17-19 қазан күндері футболдан Қазақстан Премьер-лигасының 25-тур ойындары өтті. Бұл турдан кейін чемпион атағы соңғы турдағы «Қайрат» пен «Астана» арасындағы өзара кездесуден соң анықталатын болды.
Ойын нәтижелері:
«Қызылжар» – «Қайрат» – 0:1
«Ұлытау» – «Қайсар» – 1:1
«Атырау» – «Жеңіс» – 1:1
«Тұран» – «Елімай» – 3:6
«Жетісу» – «Тобыл» – 1:2
«Астана» – «Ақтөбе» – 5:3
«Ордабасы» – «Оқжетпес» – 7:1
17 қазан
«Қызылжар» (Петропавл) – «Қайрат» (Алматы) – 0:1 (0:1)
Гол: Сәтпаев, 42 (0:1)
«Қайраттың» Чемпиондар лигасындағы ойынына байланысты бұл матч жұма күні өтті. «Қызылжар» өз алаңында «Қайратқа» лайықты қарсылық көрсетті. Дегенмен алматылықтар мінез танытып, жеңісті жұлып алды. Ойындағы жалғыз әрі шешуші голды отандық футболдың жас жұлдызы Дастан Сәтпаев соқты. Екінші таймда «Қызылжар» сапындағы «Қайраттың» бұрынғы ойыншысы Арсен Буранчиев алаңнан қуылып, алматылықтардың жеңісті сақтап қалуына «үлес» қосты.
18 қазан
«Ұлытау» (Жезқазған) – «Қайсар» (Қызылорда) – 1:1 (1:1)
Голдар: Серікұлы, 14 (0:1); Данияров, 28 (1:1)
Командалар аса тартысты ойын көрсетпей, тең нәтижеге қанағат етті. Себебі бұл нәтиже екі ұжым үшін де тиімді болды. Алғашқы таймда бір-бір гол соғып, сол есепті матч соңына дейін сақтап қалды. Осылайша, екі клуб та Премьер-лигадағы орнын сақтап қалды.
«Атырау» (Атырау) – «Жеңіс» (Астана) – 1:1 (0:0)
Голдар: Юденков, 71 (1:0); Лобжанидзе, 86 (1:1)
Бұл матч «Атырау» үшін өте маңызды еді. Өйткені жеңіске жетсе, мерзімінен бұрын лигадағы орнын сақтап қалады. Дегенмен тең нәтиже де атыраулықтарды қауіп аймағынан толықтай құтқарды. Ойынның соңында «Жеңіс» командасы мінез көрсетіп, таразы басын теңестірді.
«Тұран» (Түркістан) – «Елімай» (Семей) – 3:6 (2:3)
Голдар: Оразов, Бенитес, Зұлфықаров, Свиридов, Перцух, Плакка, Мұртазаев, Чермель, Кенжебек
«Атыраудың» тең ойыны «Тұранға» аздаған үміт сыйлаған еді. Алайда, еурокубок жолдамасына таласқан «Елімай» үш ұпай олжалау үшін барын салды. «Түркістан Аренадағы» матч тартысты өтіп, қонақтар алғашқы минуттардан-ақ есеп ашып, артынша басымдығын еселеді. Бірақ алаң иелері де қарап қалмай, есеп айырмасын қысқартты. Бірақ үзіліске дейін «Елімай» 3:2 есебімен алда тұрды.
Екінші таймда Андрей Карпович шәкірттері толық басымдық танытып, ірі жеңіске жетті. «Тұран» қатарынан екінші матчта 3:6 есебімен жеңілді. Енді олардың Премьер-лигада қалу мүмкіндігі тек теория жүзінде ғана сақталып қалды.
19 қазан
«Жетісу» (Талдықорған) – «Тобыл» (Қостанай) – 1:2 (1:0)
Голдар: Такулов, 4 (1:0); Вукчевич, 55 (1:1); Сигневич, 66 (1:2)
«Қайраттың» жеңісінен кейін «Тобыл» чемпион атану мүмкіндігінен айырылғанымен, күміс жүлде үшін күресті жалғастыруда. Талдықорғандағы кездесуде алаң иелері барын салғанымен, тәжірибелі қостанайлықтар екінші таймда басымдықты өз қолына алды.
Турдың матчы
«Астана» (Астана) – «Ақтөбе» (Ақтөбе) – 5:3 (4:2)
Голдар: Чинеду, 10 (1:0); Жан, 13 (1:1); Камара, 21 (2:1); Чинеду, 33 (3:1); Соса, 40 (3:2); Грипши, 45+2 (пенальти – 4:2); Чинеду, 50 (5:2); Шушеначев, 62 (5:3)
Бұл ойында «Астанаға» чемпиондық жарыста қалу үшін тек жеңіс керек еді. Басқа нәтиже «Қайратты» мерзімінен бұрын чемпион ететін. Ал «Ақтөбе» үшін де жеңіс маңызды болатын, себебі тең нәтиже олардың еурокубок үмітін сейілтетін.
Мақсаттары екі бөлек екі команданың ойыны жанкүйерлерге нағыз футбол мерекесін ұсынды. Стадионға жиналған жанкүйерлер 90 минуттың ішінде 8 голдың куәсі болды. Бірінші таймның өзінде командалар 6 гол соқты. «Астана» футболшылары үзіліске 4:2 есебімен шықты. Екінші таймда екі ұжым да бір-бір голдан соқты. Осылайша, елордалықтар 5:3 есебімен сенімді жеңіске жетті. Сөйтіп, ҚПЛ жеңімпазы соңғы турдағы «Қайрат» пен «Астана» арасындағы кездесуде анықталады. Ал «Ақтөбе» үлкен ықтималдықпен, еурокубоктардан тыс қалады.
«Ордабасы» (Шымкент) – «Оқжетпес» (Көкшетау) – 7:1 (4:0)
Голдар: Жоау, 7 (1:0); Жоау, 24 (2:0); Э. Астанов, 37 (3:0); Э. Астанов, 45+1 (4:0); Жумат, 59 (4:1); Имнадзе, 63 (5:1); Малый, 77 (6:1); Капацина, 83 (7:1)
Маңызы аз кездесуде шымкенттіктер өз жанкүйерлерін қуантты. «Ордабасы» қарсыласын ірі есеппен ұтып (7:1), екі команданың тарихындағы ең ірі нәтиже тіркелді.
26-ТУРДЫҢ (ҚОРЫТЫНДЫ) ОЙЫНДАРЫ:
«Қайрат» – «Астана»
«Елімай» – «Атырау»
«Ақтөбе» – «Ордабасы»
«Ұлытау» – «Тобыл»
«Жеңіс» – «Қайсар»
«Оқжетпес» – «Тұран»
«Жетісу» – «Қызылжар»
Барлық матч 26 қазан күні сағат 15:00-де бір уақытта басталады.