17-19 қазан күндері футболдан Қазақстан Премьер-лигасының 25-тур ойындары өтеді. Егер бұл турда алда-жалда күтпеген, тосын нәтижелер тіркелетін болса, онда биылғы маусымның жеңімпазы дәл осы турда анықталып қалуы мүмкін.
17 қазан
«Қызылжар» (Петропавл) – «Қайрат» (Алматы)
Басталуы: 15:00
Өтетін орны: «Қарасай» стадионы (Петропавл)
Кездесулер тарихы:
Ойын саны – 42
«Қызылжардың» жеңісі – 12
«Қайраттың» жеңісі – 22
Тең ойын – 8
25-турдың шымылдығы жұма күні Петропавлдағы матчпен ашылады. «Қызылжар» бұл ойында Алматының «Қайратын» қабылдайды. Алаң иелері қонақтардың өтінішін қабылдап, ойынды сәл ертерек өткізуді жөн көріп отыр. Өйткені алматылықтар келесі аптада Чемпиондар лигасының негізгі кезеңінде «Пафоспен» ойнайды. «Қайрат» сол кездесуге сапалы дайындалу үшін ҚПЛ матчы ертерек өткізілмек.
Алматының «Қайраты» биыл да былтырғы чемпиондық атағын сақтап қалуға жақын. Тіпті осы турдың қорытындысы бойынша-ақ «сары-қаралар» қарсыластарын қапы қалдырып, жеңімпаз атануы мүмкін. Алайда бұл үшін «Қайратқа» өз ойынында жеңіске жетіп қана қоймай, «Астана» өз алаңында ұпай жоғалтуы қажет. Ал «Қызылжар» өз алаңында оңайлықпен беріле қоймас, өйткені петропавлдықтар бұған дейін де алматылықтардан бірнеше рет ұпай тартып алған.
18 қазан
«Ұлытау» (Жезқазған) – «Қайсар» (Қызылорда)
Басталуы: 15:00
Өтетін орны: «Металлург» стадионы (Жезқазған)
Кездесулер тарихы:
Ойын саны – 1
«Ұлытаудың» жеңісі – 0
«Қайсардың» жеңісі – 0
Тең нәтиже – 1
Бұл кездесуде жеңіске жеткен команда Бірінші лигаға түсіп қалу қаупінен біржола құтылады. Ал жезқазғандықтарға Премьер-лигадағы орнын сақтап қалу үшін тең ойын да жетіп жатыр. Алаң иелері өткен турда «Атыраудан» (1:5) жеңілген соң, өз жанкүйерлерінің алдында ақталуы керек. Ал «Қайсар» соңғы алты тур қатарынан жеңіске жете алмай келеді.
«Атырау» (Атырау) – «Жеңіс» (Астана)
Басталуы: 16:00
Өтетін орны: «Мұнайшы» стадионы (Атырау)
Кездесулер тарихы:
Ойын саны – 25
«Атыраудың» жеңісі – 10
«Жеңістің» жеңісі – 11
Тең нәтиже – 4
«Атырау» футболшылары бірінші айналымда турнир кестесінің соңына түсіп қалғанымен, екінші айналымда бар күш-жігерімен қиын жағдайдан шығып келеді. Бас бапкер Виталий Жуковский оралғаннан кейін «мұнайшылар» жеті ойын қатарынан жеңілмей келе жатыр. Өткен турда «Ұлытауды» ойсырата ұтқан соң, атыраулықтар көктемнен бері алғаш рет соңғы орыннан көтерілді.
Ал «Жеңіс» бұл жолғы кездесуде ешқандай қысымсыз ойнайды. Себебі елордалықтар үшін маусымның қалған бөлігі турнир кестесінде аса маңызға ие емес. Айтпақшы, былтыр дәл осы алаңда астаналықтар 1:2 есебімен жеңілген еді. Биылғы нәтиже қалай болар екен?
«Тұран» (Түркістан) – «Елімай» (Семей)
Басталуы: 18:00
Өтетін орны: «Түркістан Арена» (Түркістан)
Кездесулер тарихы:
Ойын саны – 7
«Тұранның» жеңісі – 1
«Елімайдың» жеңісі – 5
Тең нәтиже – 1
Бұл матч екі команда үшін де аса маңызды болмақ. Егер «Тұран» жеңілсе не тең түссе, ал «Атырау» өз ойынында ұтса, онда түркістандықтар Премьер-лигамен қош айтысуы мүмкін. Ал «Елімайға» да ұпай қажет. Олар «Ақтөбемен» Еурокубок жолдамасына таласып жатыр. Айта кетерлігі, «Тұран» әлі күнге дейін «Елімайды» чемпионат аясында жеңбеген.
19 қазан
«Жетісу» (Талдықорған) – «Тобыл» (Қостанай)
Басталуы: 15:00
Өтетін орны: «Жетісу» стадионы (Талдықорған)
Кездесулер тарихы:
Ойын саны – 64
«Жетісудың» жеңісі – 14
«Тобылдың» жеңісі – 35
Тең нәтиже – 15
«Тобылдың» әлі де теориялық тұрғыда бас жүлдеге үміті бар. Бірақ егер «Қайрат» Петропавлда жеңіске жетсе, ол үміт сөнуі мүмкін. Соған қарамастан, қостанайлықтар жеңіске жетсе, уақытша болса да турнир кестесінде «Астанамен» теңеседі.
«Жетісу» клубының ҚПЛ-дегі орнын сақтап қала ма, жоқ па – ол өзге ойындардың нәтижесіне байланысты болмақ. Бірақ «Тобыл» Талдықорғанда өте сенімді ойнайды: кейінгі тоғыз жылда «Жетісу» өз алаңында қостанайлықтарды бірде-бір рет жеңбеген екен.
ТУРДЫҢ ОРТАЛЫҚ ОЙЫНЫ
«Астана» (Астана) – «Ақтөбе» (Ақтөбе)
Басталуы: 17:00
Өтетін орны: «Астана Арена» (Астана)
Кездесулер тарихы:
Ойын саны – 54
«Астананың» жеңісі – 29
«Ақтөбенің» жеңісі – 12
Тең нәтиже – 13
«Қызылжар» мен «Қайрат» арасындағы ойын қандай есеппен аяқталса да, «Астана» өз алаңында «Ақтөбені» жеңсе, чемпиондыққа таласты жалғастырады. Елордалықтар бұл матчта бар күшін салатыны анық. Бірақ «Ақтөбеге» де ұпай ауадай қажет. Өткен маусымда Кубокта жеңіске жетіп, қола жүлде алған команда бұл жолы жүлде үшін таласа алмайды. Дегенмен Еурокубокқа апаратын төртінші орынға таласуға мүмкіндігі бар. Сондықтан «Астана Аренада» олар да жеңілуге жол бермеуі тиіс.
«Ордабасы» (Шымкент) – «Оқжетпес» (Көкшетау)
Басталуы: 18:00
Өтетін орны: Қ. Мұнайтпасов атындағы стадион (Шымкент)
Кездесулер тарихы:
Ойын саны – 44
«Ордабасының» жеңісі – 23
«Оқжетпестің» жеңісі – 12
Тең нәтиже – 9
Турдың соңғы ойыны Шымкентте өтеді. Бұл матчты турнир кестесіндегі жетінші және сегізінші орындарға талас деп атауға болады. Қазіргі уақытта көкшетаулықтар шымкенттіктерден бір ұпай алда тұр. Егер қонақтар жеңіске жетсе, маусымды «Ордабасыдан» жоғары аяқтайтыны сөзсіз. Алайда «Оқжетпес» Шымкентте соңғы алты матчтың бәрінде жеңіліп келеді. Соңғы рет олар бұл қалада 2007 жылдың наурызында ғана жеңіске жеткен.