Футболдан Қазақстан премьер-лигасының екінші тур ойындары мәреге жетті. Сөйтіп командалар үзіліске кетті. Өйткені алда ұлттық құрамалардың халықаралық ойындары бар.
«Қайрат» (Алматы) — «Ордабасы» (Шымкент) — 4:0
Голдар: Зария, 9 (1:0). Жоао Пауло, 38 (2:0). Зария, 45+2-пенальтиден (3:0). Станоев, 73 (4:0).
Алаңнан қуылды: Швырев, 85.
Енді екінші турға тоқталып өтсек, турдың орталық ойыны Алматыда өтті. Алатау баурайында соңғы екі жылдағы ел чемпиондары кездесті. 2023 жылғы чемпион «Ордабасы» Алматыға қонаққа барды.
Бірінші таймның өзінде үш гол соққан алаң иелері екінші таймда есепті 4:0-ге жеткізді. Қорытынды есеп — 4:0.
Ойыннан кейін «Ордабасы» командасының бас бапкері Андрей Мартин бірнеше матчтан кейін ғана қалыпқа келеміз деп отыр.
«Мұндай ойынға пікір білдірудің өзі қиын. Тек алаң иелерін құттықтаудан басқа амал жоқ. „Қайрат“ тәртіпке бағынған жақсы ойын көрсетті. Бірақ өз командам туралы жаман сөз айта алмаймын. Шешуші сәттерде қарсылас тың болды және шеберлік таныта білді. Өз мүмкіндіктерін мүлт жібермеді. „Ордабасының“ бұл құрамы жаңарған. Сондықтан әлі 5-7 тур керек. сол кезде ойынның балансы құрылады», — дейді Андрей Мартин.
«Оқжетпес» (Көкшетау) — «Атырау» (Атырау) — 2:1
Голдар: Жұмат, 6 (1:0). Марат, 52 (2:0). Барбоза, 82 (2:1).
«Оқжетпес» премьер-лигаға оралды. Ең бастысы, Көкшетау жоғары лиганың ойынын қабылдады. Әйтпесе, «Оқжетпес» маусымның басында өз алаңындағы ойынын көбіне басқа қалада өткізетін. Мұнысы әрі сәтті болды. Андрей Ферапонтов шәкірттері жанкүйерлерін қуантып, «Атыраудан» үш ұпай алды. Дәурен Жұмат пен Дамир Мараттың голы алаң иелеріне жеңіс сыйлады.
«Атырау» осыған дейін «Елімайдан» басым түскен соң, жақтастары көп үміт артып қалған еді. Бірақ бұл жолы сенімді ақтай алмады.
«Жетісу» (Талдықорған) — «Ұлытау» (Жезқазған) — 0:0
Талдықорғандағы «Жетісу» мен «Ұлытау» арасындағы матч тең аяқталды. Тіпті есеп ашылған жоқ. Премьер-лига дебютанты «Ұлытау» осылайша алғашқы ұпайына қол жеткізді.
«Жеңіс» (Астана) — «Тобыл» (Қостанай) — 0:0
2000-жылдары атағы дүркіреген «Жеңіс» осыдан төрт жыл бұрын қайта жаңғырған еді. Былтыр клуб премьер-лигаға оралды. Енді биыл өз алаңындағы ойынын Астанада өткізуге мүмкіндік алып отыр. Араға 16 жыл салып, «Жеңіс» елордада премьер-лигадағы ойынын өткізді. Команда Қостанайдың «Тобылын» қабылдады.
Негізі фаворит қонақтар болатын. Құрамы тәп-тәуір легионерлермен жасақталған команданың жеңіске жететіне сенетіндер көп болған. Алайда матч тең аяқталды.
Ал ойынға келсек, екі команданың да гол соғатын мүмкіндіктері болды. Бірақ пайдалана алмады. Сөйтіп қос ұжым бір ұпайға қанағат білдірді.
«Ақтөбе» (Ақтөбе) — «Тұран» (Түркістан) — 2:1
Голдар: Анджелкович, 29 (1:0). Милойко, 55 (1:1). Сейдахмет, 84 (2:1).
«Ақтөбе» премьер-лигадағы алғашқы үш ұпайына қол жеткізді. Команда Ақтөбедегі қосалқы алаңда Түркістанның «Тұран» клубын жеңді. Матчтағы үш гол да баспен соғылды. Қорытынды есеп — 2:1. Жеңіс голының авторы — Еркебұлан Сейдахмет.
Биыл негізі «Тұран» клубының алдына қойып отырған мақсаты жоғары. Құрамы да қарымды. Беларусь маманы Виталий Жуковский жүлдеге таласып көрсуге тырысады.
«Бізге аздаған тәжірибе жетіспей жатыр. Жігіттер болмашы жерден жекелеген қателер жіберіп жатыр. Бәлкім жастық пен тәжірибенің аздығынан болар. Бірақ футболшылардың көзінен от көрдім. Жеңіске жеткісі келеді. Сол жағы ұнады», — дейді «Тұран» бапкері Виталий Жуковский.
«Елімай» (Семей) — «Қайсар» (Қызылорда) — 2:0
Голдар: Тугарев, 62 (1:0). Плакка, 89 (2:0).
«Елімай» әзірге Астанада ойнамақшы. Бұл жолы олар елордада «Қайсарды» қабылдады. Тек қазақ футболшыларымен ойнауды мақсат еткен Қызылорда клубы бірінші таймды тәп-тәуір өткізді. Тіпті, есеп ашатын мүмкіндіктері болған.
Виктор Кумыков әр тур сайын жас футболшыларға да көп мүмкіндік беріп жатыр. Орталық алаңда Думан Нәрзілдаев пен Айбол Әбікен жұбы жақсы ойын көрсетіп жүр. Бірақ шабуыл шебінде гол соғатын адам жетіспей тұрғаны жасырын емес.
Ал қарсыласы Семей клубы биыл жақсы ойыншылармен толыққан еді. Әзірге Андрей Карпович бапкер команданың ойынын қалыпқа келтіруге тырысуда. Матчтағы есеп 62-минутта ашылды. Ресейлік Тугараев мергендік танытты. Одан кейін 89-минутта Плакка ойынды түйіндей алды. Қорытынды есеп — 2:0.
«Қызылжар» (Петропавл) — «Астана» (Астана) — 0:2
Голдар: Чинеду, 11 (0:1). Грипши, 42 (0:2).
Осы турды «Қызылжар» мен «Астана» қорытындылады. Матч Қостанайдағы жабық манежде өтті. Биыл «Қызылжарда» өзгеріс көп. Директор мен бас бапкер ауысты. Клуб құрамы жаңарды.
Ал «Астана» бабында. Құрамы тұрақты. Осы маусымдағы чемпиондықтан басты үмітті ұжымдардың бірі. Бұл ойында елорда клубы мәселені бірінші таймда шешті. Чинеду мен Грипшидің голы Бабаян шәкірттеріне үш ұпай сыйлады.
Енді премьер-лиганың 3-туры 29-30 наурыз күндері өтеді.
Фото: ©ФК "Кайрат", Арман Джаксыгулов