ. Қорытынды есеп – 1:1.
«Алтай» (Өскемен) – «Қайрат» (Алматы) – 0:1
«Қайрат» сырт алаңда ойнады. Бірақ ойын Алматыда өтті. Ел чемпиондары «Хан-тәңірі» стадионында Премьер-лиганың дебютанты «Алтай» клубымен кездесті. Бұл матчта чемпион ұзақ уақыт бойы қарсыластың қорғанысын бұза алмады. Кездесу тағдырын 64-минутта Жоржиньо шешті. Ол оң қанаттан келген әдемі пасты баспен дәл бағыттап, жалғыз голды соқты. «Алтай» негізінен қорғаныста ойнап, қауіпті сәттер аз жасады. Осылайша «Қайрат» алғашқы үш ұпайын еншіледі.
«Ақтөбе» (Ақтөбе) – «Тобыл» (Қостанай) – 4:1
«Ақтөбе» өз алаңындағы ойынды Түркістанда өткізді. Соған қарамастан Қостанайдың «Тобыл» клубын ірі есеппен жеңді.
Есепті бірінші кезеңде Даниэль Соса ашты. Ол Артур Шушеначевтің сол қапталдан ұйымдастырған шабуылын нәтижелі түйіндеді. Үзіліске дейін «Тобылдың» таразы басын теңестіретін мүмкіндігі болған. Бірақ Луис Герра пенальтиден мүлт кетті. Сосын қонақтар жағдайын одан сайын қиындатып алды. Максим Мякиш орталық алаңда өрескел айып бұзғаны үшін алаңнан қуылды. «Ақтөбе» сан басымдығын тиімді пайдаланды. Екінші кезеңде Зельковиич пен Тимур Досмағамбетов есепті 3:0-ге жеткізді. Қостанай командасы бір доппен жауап қайтарды. Мергендігімен көзге түскен Жасұлан Жұмашев болды. Ал ойынның нүктесін капитан Иван Ордец қойды. Украиналық «Манчестер Юнайтед» сапында 2008 жылы Чемпиондар лигасының жеңімпазы атанған Луиш Нанидың асырған пасын қақпаға дәл бағыттады. Қорытынды есеп – 4:1.
«Ордабасы» (Шымкент) – «Ертіс» (Павлодар) – 2:2
Шымкенттегі ойын ең нәтижелі тең нәтижелердің бірі болды. Матчтың басында «Ертіс» Максим Фединнің голымен алға шықты. Бірінші таймның соңына қарай Эвертон Мораес есепті теңестірді. Екінші таймда павлодарлықтар тағы да алға шықты. Қақпашыдан келген доп бірден шабуылшы Седьконың аяғына жетіп, беларусь футболшысы дәл соққы жасады.
Алайда «Ордабасы» соңғы минуттарда пенальти арқылы жеңілістен аман қалды. Эльхан Астанов 90+2-минутта есепті теңестіріп, командасына бір ұпай алып берді.
«Қызылжар» (Петропавл) – «Каспий» (Ақтау) – 2:1
Петропавлдағы матчта «Қызылжар» ерік-жігер танытып, камбэк жасады. Алғашқы таймда Андре Амарал «Каспийді» алға шығарды. Ұзақ уақыт бойы есеп өзгермей тұрды. Бірақ матч соңында «Қызылжар» шабуылын күшейтті. 83-минутта Бугре есепті теңестірсе, 89-минутта Бьорталид жеңіс голын соқты. Тіпті алаң иелері бір ойыншы кем қалғанына қарамастан, жеңісті сақтап қалды.
«Атырау» (Атырау) – «Ұлытау» (Жезқазған) – 0:0
Турдағы жалғыз голсыз матч Атырауда өтті. Командалар сақ ойнап, қауіпті сәттер өте аз болды. Кездесу барысында шабуылдар сирек ұйымдастырылды, сондықтан жанкүйерлер көп қызық көре алмады.
Матч соңында «Ұлытау»» ойыншысы Мәлікайдар қызыл қағаз алды. Дегенмен есеп өзгермеді – 0:0.
«Қайсар» (Қызылорда) – «Жеңіс» (Астана) – 1:1
Қызылордада өткен кездесуде де тең нәтиже тіркелді. Бірінші таймның соңында Әділет Кеңесбек «Қайсарды» алға шығарды. Ұзақ уақыт бойы алаң иелері жеңіске жақын тұрды. Алайда 86-минутта автогол тіркеліп, есеп теңесті. Нәтижесінде командалар ұпай бөлісті.
«Астана» (Астана) – «Жетісу» (Талдықорған) – 4:1
Турдың тағы бір ірі жеңісі елордада тіркелді. «Астана» қарсылас қақпасына алғашқы таймда-ақ үш гол соғып үлгерді. Атап айтсақ, 14-минутта Басманов есеп ашса, кейін Бартолец пен Абраев айырмашылықты үш голға жеткізді. Екінші таймда Томасов төртінші голды соқты.
Матч соңында «Жетісу» Зиванович арқылы бір голмен жауап қайтарды, бірақ бұл нәтиже ойын тағдырын өзгерте алмады. қорытынды есеп – 4:1.
Премьер-лиганың келесі туры 16-17 наурыз күндері өтеді.