26 қазанда футболдан Қазақстан Премьер-лигасының соңғы, яғни 26-тур ойындары өтеді. Спорт журналисі Әділ Саптаев KFF League сайтына пікір білдіріп, алдағы ойындарға қатысты өз болжамын ұсынды.
«Қайрат» – «Астана»
Маусымның соңғы туры чемпиондық тартыстың және екі түрлі философияның – астаналық команданың прагматизмі мен алматылықтардың эмоциялық әрі техникалық ойынының шарықтау шегі болмақ. Бұл ойында алаң иелеріне тең нәтиже де жеткілікті, ал қонақтарға тек жеңіс қажет. Бұл жағдай тактикалық тепе-теңсіздік тудырады. Яғни алматылықтар ақылмен ойнап, «Астанаға» ашыла түсуге мәжбүр болады.
«Қайрат» Чемпиондар лигасында «Пафоспен» тең ойнағаннан кейін сәл шаршаңқы көрінеді. Десе де қазір алматылық ұжымның басты мәселесі – шабуыл шебінде өткірліктің жетіспеуі. Соған қарамастан, олар өз алаңында агрессивті ойнап, жанкүйерлердің қолдауынан қосымша күш алады деп ойлаймын.
«Астана» маусым соңына қарай бабына енді. Орталықтағы тұрақты ойын мен қапталдардағы белсенділіктің арқасында қонақтар прессинг ұйымдастырып, ойынды өз бақылауында ұстай алады. Алайда астаналықтардың қорғанысы жылдам қарсы шабуылдарға әлсіз – бұл матчтағы шешуші фактор болуы мүмкін.
Кездесу тартысты әрі шиеленісті өтетіні анық. Десе де ойын тағдырын бір ғана эпизод немесе стандарт шешіп кетуі ықтимал. «Қайраттың» өз алаңында ойнайтынын және турнир кестесіндегі басымдығын ескерсек, алматылықтар тең нәтижеге немесе аз ғана басымдықпен жеңіске жете алады. Сондықтан фаворит – «Қайрат». Бірақ ойын барысында тосын нәтижелердің болуы ғажап емес. Бәрін бір стандарт немесе болмашы қателік шешіп кетуі мүмкін.
«Ақтөбе» – «Ордабасы»
Бұл кездесу шиеленісті бірақ аз гол соғылатын ойын болмақ. Қос команданың қазіргі жағдайын, өзара кездесулер тарихын және турнир кестесіндегі орнын ескерсек, тең нәтиже күтуге болады.
«Ақтөбенің» өз алаңында ойнауы командаға аздаған басымдық беруі мүмкін. Қазір олар 5-орында келеді және Конференция лигасының іріктеу кезеңіне өту үшін алғашқы төрттікке таласып жатыр. Ал «Ордабасы» сырт алаңда сенімсіз өнер көрсетіп жүр. 13 ойынның небәрі үшеуінде ғана жеңіске жеткен. Соңғы кезде «Елімайдан» (1:2) және «Тобылдан» (0:1) жеңілді. Сондықтан бұл ойында мен тең нәтиже болады деп болжаймын.
«Елімай» – «Атырау»
26 қазанда Семейде өтетін маусымның соңғы турындағы бұл матч өте қызықты болмақ. Екі клубтың турнирлік мақсаты әртүрлі болғанымен, кездесу тартысты өтеді деп күтіледі.
«Елімай» қазір тамаша формада. Соңғы бес матчтың төртеуінде жеңіске жетіп, 16 гол соқты. Андрей Карповичтің командасы жоғары прессинг пен жылдам шабуылдарға сүйеніп, тәуір ойын көрсетіп жүр. Соңғы кездесулерде «Ордабасыны» және «Қайратты» жеңіп, «Астанамен» сырт алаңда тең түсуі – олардың өскенін дәлелдейді.
«Атырау» болса тұрақсыз ойын көрсетіп жүр. Соңғы бес ойында екі мәрте жеңіске жетіп, 7 гол соқты. Команда прагматикалық стильді ұстанып, тығыз қорғаныс пен стандарттарға сенім артады.
Болжам: Қазіргі ойын қарқыны мен команда бабын ескерсек, «Елімай» айқын фаворит. Алғашқы минуттардан-ақ белсенді бастап, қысым көрсетеді. «Атырау» қарсы шабуылмен ойнауға тырысқанымен, ұзаққа шыдай қоюы екіталай.
«Жеңіс» – «Қайсар»
Бұл – турдағы ең қызықты кездесулердің бірі болмақ. «Жеңіс» өз амбициясын дәлелдеуге ұмтылса, «Қайсар» жанкүйерлерін қуантуды көздейді. Елорда командасы соңғы бес матчта 10 гол соғып, шабуылда белсенді ойын көрсетіп жүр. Мысалы, «Тұранмен» болған (6:3) матч соның дәлелі. Сондай-ақ «Жеңіс» қатарынан жеті ойында гол соғып келеді. Бірақ қорғаныста мәселе бар: команда әр ойында орта есеппен 1,8 гол өткізіп алды.
«Қайсар» жеті матч қатарынан жеңіске жете алмай жүр, соңғы бес ойында бар болғаны үш гол соққан. Қорғанысы да сенімсіз: сырт алаңдағы соңғы 12 ойынының бәрінде гол өткізіп алған. Мұндай статистикамен «Жеңіс» сияқты қарқынды қарсыласпен ойнау оңай емес.
Болжам: Барлық көрсеткіш бойынша «Жеңіс» басым әрі жақсы формада. Сондықтан олар өзара кездесулердегі «төмен нәтиже» дәстүрін бұзып, сенімді жеңіске жетеді деп ойлаймын.
«Жетісу» – «Қызылжар»
Бұл матч турнир кестесінің ортасындағы екі команда үшін де маңызды сынақ болмақ. Ойын тактикалық күреске толы әрі аз гол соғылатын сияқты. Менің болжамым бойынша, кездесу 1:1 немесе бір команданың бір гол басымдығымен аяқталауы мүмкін.
«Оқжетпес» – «Тұран»
«Оқжетпес» соңғы бес ойында жеңіліп, әр матчта бір голдан артық соға алмай жүр. Ал «Тұран» маусым соңын сәтсіз өткізіп, Бірінші лигаға түсіп қалды. Соған қарамастан, Түркістан командасы жоғары топтағы соңғы ойынын сәтті өткізіп, Көкшетауда жеңіспен қоштасады деп ойлаймын.
«Ұлытау» – «Тобыл»
«Ұлытау» өз алаңында Қостанайдың «Тобылын» қабылдайды. Бұл алаң иелері үшін үлкен сынақ болмақ. «Тобыл» биыл Қазақстан кубогын жеңіп алып, енді еурокубоктарға жолдама алуға ұмтылуда. Соған қарамастан, қостанайлықтар Жезқазғанда жеңіске еш қиындықсыз жетуге тиіс.