2025 жылғы 12 қыркүйек күні Қазақстан футбол федерациясы Атқару комитетінің кезектен тыс отырысы өтті.
Күн тәртібінде 2025 жылғы маусымда Қазақстан Премьер-лигасы (ҚПЛ) мен Бірінші лиганың регламенттеріне өзгеріс енгізу, футзал бойынша регламенттерді бекіту және ұлдар мен қыздар арасындағы жасөспірімдер турнирлерін өткізу құқығын беру мәселелері қаралды.
Оған сәйкес, Атқару комитеті мынадай шешімдер қабылдады:
– 2025 жылғы маусымдағы Қазақстан Премьер-лигасы регламентіне өзгерістер енгізілді:
«Чемпионат қорытынды кестесінде 14-орынды иеленген клубтар ҚПЛ-нан шығып, 2026 жылғы маусымда Бірінші лига ойындарына қатысады».
«2025 жылғы маусымдағы Бірінші лигада 1, 2 және 3-орын алған клубтар 2026 жылғы маусымда ҚПЛ-ға қатысу құқығын иеленеді. Алайда бұл оған қатысушы клубтардың құрылымына кіретін және олардың жастар құрамалары саналатын командаларға берілмейді.
Егер 2025 жылғы Бірінші лигада 1-, 2- немесе 3-орынды ҚПЛ құрылымына кіретін немесе оның жастар командасы иеленсе, онда ҚПЛ-ға қатысу құқығы турнирлік кестеде кейінгі орын алған және ҚФФ-ның тиісті лицензиясын алған клубқа беріледі».
– 2025 жылғы маусымдағы Бірінші лига регламентіне өзгерістер енгізілді.
«2025 жылғы маусымдағы Бірінші лигада 1-, 2- және 3-орын алған клубтар 2026 жылғы маусымда ҚПЛ-на қатысу құқығын иеленеді. Бірақ мұндай құқық ҚПЛ құрылымына кіретін және олардың жастар командалары саналатын ұжымдарға берілмейді».
«Егер 2025 жылғы маусымдағы Бірінші лигада 1-, 2- немесе 3-орынды ҚПЛ құрылымындағы немесе жастар командасы иеленсе, онда ҚПЛ-ға қатысу құқығы кейінгі орынды иеленген басқа клубқа беріледі».