«Тараз» футбол клубының жартылай қорғаушысы Диас Аңдырмаш KFF League сайтына сұхбат беріп, командадағы көңіл-күй мен медиафутболдағы тәжірибесі туралы әңгімеледі.
– Диас, чемпионаттың соңғы екі туры алдында командадағы көңіл-күй қалай?
– Бәрі жақсы, көңіл-күйіміз тамаша. Біз маусымды жоғары деңгейде аяқтау үшін қалған ойындарда жеңіске жеткіміз келеді.
– Маусымның екінші айналымын «Тараз» сәтті өткізді деуге болады. Қазірдің өзінде алты жеңіске қол жеткіздіңіздер. Келесі жылы клуб Премьер-лигаға оралуға үміткер бола ала ма? Команда ішінде бұл туралы сөз қозғала ма?
– Иә, екінші айналым біз үшін сәтті өтті. Бұл көбіне дұрыс жасалған трансферлердің нәтижесі деп ойлаймын. Меніңше, ҚПЛ-ға шығатын уақытымыз келді. Әрине, команда ішінде мұндай әңгіме жиі қозғалады.
– Сіз «Таразға» шілде айының ортасында қосылдыңыз, бірақ негізгі құрамнан тұрақты орын ала алмадыңыз. Бар болғаны бір ойында қосалқы құрамнан шығып, гол соққаныңызды білеміз. Алаңға сирек шығуыңыздың себебі неде деп ойлайсыз?
– «Таразға» ауысқан соң алдымен бабымды қайта қалпына келтіруге тырыстым. Кейін ұсақ жарақаттар ойынға кедергі болды. «Түркістанға» қарсы матчтан бастап дайын едім, бірақ бапкерлік штаб өз шешімін қабылдады.
– Сіздің спорттық жолыңыз өзгеше. Жыл басында медиалигада ойнап, кейін кәсіби клубқа қайта оралдыңыз. Осы туралы айтып берсеңіз?
– Иә, маусым басында жарақатыма байланысты ешбір клубпен келісімге келе алмадым. Сол уақытта SD Family командасына көмектесіп, Ресей медиалигасында ойнадым. Сол жердегі ойынымнан кейін бірінші айналымнан соң «Тараз» шақырды.
– Медиафутбол мен кәсіби футболды салыстырғанда басты айырмашылықтары қандай?
– Қазір медиафутболдың кәсіби футболдан айырмашылығы азайып келеді. Ресейдің медиалигасы Қазақстанның Бірінші лигасымен деңгейлес, тіпті кейде жоғары да болып жатады.
– Ал болашағыңызды қайсымен байланыстырасыз?
– Өзімді кәсіби футболшы ретінде көремін.