27 және 28 қыркүйек күндері Қазақстан Премьер-лигасының 24-туры аясында алты матч өтеді. Спорт комментаторы Марғұлан Жақып KFF League сайтына осы турға қатысты өз болжамын ұсынды.
«Ұлытау» – «Атырау»
Жезқазғандықтар қатарынан үш ойында жеңілмей, маңызды ұпайларына қол жеткізіп алды. Ал «мұнайшылардың» жағдайы қиын. Бір аяғымен Бірінші лигада тұр. Сондықтан қонақта барын салып, «Ұлытаудан» жеңілмейді. Тіпті өз алаңында кеткен есесін қайтарып, жеңіске жетуі де бек мүмкін.
«Жеңіс» – «Тұран»
Елордалықтар түркістандықтардан 2023 жылдан бері жеңілмей келеді. Бірақ бас бапкерінің алаңның жиегінде бола алмауы бұл жолы әсер етуі мүмкін. Ал «Тұранға» ұпай ауадай қажет. Сондықтан қос клуб та гол соғатын секілді.
«Ақтөбе» – «Қызылжар»
«Ақ-қызылдар» еурокубок үшін барын салады. Ал қызылжарлықтардың тұрақсыз ойыны арқылы жиі ұпай жоғалтып жүр. Сондай-ақ ақтөбеліктер қатарынан төрт ойын «Қызылжарға» есе жібермеді. Сондықтан өз алаңында, сөзсіз, жеңіске жетеді. Бірақ кубоктың финалындағы нәтиже жоспарларын күл-талқан етуі мүмкін.
«Оқжетпес» – «Астана»
24-турдағы ең қызық ойындардың бірі болады. Елордалықтар үшін қалған үш ойын финалмен тең. Мәселені Алматыда шешу үшін оған дейінгі матчтарда ұпай жоғалтпауы керек. Сондықтан көкшетаулықтарды жеңуге тырысады. Бірақ соңғы төрт ойында сегіз гол өткізіп алды. Енді «Оқжетпес» те голсыз қалмайтын секілді.
«Елімай» – «Ордабасы»
Семейліктер қатарынан алты ойын жеңілмей келеді. Төртінші орынға талас та қызып тұр. Ал шымкенттіктер бар күшін ҚПЛ соңғы матчтарына емес, кубоктың финалына салатын секілді. Сондай-ақ қорғанысында да мәселе бар. Осыған байланысты «Елімай» өз алаңындағы матчта кемі екі гол соғады деп ойлаймын.
«Тобыл» – «Қайсар»
Математикалық тұрғыдан қостанайлықтарда көш басына шығатын мүмкіндік әлі бар. Ал қызылордалықтардың жағдайы аса мәз емес. Бірақ «Тобылға» қарсы қалай ойнау керектігін біледі. Оған соңғы төрт матчтың үшеуінде жеңіске жетуі дәлел. Алаң иелері үшін ыңғайсыз қарсыластардың бірі. Алайда Нұрбол Жұмасқалиевтің шәкірттері минималды есеппен болсын жеңіске жетеді.
«Қайрат» – «Жетісу»
Алматылықтардың күнтізбесі тығыз. Чемпиондар лигасындағы қиын ойындармен қатар ҚПЛ осы маусымы да аяқталуға жақындап, матчтардың маңыздылығы арта түсті. «Сары-қаралар» «Реалға» қарсы ойыннан кейін талдықорғандықтарды қабылдайды. Бұл жолы «Қайрат» бірінші кездесудегідей қателік жібермейтіні анық. Тең нәтиже қанағаттандырмайды. «Астана» да өкшелеп келеді. Сондықтан «Қайрат» жеңіске жетеді.