4 қазанда Қызылордада «Ордабасы» мен «Тобыл» клубтары Olimpbet Қазақстан кубогын сарапқа салады. Финал қарсаңында шымкенттік команданың техникалық директоры Мұзаффар Абдулсатаров KFF League сайтына сұхбат беріп, алдағы ойынға қатысты пікірін білдірді.
– «Ордабасы» биылғы маусымда ҚПЛ-дағы чемпиондық бәсекеден шығып қалды. Осы тұрғыдан алғанда, Қазақстан кубогын жеңіп алудың клуб үшін маңызы қандай?
– Кез келген атақ – беделді әрі маңызды. Әсіресе маусым басында команда 80–85 пайызға жаңарғанын ескерсек, кубок финалына шығудың өзі үлкен жетістік. Биыл біз болашақта сапалы, бәсекеге қабілетті команда құру үшін маңызды қадам жасадық. Әрине, бір-екі маусымға ғана нәтиже беретін жолды таңдауға болар еді, бірақ біздің мақсат – «Ордабасының» алдағы жылдары да тұрақты түрде көшбасшылар қатарынан көрінуіне берік негіз қалау. Финалда жанкүйерлерді қуанту үшін бар күшімізді саламыз.
– «Тобыл» тұрақты ойынымен ерекшеленіп, чемпиондыққа таласын жалғастыруда. Қарсыластың қандай мықты тұстарын атар едіңіз? «Ордабасы» қалай жеңіске жете алады?
– Қарсыласқа құрметпен қараймыз. Олар маусым бойы тұрақты әрі сапалы ойын көрсетіп келеді. Сол себепті алтын жүлдеге басты үміткерлердің бірі екені заңды. Ал біз барынша жігерлі ойнап, соңына дейін күресуге дайынбыз. Кубок үшін барымызды саламыз.
– Сіздіңше, бейтарап алаң артықшылық бере ме, әлде керісінше қиындық туғыза ма?
– Қазақстан футбол картасында жаңа заманауи стадионның пайда болғаны қуантады. Бұл – жалпы отандық футбол үшін жақсы нышан. Мұндай маңызды ойынды дәл осы аренада өткізу біз үшін мәртебе. Ал бейтарап алаң екі командаға да бірдей, сондықтан бәрі ойыншылардың физикалық және психологиялық дайындығына байланысты болады.
– «Ордабасы» жанкүйерлерінің қолдауы әрдайым ерекше. Қызылордада да көптеп жиналады деп сенесіз бе?
– Менің ойымша, біздің жанкүйерлер – Қазақстандағы ең үздіктердің бірі. Біз мұны әр матчта сезінеміз. Қызылордада да қолдаусыз қалмайтынымызға сенімдімін. Осыған байланысты клуб қала әкімдігімен бірлесіп, жанкүйерлердің финалға баруына жағдай жасайды. Олардың қолдауы шешуші рөл атқаруы мүмкін. Трибунадағы қуат футболшыларға қосымша күш береді.
– Қазақстан кубогындағы жеңіс командаға Еурокубокқа қатысуға мүмкіндік береді. Бұл фактор клубты қаншалықты ынталандырады?
– Қазақстандағы әр клубтың арманы – еурокубокқа шығу. Бұл – абырой ғана емес, елді халықаралық деңгейде танытатын үлкен жауапкершілік. Біздің де басты ынталандырушымыз осы. Финалда жеңіске жетсек, Еуропаға жол ашамыз. Сондықтан бұл біз үшін қосымша мотивация әрі айрықша мәнге ие.
