Футболдан Бірінші лигада өнер көрсететін «Каспий» клубының шабуылшысы Мирас Тұрлыбек KFF League сайтына сұхбат беріп, ақтаулық клубқа ауысуы, сұрмергендер жарысындағы бәсекелестік және ҚПЛ-ға жолдама туралы ойын ортаға салды.
– Мирас, футболдағы жолың қалай басталды? «Каспийге» келгенге дейінгі негізгі кезеңдер қандай болды?
– Бәрі Павлодарда, алты жасымда басталды. 18 жасқа дейін қорғаушы болып ойнадым. Бірақ «Ертістің» дубль командасында Асхат Мұсатаев мені шабуылға қойып көрді. Бұл шешім көп нәрсені өзгертті. 2020 жылы клуб таратылған соң, бір жылдай клубсыз қалдым. Алайда 2021 жылдың басында Мұсатаев қайта шақырып, футболға оралдым.
– Биыл «Каспийге» ауысуыңа не түрткі болды?
– Павлодардағы жайлы ортадан кетіп, өзімді жаңа жерде сынайтын уақыт жеткенін түсіндім. Клуб басшылығымен алғашқы әңгімеден-ақ мұнда үлкен мақсат қойылғаны байқалды. Команда да сол міндетке сай жасақталған. Бұл – шешуші фактор болды.
– Бірінші лига мен ҚПЛ деңгейін қалай салыстырар едің?
– Шынымды айтсам, Бірінші лига тартысы жағынан ҚПЛ-ден кем түспейді. Әркім өзін көрсетіп, жоғарыға шығуға тырысады, сондықтан шиеленіс те, тосын нәтижелер де көп. Ал ҚПЛ-да алаң сапасы жоғары, ұлттық құрама деңгейіндегі футболшылар бар – бұл бірден сезіледі.
– Жаңа командаға бейімделу қалай өтті?
– Өте тез. Командада тамаша атмосфера бар. Алғашқы күннен-ақ жаттықтырушылар мен әріптестермен түсіністік орнады. Бәрі нәтижеге жұмылған.
– Қазір сен лиганың үздік сұрмергенісің. 20 ойында 21 гол соқтың. Бұл сен үшін нені білдіреді?
– Бұл – бүкіл команданың еңбегінің нәтижесі. Футбол – жеке адамның ойыны емес. Әр шабуылшының мақсаты – гол соғу, мен де осы міндетімді орындап келемін. Әр ойында командама пайдамды тигізгім келеді.
– Сен бойы ұзын (1 м 90 см) шабуылшысың. Мұндай артықшылықты алаңда қалай пайдаланасың?
– Бұл деректер допқа таласта да, пас беруде де көмектеседі. Әріптестеріңмен бір деңгейде ойнау үшін жоғарыда да, төменде де күресе алуың керек. Сондықтан әрдайым өзімді жетілдіріп, мүмкіндіктерімді арттыруға тырысамын.
– Қазіргі шабуылшы тек гол соғумен шектелмейді. Сен үшін әмбебап болу қаншалықты маңызды?
– Өте маңызды. Тек шабуылды түйіндеумен шектелуге болмайды. Қысым жасау, қозғалу, ашылу, пас беру – барлығы қажет. Әрине, гол соғу – бастысы, бірақ мен алаңның кез келген бөлігінде командаға көмектесуге тырысамын.
– Маусым соңына дейінгі жеке және командалық мақсатың қандай?
– Командалық мақсат – чемпиондық пен ҚПЛ-ға жолдама алу. Жеке мақсатым – нәтижемді сақтап, маусымды үздік сұрмерген ретінде аяқтау.
– Басқа клубтардан қызығушылық бар ма? Жоғары деңгейге қадам жасауға дайынсың ба?
– Қазір ол туралы ойлап жатқан жоқпын. Бар назарым – осы маусымда. Ең бастысы – «Каспиймен» маусымды абыройлы аяқтау.
– Биыл ҚПЛ-ға үш команда тікелей жолдама алады. Бұл жаңалық клуб ішінде қалай қабылданды?
– Ешқандай реакция болған жоқ. Себебі біз үшін бірінші турдан бастап мақсат айқын – тек бірінші орын болды. Қалғанының бәрі – жай ғана қосымша фактор.