13-16 қыркүйек күндері футболдан Қазақстан Премьер-лигасының 23-тур ойындары өтеді. Жексенбі күні жанкүйерлерді «Қайрат» – «Ақтөбе» және «Астана» – «Елімай» арасындағы тартысты кездесулер күтіп тұр.
13 қыркүйек
«Атырау» (Атырау) – «Тобыл» (Қостанай)
Матчтың басталуы: 17:00
Өтетін орны: «Мұнайшы» стадионы (Атырау қ.)
Кездесулер тарихы:
Матчтар – 71
«Атыраудың» жеңісі – 17
«Тобылдың» жеңісі – 39
Тең ойын – 15
23-тур шымылдығын Атырауда «Атырау» мен «Тобыл» командалары ашады. Турнир кестесінде «мұнайшылар» әзірге соңғы орында келеді. Ал «сары-жасылдар» көш бастап тұр. Осыдан-ақ қай клубтың басым екенін байқауға болады. Дегенмен, қостанайлықтарға бұл ойында үш ұпай олжалау оңайға соқпас. Өйткені Виталий Жуковский шәкірттері кейінгі бес турда жеңілмей келеді. Мұндай көрсеткішпен үздік үштіктегі бірде-бір клуб мақтана алмайды. Демек, алаң иелері өз жанкүйерлерінің қолдауымен маусым фавориттерінің біріне лайықты қарсылық көрсетуі ғажап емес.
«Қызылжар» (Петропавл) – «Оқжетпес» (Көкшетау)
Матчтың басталуы: 17:00
Өтетін орны: «Қарасай» стадионы (Петропавл қ.)
Кездесулер тарихы:
Матчтар – 37
«Қызылжардың» жеңісі – 13
«Оқжетпестің» жеңісі – 16
Тең ойын – 8
23-турға жоспарланған Солтүстік дербиі тартысты өтпек. Петропавлдықтар кейінгі алты турда жеңіске жете алмай келеді. Ал кубокты қоса есептегенде, Милич Чурчич командасы қатарынан жеті матчта жеңілген. Көкшетаулықтар да соңғы екі ойында ұпайсыз қалды. Дегенмен, «Оқжетпес» «Қызылжарды» соңғы төрт ойында да жеңген. Былтырғы Петропавлдағы матчты да өз пайдасына шешкен.
«Ордабасы» (Шымкент) – «Жеңіс» (Астана)
Матчтың басталуы: 18:00
Өтетін орны: Қ.Мұңайтпасұлы атындағы стадион (Шымкент қ.)
Кездесулер тарихы:
Матчтар – 31
«Ордабасының» жеңісі – 11
«Жеңістің» жеңісі – 14
Тең ойын – 6
Қос ұжым турнир кестесінде қатар орналасқан. «Жеңіс» – жетінші, «Ордабасы» – сегізінші орында. Айырмашылық – үш ұпай. Дегенмен, екеуінің қарқыны әртүрлі. Шымкенттіктер әр турда әрқилы нәтиже көрсетсе, астаналықтар қатарынан 11 тур бойы жеңілмей келеді. Бұл – маусым рекорды. Бір қызығы, бұл сәтті серия дәл осы «Ордабасымен» өткен алғашқы кездесуден басталған. Дегенмен, елордалық команданың бас бапкері Андрей Демченко алдыңғы турдағы дербиде алаңнан қуылып, бұл матчқа қатыса алмайды. Бұл командаға қаншалықты керек әсер етуі мүмкін?
«Тұран» (Түркістан) – «Ұлытау» (Жезқазған)
Матчтың басталуы: 19:00
Өтетін орны: «Түркістан Арена» (Түркістан қ.)
Кездесулер тарихы:
Матчтар – 1
«Тұранның» жеңісі – 0
«Ұлытаудың» жеңісі – 1
Тең ойын – 0
Бұл кездесудің нәтижесі турнир кестесінің соңғы жағында орналасқан клубтарға қатты әсер етуі мүмкін. Екі команда да қазір қауіпті аймақта тұр. «Тұран» қазіргі сәтте «Ұлытаудан» екі ұпайға қалып келеді әрі бір матчты артық өткізген. Егер түркістандықтар бұл ойында жеңілсе, Премьер-лигада қалу мүмкіндігі тым төмендеп кетеді. Оның үстіне бірінші айналымда жезқазғандықтар өз алаңында «Тұранды» 2:1 есебімен жеңген.
14 қыркүйек
«Қайрат» (Алматы) – «Ақтөбе» (Ақтөбе)
Матчтың басталуы: 17:00
Өтетін орны: «Орталық» стадион (Алматы қ.)
Кездесулер тарихы:
Матчтар – 78
«Қайраттың» жеңісі – 36
«Ақтөбенің» жеңісі – 31
Тең ойын – 11
«Қайрат» пен «Ақтөбенің» дуэлі – қазақ футболындағы ең принципті кездесулердің бірі. Былтырғы маусымда «қызыл-ақтар» чемпионды екі ойында да жеңген жалғыз команда атанған. Ал биылғы алғашқы айналымда «Қайрат» сырт алаңда 2:1 есебімен жеңіске жетті. Сол ойында алматылықтар бір ойыншы аз болып ойнаса да, жеңісті жұлып алған еді. Бұл жолы да «Орталық» стадион аншлаг болады. Жанкүйерлерді ерекше футбол шоуы күтіп тұр.
«Астана» (Астана) – «Елімай» (Семей)
Матчтың басталуы: 19:00
Өтетін орны: «Астана Арена»
Кездесулер тарихы:
Матчтар – 5
«Астананың» жеңісі – 2
«Елімайдың» жеңісі – 1
Тең ойын – 2
Астанада тағы бір қызықты ойын өтеді. «Астана» мен «Елімайдың» бәсекесі аз уақыттың ішінде тартысты матчтардың біріне айналды. «Астана» соңғы екі ойында қарсыластарын 5:0 есебімен ұтқанымен, 2023 жылғы ойында семейліктер бір мәрте жеңіске жеткен. Бұл жолы кім үстем түседі екен?
16 қыркүйек
«Жетісу» (Талдықорған) – «Қайсар» (Қызылорда)
Матчтың басталуы: 15:00
Өтетін орны: «Жетісу» стадионы (Талдықорған қ.)
Кездесулер тарихы:
Матчтар – 55
«Жетісудың» жеңісі – 23
«Қайсардың» жеңісі – 19
Тең ойын – 13
23-турдың соңғы ойыны сейсенбі күні Талдықорғанда өтеді. Қос ұжым турнир кестесінде қатар тұр: «Жетісу» – тоғызыншы, «Қайсар» – оныншы орында. Айырмашылық – бір ұпай. Бірінші айналымдағы матч 2:2 есебімен тең аяқталған. Дегенмен, соңғы алты кездесуде «Жетісу» қызылордалықтарды жеңе алмай жүр. Бұл жолы алаң иелері жеңіссіз серияны тоқтата ала ма?