2-3 қазан күндері футболдан Бірінші лиганың 24-тур ойындары өтеді. Тур қорытындысы бойынша Павлодардың Ertis командасы Премьер-лигаға жолдамасын ресми түрде қамтамасыз етуі мүмкін.
2 қазан
«Екібастұз» (Екібастұз) – SD Family (Астана)
Басталу уақыты: 16:00
Өтетін орны: «Шахтер» стадионы (Екібастұз)
Кездесулер тарихы:
Ойын саны – 3
«Екібастұздың» жеңісі – 3
SD Family-дің жеңісі – 0
Тең ойындар – 0
Шілденің басында өткен бірінші айналымдағы матчта «Екібастұз» сырт алаңда жеңіске жеткен болатын. Жалпы осы уақытқа дейінгі үш ойында да «кеншілердің» басымдығы байқалды. Қазіргі таңда «Екібастұз» астаналықтардан екі ұпайға және бір сатыға жоғары орналасқан. Барлық көрсеткіш бойынша алдағы кездесудің фавориті – алаң иелері. Дегенмен, SD Family қарсыластарынан есе қайтарып, жеңіске жетуді көздейтіні анық.
AKAS (Алматы) – «Оңтүстік» (Шымкент)
Басталу уақыты: 18:00
Өтетін орны: «Жас Қыран» стадионы (Алматы)
Кездесулер тарихы:
Ойын саны – 1
AKAS-тың жеңісі – 0
«Оңтүстіктің» жеңісі – 1
Тең ойындар – 0
Қос команда да турнир кестесінің бел ортасында орналасқан. Яғни, жетінші және сегізінші орындарды бөлісіп тұр. Ұпайлары тең болғанымен, алматылықтар қосымша көрсеткіш бойынша (гол айырмасы) алда келеді. Бірінші айналымда «Оңтүстік» өз алаңында AKAS-ты 2:0 есебімен жеңген. Екі ұжым да айтарлықтай өзгеріс жасай алмайды, сондықтан тартысты әрі нәтижелі футбол күтуге болады.
3 қазан
«Қайрат-Жастар» (Алматы) – «Каспий» (Ақтау)
Басталу уақыты: 16:00
Өтетін орны: Т. Сегізбаев атындағы академия стадионы (Алматы)
Кездесулер тарихы:
Ойындар – 14
«Қайрат-Жастардың» жеңісі – 4
«Каспийдің» жеңісі – 5
Тең ойындар – 5
Өткен турда «Каспий» негізгі мақсатына жетіп, ҚПЛ-ға жолдама алды. Енді олар Бірінші лиганың жеңімпазы ретінде жоғары лигаға оралуды қалайды. Сол үшін Алматыда жеңілмеуі керек. «Қайрат-Жастардың» турнир мотивациясы аз болғанымен, олар кез келген қарсыласқа қиындық тудыруға дайын. Айта кетсек, «Каспий» алматылық жастарға соңғы алты ойында жеңілмеген.
«Шахтер» (Қарағанды) – «Тараз» (Тараз)
Басталу уақыты: 15:00
Өтетін орны: «Шахтер» стадионы (Қарағанды)
Кездесулер тарихы:
Ойын саны – 72
«Шахтердің» жеңісі – 35
«Тараздың» жеңісі – 15
Тең ойындар – 22
Бұл кездесу Қарағанды клубы үшін аса маңызды. Өйткені олар «Алтаймен» бірге үшінші орынға таласуда. Ал бұл орын – Премьер-лигаға жолдама береді. «Тараздың» турнирлік мақсаты жоқ сияқты. Бірақ дәл осы еркіндік олардың жеңіске жетуге жетелейді. Соңғы жеті ойында жамбылдықтар алты рет жеңіске жетті. Оның үстіне, бірінші айналымда «Тараз» «Шахтерді» 4:0 есебімен тас-талқанын шығарған болатын.
«Жетісай» (Жетісай) – «Алтай» (Өскемен)
Басталу уақыты: 16:00
Өтетін орны: «Орталық» стадион (Жетісай)
Кездесулер тарихы:
Ойын саны – 4
«Жетісайдың» жеңісі – 1
«Алтайдың» жеңісі – 0
Тең ойындар – 3
«Алтайды» оңтүстікте қиын сапар күтіп тұр. Жергілікті «Жетісай» әлі де үшінші орынға таласу мүмкіндігіне ие. Бірақ жағдай өте қиын. Бұған қоса, «Жетісай» – «Алтайға» ыңғайсыз қарсылас саналады. Шығысқазақстандықтар бұл командадан әлі жеңіп көрген жоқ. Бірінші айналымда да «Алтай» өз алаңында 1:2 есебімен ұтылған.
Ertis (Павлодар) – «Хан-Тәңірі» (Алматы)
Басталу уақыты: 18:00
Өтетін орны: «Орталық» стадион (Павлодар)
Кездесулер тарихы:
Ойын саны – 2
Ertis-тің жеңісі – 2
«Хан-Тәңірінің» жеңісі – 0
Тең ойындар – 0
Бұл ойын Ertis үшін тарихи мүмкіндік бермек. Егер павлодарлықтар жеңіске жетсе, «Каспийден» кейін Премьер-лигаға жолдама алатын екінші команда атанады. Қағаз жүзінде павлодарлықтар фаворит саналады. Турнир кестесінде екі клуб арасында 39 ұпай және 10 орын айырмашылық бар. «Хан-Тәңірі» соңғы 13 турда жеңіске жете алмай, 12 рет ұтылып, бар болғаны бір ұпай ғана жинаған. Бұған қоса, Ertis биылғы маусымда алматылықтарды екі мәрте «құрғақ» есеппен ұтқан – 1:0 (Қазақстан кубогі), 2:0 (Бірінші лига). Сондықтан бұл жолы да павлодарлықтардың фаворит екені анық.
