12-13 қыркүйек күндері футболдан Премьер-лиганың 23-тур ойындары өтеді. Спорт комментаторы Нұралы Алтынбек KFF League сайтына осы турға қатысты өз болжамын ұсынды.
«Атырау» – «Тобыл»
«Мұнайшылар» кейінгі жылдары қостанайлықтар үшін ыңғайсыз қарсыласқа айналды. Себебі, «Тобыл» сырт алаңдағы соңғы бес ойында тек бір мәрте ғана жеңіске жеткен. Бұған қоса, қостанайлықтардың бірнеше жетекші ойыншысы құрама сапында жарақат алып, командаға қосымша қиындық туғызды. Дегенмен дәл қазір «Тобыл» – чемпиондыққа басты үміткерлердің бірі. Сондықтан аутсайдерге қарсы ойында жеңіске жетуі тиіс.
«Қызылжар» – «Оқжетпес»
Соңғы турларда өз деңгейінде өнер көрсете алмай жатқан екі команданың кездесуі. Петропавлдықтар алты тур қатарынан жеңіске жете алмай келеді, әрі Қазақстан кубогынан шығып қалды. Ал көкшетаулықтар қатарынан үш ойында ұтылған болатын. Дегенмен 20-турда «Жетісуға» қарсы матчта талдықорғандықтардың қателігінен кейін жеңіс «Оқжетпеске» берілді. Қазіргі жағдайда екі командадан да көп гол күту қиын.
«Ордабасы» – «Жеңіс»
Маусым соңына қарай қарқынын үдеткен астаналықтар турнир кестесінде шымкенттіктерден жоғары тұр. Демченконың командасы түрлі тактиканы қолданып, қызықты ойын көрсетуде. Ал Мартин шәкірттері әлі тұрақты нәтижеге жете алмай келеді. Сондықтан бұл ойында «Жеңістің» жеңіске жету ықтималдығы жоғары. Бұған қоса, соңғы төрт айда бірде-бір рет ұтылмаған елордалықтардың Шымкентте сүрінуі екіталай.
«Тұран» – «Ұлытау»
Бұл кездесу қос команданың Премьер-лигада қалу-қалмауын шешетін маңызды матч болмақ. Түркістандықтар қорғанысқа сүйенгенімен, әзірге нәтиже шығара алмай жүр. Ал жезқазғандықтар тікелей бәсекелестеріне қарсы матчта әлі жеңілмеген. Бұл үрдіс жалғасып, «Ұлытау» жеңіске жетеді деп болжаймын.
«Қайрат» – «Ақтөбе»
Турдың басты ойыны. Мұндай деңгейдегі кездесуге болжам жасау оңай емес, өйткені мұнда тосын нәтижелер жиі тіркеледі. Өткен маусымда чемпион атанған «Қайрат» екі ойында да ақтөбеліктерден жеңілген айта кеткен жөн. Оның үстіне, «қызыл-ақтар» ертеңгі ойынның күнін ауыстыруға келіспегендіктен, алматылықтар негізгі құрамын шығармауы мүмкін. Меніңше, бұл ойында екі голдан кем соғылмайды.
«Астана» – «Елімай»
Семейліктер бес матч қатарынан жеңілмей келе жатыр. Команда көшбасшылары да жақсы формада. Ал елордалық клуб тұрақтылық танытпаса да, шабуылда әрқашан қауіпті. Нақты нәтижені болжау қиын, бірақ қос команда да кемінде бір голдан соғады деп ойлаймын.
«Жетісу» – «Қайсар»
Екі клуб та турнир соңында қауіпті аймақта қалуы ықтимал. Сондықтан әр ұпай олар үшін аса маңызды. Бұл ойында қатты тәуекелге бармай, тең нәтижеге разы болуы мүмкін.
