10-12 қыркүйек күндері футболдан Бірінші лига ойындарының 21-туры өтеді. Турдың орталық ойыны Ақтауда жергілікті «Каспий» мен Ertis (Павлодар) арасында өтпек. Турнир кестесінде «Каспий» көш бастап тұрса, Ertis ақтаулықтарды өкшелеп келеді.
10 қыркүйек
«Жетісай» (Жетісай) – «Қайрат-Жастар» (Алматы)
Матчтың басталуы – 16:00
Өтетін орны: «Орталық» стадион, Жетісай қаласы
Кездесулер тарихы:
Ойын саны – 3
«Жетісайдың» жеңісі – 1
«Қайрат-Жастардың» жеңісі – 2
Тең ойын – 0
Бұл турдың шымылдығы Жетісайда жергілікті «Жетісай» мен «Қайрат-Жастар» командалары арасындағы ойынмен ашылмақ. Екі ұжым да турнир кестесінің алғашқы бөлігінде орналасқан. Бұл ойында жеңіске жеткен команда «Шахтерге» (4-орын) жақындай түспек. Өткен маусымда екі команда голға бай кездесулер өткізген. Екі кездесуде барлығы 18 гол соғылған! Жетісайда алаң иелері 6:2 есебімен жеңіске жетсе, Алматыда «Жастар» қарымта қайтарып, 6:4 есебімен басым түскен-ді. Алайда биылғы алғашқы айналымда «Қайрат-Жастар» өз алаңында 1:0 есебімен жеңіске жеткен.
11 қыркүйек
«Оңтүстік» (Шымкент) – «Ақтөбе-Ж» (Ақтөбе)
Матчтың басталуы – 16:00
Өтетін орны: «Намыс» стадионы, Шымкент
Кездесулер тарихы:
Ойын саны – 3
«Оңтүстіктің» жеңісі – 2
«Ақтөбе-Ж»-дың жеңісі – 1
Чемпионат мәресіне таяған сайын «Ақтөбе-Ж» клубының жағдайы қиындай түсуде. Команда қазіргі таңда турнир кестесінің соңында орналасқан. Бірінші лигадағы орнын сақтап қалу мүмкіндігі азайып барады. Ал «Оңтүстік» клубының жағдайы жақсы. Олар турнир кестесінің ортасында орналасқан. Сондықтан бұл матч «қызыл-ақтар» үшін анағұрлым маңызды.
«Түркістан» (Түркістан) – «Хан-Тәңірі» (Алматы)
Матчтың басталуы – 16:00
Өтетін орны: О.Жарылқапов атындағы стадион, Түркістан
Кездесулер тарихы:
Ойын саны – 7
«Түркістанның» жеңісі – 0
«Хан-Тәңірінің» жеңісі – 5
Тең ойын – 2
Қазіргі таңда екі ұжым да турнир кестесінің төменгі жағында орналасқан. «Түркістанның» жағдайы аса мәз емес. Сондықтан оларға бұл ойында жеңіске жетіп, үш ұпай алу маңызды болып тұр. Бірақ тарихқа зер салар болсақ, алаң иелері «Хан-Тәңірін» әлі жеңбеген. Өткен маусымда алматылықтар екі ойында жалпы 9:0 есебімен ұтқан. Дегенмен, қазір «Хан-Тәңірінің» қарқыны бұрынғыдай емес. Олар кейінгі 10 матчта қатарынан жеңіліп жүр. Бұл ойында Түркістанның жеңіске жету мүмкіндігі жоғары болып тұр.
AKAS (Алматы) – «Шахтер» (Қарағанды)
Матчтың басталуы – 18:00
Өтетін орны: «Жас Қыран» стадионы, Алматы
Кездесулер тарихы:
Ойын саны – 1
AKAS-тың жеңісі – 0
«Шахтердің» жеңісі – 1
Екі ұжым арасындағы бірінші айналымда қарағандылықтар 4:2 есебімен жеңіске жеткен. Бірақ жеңіске жету «кеншілерге» оңайға соққан жоқ. Қарағандылықтар алматылық клубтың бір ойыншысы алаңнан қуылғаннан кейін ғана гол соғып, жеңісті жұлып алған еді. Бұл жолы алаң иелері қарымта қайтаруға тырысады, ал «Шахтерге» ұпай жоғалтуға болмайды.
12 қыркүйек
«Алтай» (Өскемен) – SD Family (Астана)
Матчтың басталуы – 15:00
Өтетін орны: «Восток» стадионы, Өскемен
Кездесулер тарихы:
Ойын саны – 3
«Алтайдың» жеңісі – 2
SD Family-дің жеңісі – 0
Тең ойын – 1
«Алтайға» турнир кестесінде екінші орынға жақындауға тамаша мүмкіндік туып тұр. Өйткені 21-турда көшбасшылар өзара кездесіп, кем дегенде біреуі міндетті түрде ұпай жоғалтуы ғажап емес. Сондықтан ШҚО клубы бұл мүмкіндікті тиімді пайдаланып, үш ұпайын олжалауға тиіс.
Алғашқы айналымда Вахид Масудов шәкірттері SD Family клубынан басым түскен. Ал екі команданың Өскемендегі жалғыз ойыны былтырғы тамызда өтіп, 2:2 есебімен тең аяқталған. Сондықтан «Алтай» футболшылары қарсыласын менсінбеуі тиіс.
Тур матчы
«Каспий» (Ақтау) – Ertis (Павлодар)
Матчтың басталуы – 17:00
Өтетін орны: BS Arena стадионы, Ақтау
Кездесулер тарихы:
Ойын саны – 9
«Каспийдің» жеңісі – 3
Ertis-тің жеңісі – 5
Тең ойын – 1
Бұл тек 21-турдың ғана емес, бүкіл маусымның шешуші ойыны болмақ. Қазір «Каспий» турнир кестесінде бірінші орында келеді. Ал Ertis ақтаулықтардан небәрі 2 ұпайға қалып тұр. Ақтаудағы соңғы екі ойында «Каспий» қарсыласын екі рет «құрғақ» есеппен жеңген. Наурыз айында Кубокта – 3:0, маусым айында чемпионатта – 2:0. Бұл жолы да алаң иелері жеңсе, бірінші орнын нақтылай түседі. Ал Ertis-ке де тек жеңіс қажет.
«Тараз» (Тараз) – «Екібастұз» (Екібастұз)
Матчтың басталуы – 18:00
Өтетін орны: «Орталық» стадион, Тараз
Кездесулер тарихы:
Ойын саны – 27
«Тараздың» жеңісі – 10
«Екібастұздың» жеңісі – 12
Тең ойын – 5
Қос команда турнир кестесінде 9 және 10-орындарды бөлісіп тұр (22 ұпайдан). Алғашқы айналымдағы ойында «Екібастұз» 4:1 есебімен жеңген. Дегенмен «кеншілер» қарсыластарын сырт алаңда да жиі жеңіп жүргенін ұмытпаған абзал. Мәселен, қонақтар Таразда өткен 13 матчтың 9-ында жеңіске жеткен.