6 қазанда футболдан әйелдер арасындағы ел чемпионатының 25-тур ойындары өтті. Чемпиондыққа талас жүргізіп жатқан командалар бұл турда қарсыластарын ірі есеппен жеңді.
Тур нәтижелері
«БИІК-Шымкент» – «Қайрат» – 9:0
«Астана» – «Қызылжар» – 0:1
«Ақтөбе» – «Жетісу» – 14:0
«Оқжетпес» – «Жеңіс» – 1:13
«Ұлытау» – «Томирис-Тұран» – 0:0
«Елімай» – «Атырау» – 4:1
«Тобыл» – «Қайсар» – 0:3
Турдың шымылдығы Шымкентте түрілді. Жергілікті БИІК командасы «Қайратты» қабылдады. «Оңтүстік аруларының» чемпион атануға әлі де мүмкіндіктері бар. Бірінші таймда қонақтар қақпасына алты гол соққан БИІК, үзілістен кейін тағы үш мәрте көзге түсті. Қорытынды есеп – 9:0. Кездесуде лиганың үздік сұрмергені Гүлнара Габелия покер жасады.
Астанада өткен «Астана» мен «Қызылжар» арасындағы ойында жалғыз гол бәрін шешті. Петропавлдық команда бірінші таймның соңында есеп ашып, 1:0 есебімен жеңіске жетті. Осылайша турнир кестесінде төртінші орынға көтерілді.
«Ақтөбе» «Жетісумен» кездесуге дейін өздерінің басты бәсекелесі жеңіске жеткенін білді. Сондықтан көшбасшылықты қайтару үшін олар тек жеңіс қажет еді. «Қызыл-ақтар» бірден шабуылға кірісіп, 20-минутқа дейін Айда Гайстенова хет-трик жасап үлгерді. Ойын соңына дейін алаң иелері басымдығын күшейтіп, есеп 14:0 болды. Гайстенова покер, Наталья Нұрмиева хет-трик жасаса, Алина Литвиненко бес гол соғып, кездесудің ең нәтижелі ойыншысы атанды. Осылайша ол да Габелиямен бірге сұрмергендер тізімінде (69 гол) көш бастады.
Көкшетаудағы «Оқжетпес» пен «Жеңіс» арасындағы ойында да 14 гол тіркелді. Астаналық команда 13:1 есебімен жеңді. «Жеңіс» сапынан Мадиана Аманжолова хет-трик жасады.
Жезқазғандағы «Ұлытау» мен «Томирис-Тұран» арасындағы матч әйелдер футболында сирек кездесетін 0:0 есебімен аяқталды. Қонақтар сапынан Марта Аппиа алаңнан қуылып, ойын он ойыншымен жалғасты.
«Елімай» өз алаңындағы соңғы ойында жанкүйерлерін қуантып, «Атырауды» 4:1 есебімен тізе бүктірді.
Ал Қостанайда «Тобыл» «Қайсарға» 0:3 есебімен жол берді. Осы жеңістің арқасында қызылордалық клуб турнир кестесінде қостанайлықтардан озып кетті.
26-тур ойындары
«Қызылжар» – «БИІК-Шымкент»
«Ақтөбе» – «Астана»
«Қайсар» – «Жетісу»
«Томирис-Тұран» – «Елімай»
«Атырау» – «Оқжетпес»
«Қайрат» – «Ұлытау»
«Жеңіс» – «Тобыл»
Әйелдер лигасының соңғы, 26-тур ойындары 12 қазан, жексенбі күні өтеді. Дәл сол күні 2025 жылғы Қазақстан чемпионы анықталады.