25-26 қыркүйек күндері футболдан Бірінші лиганың 23-тур ойындары өтеді. Бұл турда ҚПЛ-ға шығуға басты үміткерлер турнир кестесінің екінші жартысында орналасқан командалармен кездеседі.
25 қыркүйек
SD Family (Астана) – Ertis (Павлодар)
Матчтың басталуы: 15:00
Өтетін орны: «Шахтер» стадионы (Қарағанды)
Кездесулер тарихы:
Ойын саны – 2
SD Family-дің жеңісі – 0
Ertis-тің жеңісі – 2
Тең ойын – 0
23-тур ойындары елордадағы SD Family мен Ertis командаларының кездесумен басталады. Биылғы маусымда командалар осымен үшінші мәрте жолығады. Бұған дейінгі екі ойында да павлодарлықтар басым түскен. Алдымен Қазақстан кубогында 2:1 есебімен жеңіске жетсе, кейіннен чемпионатта 3:0 есебімен ұтқан. Сондықтан бұл ойында Ertis айқын фаворит саналады. Бірақ SD Family үшін де ұпай ауадай қажет. Себебі елордалықтар плей-оффқа түсіп қалудан қашу үшін жанталасып жатыр. Сондықтан астаналықтар оңай берілмесі анық.
«Оңтүстік» (Шымкент) – «Шахтер» (Қарағанды)
Матчтың басталуы: 16:00
Өтетін орны: «Намыс» стадионы (Шымкент)
Кездесулер тарихы:
Ойын саны – 1
«Оңтүстіктің» жеңісі – 0
«Шахтердің» жеңісі – 1
Тең ойын – 0
Бұл турда ең қиын қарсылас «Шахтерге» тап келді деп айтуға болады. Қарағандылықтар азулы ұжым «Оңтүстікке» қонаққа барады. Дегенмен, алғашқы ойында «Шахтер» 4:1 есебімен жеңгенін ескерсек, фаворит тағы да «кеншілер» болмақ. Сондай-ақ қарағандылықтар қатарынан алты матч бойы жеңілмей келе жатыр. Бірақ өткен турда «Оңтүстік» сырт алаңда «Қайрат-Жастары» командасын 3:0 есебімен жеңіп, сенсация жасаған еді. Бұл жолы да шымкенттіктер тосынсый жасай ала ма екен?
«Түркістан» (Түркістан) – «Екібастұз» (Екібастұз)
Матчтың басталуы: 16:00
Өтетін орны: Октябрь Жарылқапов атындағы стадион (Түркістан)
Кездесулер тарихы:
Ойын саны – 8
«Түркістанның» жеңісі – 1
«Екібастұздың» жеңісі – 3
Тең нәтиже – 4
«Түркістанның» Бірінші лигада қалуға аз да болса мүмкіндігі бар. Ол үшін өз алаңында «Екібастұзды» жеңуі қажет. Дегенмен қонақтарға да ұпай ауадай маңызды. Ал қонақтарға тең нәтиже де жеткілікті. Бір ұпай оларды біржола турнирден шығып қалу қаупінен сақтап қалады.
26 қыркүйек
«Жетісай» (Жетісай) – AKAS (Алматы)
Матчтың басталуы: 16:00
Өтетін орны: Орталық стадион (Жетісай)
Кездесулер тарихы:
Ойын саны – 1
«Жетісайдың» жеңісі – 1
AKAS-тың жеңісі – 0
Тең ойын – 0
Турнир кестесінің бел ортасында тұрған қос команда үшін бұл ойын алдында ешқандай қысым жоқ. Өйткені олар жеңсе де, жеңілсе де турнир кестесінде көтеріліп немесе төмен қарай құлдиламайды. Сондықтан матч еркін әрі көңілді өтуі ықтимал. Алғашқы ойында «Жетісай» сырт алаңда 1:0 есебімен жеңіске жеткен. Бұл жолы AKAS есе қайтара ала ма екен?
«Каспий» (Ақтау) – «Ақтөбе-Ж» (Ақтөбе)
Матчтың басталуы: 16:00
Өтетін орны: BS Arena (Ақтау)
Кездесулер тарихы:
Ойын саны – 3
«Каспийдің» жеңісі – 2
«Ақтөбе-Ж» жеңісі – 1
Тең ойын – 0
Турнир кестесінің көшбасшысы «Каспий» өз алаңында Бірінші лигада бірде-бір ойында жеңіске жетпеген аутсайдер «Ақтөбе-Ж» командасын қабылдайды. Ақтаулықтар ойынның айқын фавориті саналады. Соңғы екі кездесуде олар қарсыласының қақпасына 9 гол соғып, өздері бір ғана гол өткізген. Дегенмен, «Ақтөбе-Ж» бір кездері «Каспийді» ұтқанын ескерсек, алаң иелеріне сақ болған жөн.
«Алтай» (Өскемен) – «Хан-Тәңірі» (Алматы)
Матчтың басталуы: 16:00
Өтетін орны: Восток стадионы (Өскемен)
Кездесулер тарихы:
Ойын саны – 3
«Алтайдың» жеңісі – 1
«Хан-Тәңірінің» жеңісі – 2
Тең ойын – 0
Өткен турда «Хан-Тәңірі» 11 ойынға жалғасқан жеңіссіз сериясын аяқтап, SD Family-мен тең түскен еді – 1:1. Ал «Алтай» жоғары лигаға шығуды мақсат етіп отырғандықтан, өз алаңында тек жеңіс үшін ойнайтыны белгілі. Бірақ Алматы клубы Өскеменде де жеңіске жеткенін ұмытпаған жөн.
«Тараз» (Тараз) – «Қайрат-Жастар» (Алматы)
Матчтың басталуы: 18:00
Өтетін орны: Орталық стадион (Тараз)
Кездесулер тарихы:
Ойын саны – 8
«Тараздың» жеңісі – 4
«Қайрат-Жастардың» жеңісі – 4
Тең ойын – 0
Турдың қорытынды ойыны Таразда жергілікті команда мен «Қайрат-Жастар» арасында өтпек. Бұл жұптың ойындары әрқашан тартысты өтеді. Мәселен, 8 кездесудің бірде-бірі тең аяқталмаған. Екі команда да төрт реттен жеңіске жеткен. Бірінші айналымда алматылықтар 3:1 есебімен басым болған еді. Дегенмен, бұл жолы оларды айқын фаворит деу қиын, әсіресе өткен турда «жастар» өз алаңында «Оңтүстіктен» ірі есеппен жеңілгеннен кейін. Таразда жанкүйерлерді нағыз футболдық тартыс күтіп тұр!