Футболдан әйелдер арасындағы ел біріншілігінің 25-турында «Қызылжар» сырт алаңда «Астананы» 1:0 есебімен жеңді. Матчтан кейін петропавлдық клубтың жартылай қорғаушысы Диана Жақсыбекова KFF League сайтына сұхбат беріп, ойыны туралы пікірін білдірді.
– Диана, жеңісіңізбен құттықтаймыз! Ойын жайлы аз-кем айтып өтсеңіз.
– Көп рахмет. Ойын үшін бүкіл командаға алғыс айтқым келеді. Қыздар жақсы ойнап, жеңіс үшін барын салды. Иә, кейбір сәттерде бапкердің тапсырмасын толық орындай алмадық. Өз мүмкіндіктерімізді тиімді пайдалана алмасақ та, ең бастысы – жеңіске жеттік.
– Сіздер матчқа небәрі 11 ойыншымен шықтыңыздар. Бұған не себеп болды?
– Кейбір қыздарымыз ескерту санына байланысты алаңға шыға алмады. Сол себепті кездесуге толық құраммен қатыса алмадық. Сондықтан бір құраммен толық ойнап шығуға тура келді.
– Тың ойыншыларсыз, бастапқы құраммен ойнау қаншалықты қиын болды?
– Әрине, оңай болған жоқ. Бұл әрі психологиялық, әрі физикалық тұрғыдан қосымша жүктеме. Бізде небәрі бір ғана ауысым болды, сондықтан демалыссыз ойнауға тура келді.
– «Қызылжар» чемпионаттың аяқталуына бір тур қалғанда турнир кестесінде төртінші орынға көтеріліп, «Қайратты» артта қалдырды. Мұндай нәтижені күттіңіздер ме?
– Шынымды айтсам, бастапқыда қола медаль үшін күрескіміз келді, бірақ сәл жетпей қалды. Дегенмен төртінші орын – жақсы нәтиже деп ойлаймын. Бұл біз үшін қуанышты жетістік.
– Жалпы маусымға қандай баға берер едіңіз?
– Бұл біздің командамыздың алғашқы маусымы, соған қарамастан лайықты ойын көрсете алдық. Биыл чемпионатқа алғаш рет 16 клуб қатысты, бәсекелестік деңгейі артты. Сол жағдайда біз жақсы нәтиже көрсеттік деп есептеймін. Маусым бойы жоғары орындарға таласатын мінезімізді, командалық рухымызды дәлелдеп, лайықты орнымызды иелендік.