11 қазан күні Алматыда Оралдың «Жайық» клубы мен елорданың «Астана Ж» командалары арасында Екінші лиганың финалы өтеді. Финал қарсаңында елордалық клубтың шабуылшысы Арсен Ахметов KFF League сайтына сұхбат беріп, алдағы матч алдындағы ойларымен бөлісті.
– Арсен, бұл маусымда 21 гол соғып, Екінші лиганың үздік сұрмергені атандың. Мұндай нәтижеге не көмектесті?
– Бұл ең алдымен бүкіл команданың және жаттықтырушылар штабының еңбегі. Менің голдарым – біздің ойын стиліміз бен ұжымның жүйелі жұмысының жемісі.
– «Астана Ж» маусымды өте сәтті өткізді: 20 матчтың 19-ында жеңіске жетіп, бірде-бір ойында жеңілген жоқ. Жалпы маусымға қандай баға бересің?
– Иә, біз маусымды өте жақсы өткіздік, бірақ әлі де жетілдіретін тұстарымыз бар. Мұндай нәтиже – ұжымдық еңбектің және жаттықтырушылардың еңбегінің арқасы. Алда Бірінші лига, демек, жұмыс одан әрі жалғасады.
– Команданың осындай сенімді ойынының сыры неде деп ойлайсың?
– Шын мәнінде, ешқандай ерекше сыр жоқ. Мұның бәрі маусым бойы атқарылған жүйелі еңбек пен дұрыс көңіл күйдің нәтижесі.
– «Жайық» – алғашқы маусымда-ақ Оңтүстік-Батыс конференциясының жеңімпазы атанды. Олардың ойыны туралы не айтасың?
– «Жайық» – өте жақсы қарсылас, біз үшін ерекше сынақ болмақ. Бірақ біз өз ойынымызды көрсетіп, маусым бойы қалай ойнадық, сол қарқынмен шығамыз.
– Финал Алматыда өтеді. Бейтарап алаңда ойнау қаншалықты қиын?
– Финалдық матчтардың өзі әрқашан ерекше оқиға. Ал кездесудің бейтарап алаңда өтуі ойынды одан әрі тартысты және қызықты етеді.
– Финалда гол соғып, үздік сұрмерген екеніңді дәлелдеу қаншалықты маңызды?
– Әрине, финалда гол соққым келеді. Бірақ ең бастысы – команданың жеңісі. Егер менің голым жеңіске себеп болса, бұл ең керемет сәт болар еді. Ал егер басқа біреу соқса да, қуаныш одан кем болмайды. Маңыздысы – кубокты командамен бірге көтеру.
– Бұл маусым сен үшін ерекше болды. Алдағы жоспар қандай?
– Қазір барлық назар финалға аударып отырмыз. Одан кейін ғана келесі қадам туралы ойлануға болады. Мақсат – әрі қарай өзімді дамыту, жаңа деңгейге шығу, мықты лигада ойнау және командаға пайда тигізу. Бұл маусым өз-өзіңе сенсең, бәрі де мүмкін екенін дәлелдеді.