«Қайрат» клубының жартылай қорғаушысы Әділет Сәдібеков KFF League-ке сұхбат беріп, Чемпиондар лигасындағы тарихи жеңістен кейінгі әсерімен бөлісті. Сондай-ақ ішкі чемпионаттағы ерекше маңызы бар кездесулер жайлы айтты.
– Әділет, бүкіл ел «Қайраттың» Чемпиондар лигасының негізгі кезеңіне шығуына әлі де қуанып жатыр. Алған әсеріңізді айтып берсеңіз?
– Шынымды айтсам, әлі де эмоциядан арыла алмай жүрмін. Бұл – клуб үшін де, бүкіл Қазақстан үшін де тарихи сәт. Үлкен қуаныш, бақыт. Ең бастысы – бәріміз бірге қол жеткізгеніміз қуантады.
– Осындай тарихи нәтижеден кейін Қазақстанда әрдайым бірінші болғыңыз келетін шығар?
– Әрине, мұндай жетістік футболға деген көзқарасты өзгертеді. Үнемі бірінші болғың келеді, межені биік қоясың. Мұндай сәттер ерекше эмоция сыйлайды, сол үшін одан да көп еңбек етуге тура келеді.
– «Селтиктен» кейін бірден Көкшетауда «Оқжетпеспен» кездесу күтіп тұрды. Бас бапкер Рафаэль Уразбахтин Чемпиондар лигасынан ҚПЛ-ге көңіл бөлу үшін командаға не айтты?
– Жаттықтырушымыз қарапайым, бірақ өте дұрыс сөз айтты: «Чемпиондар лигасы біз үшін қаншалықты маңызды болса, ҚПЛ де соншалықты маңызды». Еуропада ойнау үшін алдымен өз еліңде мықты болу қажет. Біз де мұны жақсы түсіндік. Чемпионаттағы әрбір жеңіс арманға бастайтын жол.
– Биылғы маусым басын өткен жылғы ауыр жарақаттың кесірінен өткізіп алдыңыз. Бірақ қатарға оралған алғашқы ойында бірден капитан ретінде алаңға шықтыңыз. Бұл сіз үшін қаншалықты маңызды әрі тосын жағдай болды ма?
– Жарақат алған сәтімде де капитан едім. Сондықтан қайта келіп, тағы да капитандық белгімен шығу – мен үшін қалыпты жағдай болды. Дегенмен ұзақ қалпына келуден кейін команданың сенімі мен жауапкершілігін қайта сезіну – ерекше әсер сыйлады.
– «Қайратта» капитан кім болатынын бапкерлер ме, әлде ойыншылар таңдай ма?
– Әдетте шешімді бапкерлік штаб қабылдайды.
– Сіз Ақтөбенің тумасысыз, бірақ алматылық клубтың түлегісіз әрі дәл қазір «Қайраттың» намысын қорғап жүрсіз. Ал туған қалаңыздағы жақындарыңыз кімге жанкүйер?
– Жақындарым толығымен мені қолдайды. Олар Ақтөбеден болса да, тек маған және «Қайратқа» жанкүйер. Олар үшін маңыздысы – менің алаңда болып, нәтиже көрсетуім.
– Ал өзіңіз «Қайрат» пен «Ақтөбе» арасындағы тартысқа қалай қарайсыз? Қазақ футболындағы ең басты қарсыластардың бірі саналады ғой.
– Иә, менің командадағы әріптестерім үшін бұл әрдайым өте принципті кездесу. Оны жақсы сезінемін. Бұл тартысты құрметтеймін және командамен бірге қабылдаймын. Алаңда біз үшін бастысы – мінез көрсетіп, нәтижеге қол жеткізу.