11 қазан күні Алматыда Оралдың «Жайық» командасы мен елорданың «Астана Ж» клубы арасында Екінші лиганың финалы өтеді. Матч қарсаңында «Жайық» клубының спорт директоры Руслан Оталиев KFF League сайтына сұхбат беріп, алдағы ойын туралы пікірін ортаға салды.
– Руслан, «Жайық» биыл Оңтүстік-Батыс конференциясында сенімді ойын көрсетіп, бірінші орынды иеленді. Команданың маусымдағы өнерін қалай бағалар едіңіз?
– Былтыр Орал футболы үшін оңай кезең болған жоқ. Үлкен футболдан айырылып қалу қаупі туындады. Дегенмен облыс басшылығы мен инвесторлардың қолдауымен футбол қаламызға қайта оралды. Қазір еліміздің жалғыз еуропалық қаласында футбол қайта дамып келеді. Маусым алдындағы басты мақсаттардың бірі – жергілікті ойыншылармен ойнап, чемпион атану еді. Бұл міндет толық орындалды. Ең бастысы – команданың негізгі құрамын сақтап қалдық. Көптеген сынақтан өттік. Бірінші орынды лайықты түрде иелендік деп ойлаймын. Бұл – еңбектің, тәртіптің және бірліктің нәтижесі.
– Команданың дебюттік маусымда тұрақты ойын көрсетіп, конференцияда жеңіске жетуіне не әсер етті деп ойлайсыз?
– Ең басты фактор – жүйелі жұмыс. Біз жобаны бір маусымға емес, ұзақ мерзімді жоспарға құрдық. Ойыншылар арасындағы сенім, бапкерлік штабтың үйлесімді еңбегі және басшылықтың қолдауы үлкен рөл атқарды. Әркім өз міндетін нақты түсініп, бар ынтасымен жұмыс істеді.
– Финал Алматыда өтеді. Бейтарап алаңда ойнау «Жайық» үшін қаншалықты маңызды және нәтижеге қалай әсер етуі мүмкін?
– Финал – әрқашан ерекше матч. Бейтарап алаңда бәрі дайындыққа байланысты. Біз қарсыласқа құрметпен қараймыз, бірақ өз күшімізге сенеміз. Көрермен тамаша, тартысты ойын көреді деп ойлаймын. Психологиялық және тактикалық тұрғыдан кім жақсы дайындалса, сол жеңіске жетеді.
– «Астана Ж» 20 ойында 120 гол соқты. Бұл өте жоғары көрсеткіш. Олардың шабуылын тоқтату үшін қандай тактика қарастырылуда?
– Біз олардың ойынын мұқият талдадық. Бұл – шабуылда белсенді, өте қарқынды команда. Бірақ біздің де өз жоспарымыз бар. Ең бастысы – мығым ойнап, қарсыласқа өз үстемдігін орнатуға мүмкіндік бермеу. Біз бұл сынаққа дайынбыз.
– Сіздің ойыңызша, алдағы финалда «Жайықтың» басты артықшылығы неде?
– Біздің басты артықшылығымыз – ұжымдық рух пен соңғы минутқа дейін күресуге дайын болуымызда. Әр ойыншы қасындағы серігі үшін барын салып ойнайды. Бізде бірлік пен жеңіске деген зор ынта бар. Бұл – біздің ең басты күшіміз.
– Бұл жеңіс клуб пен бүкіл аймақ үшін нені білдіреді?
– Бұл Батыс Қазақстан облысы үшін тарихи оқиға болар еді. «Жайық» – өңірдің символы. Финалдағы жеңіс көптеген адамның еңбегінің нәтижесі болмақ. Ол жастарға шабыт беріп, спорт инфрақұрылымының дамуына серпін береді және өңір үшін жаңа кезеңнің бастауына айналады.
– Клубтың алдағы жылдарға арналған стратегиялық мақсаттары қандай?
– «Жайық» клубының дамуы – кешенді және жүйелі жұмыс. Біз барлық бағытта ілгерілеуді көздеп отырмыз: инфрақұрылымды жетілдіру, академияны дамыту және негізгі команданы күшейту. Басты мақсат – өңір жастарының әлеуетін ашуға және кәсіби деңгейге көтерілуіне мүмкіндік жасау. Бүгінде «Жайық» академиясында төрт жас санаты бойынша 150-ге жуық жас футболшы жаттығады. Біз олардың күн сайын дамып, өз күшіне деген сенімі артқанын байқап отырмыз. Келесі жылы академияны кеңейтіп, жас топтарын көбейтіп, ойыншылар санын 400-ге дейін жеткізуді жоспарлап отырмыз. Ең бастысы – «Жайықтың» тұрақтылығы, кәсіби көзқарасы және ұйымшыл футбол отбасы ретінде үлгі бола білуі.