Астанада Қазақстан футбол федерациясының президенті Марат Омаровтың қатысуымен баспасөз мәслихаты өтті. Федерация басшысы жаңа маусымда Премьер-Лиганың құрылымында айтарлықтай өзгерістер жоспарланғанын және олардың жақын арада жүзеге асырылатынын мәлімдеді.
«Бұл бағытта әкімшілік шығындарды тиімді ету жұмыстары жүргізілді. Қажетсіз бюрократиялық құрылымдар мен делдалдар алынып тасталды. Бұған дейін Қазақстан футбол федерациясы мен Қазақстан кәсіпқой футбол лигасы арасында жарысты ұйымдастыру бойынша келісімшарт болған. Алайда бұл ұйым тиімді жұмыс атқара алмады, әсіресе қаржылық басқару және шығындардың ашықтығы мәселесінде.
Шығындарды оңтайландыру мақсатында жарыстарды ұйымдастыру дирекциясын құру шешімі қабылданды. Ол елімізде өтетін жарыстарды ұйымдастыру мен өткізудің негізгі міндеттерін атқарады. Қазақстан футбол федерациясының бұл құрылымы футбол клубтарының жарналарының тиімді жұмсалуын және ойындарды өткізуге бөлінетін қаражаттың мақсатты пайдалануын қадағалайды.
Қысқа мерзім ішінде дирекция қаражатты оңтайландыру арқылы футбол клубтарының жарнасын 10 пайызға төмендетті. Көпшілік үшін бұл айтарлықтай қолдау болды. Биылдан бастап бәс тігу компанияларының атаулары Қазақстан Премьер-Лигасының атауынан алынып тасталып, бірінші айналымға дейін чемпионат атаусыз өтетін болады. Біз екінші жартыжылдықта жаңа титулдық демеушіні жариялаймыз.
Сонымен қатар, футбол клубтарының қаржылық жүктемесін азайту мақсатында логистикаға қатысты шығындар оңтайландырылды. Үйдегі ойындарда төрешілерді қабылдау және орналастыру міндеті клубтардан алынды. Логистикалық шығындарды реттеу үшін біз Air Astana және Fly Arystan әуе компанияларымен келіссөздер жүргізіп жатырмыз. Бұл серіктестік командалар мен төрешілердің ұшу шығындарын төмендетіп, футбол клубтары мен Федерация үшін қаржылық жүктемені азайтады. Сонымен қатар, барлық қатысушылар үшін жарысты ұйымдастыруды тиімді әрі қолайлы етеді. Біз келіссөздердің табысты болатынына сенеміз және ұзақ мерзімді серіктестік қазақ футболына оң әсерін тигізеді деп күтеміз.
Біз уақытша жетістіктерге ұмтылмаймыз, біздің мақсат – тұрақты футбол экожүйесін құру. Бұл жүйе арқылы ойыншылар, клубтар, жанкүйерлер және серіктестер ортақ нәтиже үшін жұмыс істейтін болады. Қазақстан футболының жаңа деңгейге шығып, халықаралық аренада бәсекеге қабілетті болуы үшін реформа қажет. Сондықтан біз озық тәжірибені қолдана отырып, цифрлық технологияларды енгізіп, инвестиция тартып, барлық процестердің ашықтығын қамтамасыз ету арқылы реформаларды жалғастырамыз. УЕФА, мемлекет, жеке бизнес және футбол жанкүйерлерінің қолдауымен алға қойылған мақсаттарды орындай аламыз.
Қазақ футболы мықты болуға лайық! Біз жаңа шыңдарды бағындыру үшін барлық жұмысты атқарамыз!»
Қазақ футболы мықты болуға лайық! Біз жаңа шыңдарды бағындыру үшін барлық жұмысты атқарамыз!»
