26 қазан күні Қазақстан Премьер-лигасының соңғы тур ойындары өтеді. Сол кездесулердің бірінде ел чемпионы анықталады. Шешуші ойында алтын медаль үшін «Қайрат» пен «Астана» клубтары бақ сынайды.
Қазақстандық «ел классико» қарсаңында KFF League редакциясы өткенге көз жүгіртіп, бұған дейін ел чемпиондары қалай анықталғанын және қос астаналық клуб арасындағы тартысты тарихты еске түсіруді жөн көрді.
Ұлттық біріншілік тарихында еліміздің үздік клубы әрдайым екі айналымдық турнир қорытындысы бойынша анықтала бермеген. Үш маусымда қосымша, яғни «алтын» матч өткізуге тура келген. Алғаш рет мұндай ойын 1997 жылы өтіп, онда «Ертіс» қосымша кездесуде «Таразды» жеңген. 2000 жылы «Жеңіс» Петропавлдың «Аксесс-ГолденГрейн» командасын тізе бүктіріп, чемпион атанса, сегіз жыл өткен соң «Ақтөбе» Қостанайдың «Тобылынан» басым түсті.
Бір қызығы, бір рет «алтын матч» чемпионат аясында өткен. Бұл жағдай 1993 жылы тіркелген. Соңғы тур алдында Павлодардың «Аңсаты» «Екібастұздан» екі ұпайға алда болып, қарсыласын өз алаңында қабылдады. Ол кезде жеңіске екі ұпай берілетінін ескерсек, қонақтар жеңсе ғана көшбасшыны қуып жетіп, қосымша ойынға мүмкіндік алар еді. Алайда алаң иелері 2:1 есебімен жеңіске жетіп, чемпион атанды.
1993 жылғы оқиға биылғы Премьер-лиганың 26-тур алдындағы жағдайға ұқсайды. Дегенмен бұл жолы қосымша ойын қарастырылмайды. «Қайрат» тең түскен жағдайда да титулын сақтап қалады, ал «Астана» жеңіске жетсе ғана ел чемпионы атанады.
Айта кетерлігі, осыдан 10 жыл бұрын, яғни 2015 жылғы маусымда дәл осы екі команда бейресми «алтын» матч өткізген. Ол кезде Премьер-лигада 16 клуб ойнайтын. «Астана» турнир кестесінде «Қайраттан» бір ұпайға артта келе жатқан еді. 30-турдағы сырт алаңдағы матчта елордалықтар 1:0 есебімен жеңіске жетіп, қарсыласынан озып кеткен болатын. Қалған турларда екі команда да ұпай жоғалтпай, нәтижесінде «Астана» чемпион атанды.
Енді екі клубтың өзара бәсекелестік тарихына тоқталсақ. Қазір екі командада да 17 трофейден бар. «Астана» жеті рет ел чемпионы атанып, үш рет Кубок, алты рет Суперкубок және бір рет Лига кубогын жеңіп алған. Ал «Қайраттың» қоржынында төрт чемпиондық, 10 Кубок және үш Суперкубок бар. Демек, 26 қазанда Кәсіпқой футбол лигасының жеңімпазы ғана емес, трофей саны бойынша жеке көшбасшы да анықталады деген сөз.
«Қайрат» пен «Астана» барлығы 52 ресми кездесу өткізген. Соның 21-інде «Астана», 19-ында «Қайрат» жеңіске жеткен, ал 12 ойын тең аяқталған.
Кейінгі жылдары өз алаңындағы матчтарда алаң иелерінің айқын артықшылығы байқалмайды. «Қайрат» өз алаңындағы соңғы 10 ойынның бесеуінде ғана жеңген, ал «Астана» өз үйіндегі 10 матчтың үшеуінде ғана басым түскен.
2025 жылғы маусымдағы алғашқы кездесу де тең аяқталған. 2 наурызда «Астана Аренада» өткен ойында есеп 1:1 болды. Қазір мұндай нәтиже «Қайратты» толық қанағаттандырады.
Дегенмен, соңғы рет чемпиондық атағын сәтті қорғап қалған команда — 2019 жылғы «Астана». Ал «Қайрат» өз тарихында әлі екі маусым қатарынан «алтын» медаль жеңіп көрмеген.
Қалай болғанда да, 2025 жылғы маусымның чемпионы Қазақстандағы ең мықты клуб атағына толық лайық болмақ!