Премьер-лига ойындарының 22-турында Қостанайдың «Тобылы» өз алаңында Түркістанның «Тұран» клубын қабылдап, 2:0 есебімен жеңіске жетті. Сол кездесуде алаң иелерінің жартылай қорғаушысы Александр Зуев мергендігімен көзге түсіп, командасының жеңісіне сүбелі үлес қосты.
Ойыннан кейін Александр Зуев KFF League сайтына сұхбат беріп, «Тобылдың» соңғы ойындары, сондай-ақ Қазақстан ұлттық құрамасының 2026 жылғы әлем чемпионатының іріктеу кезеңіне арналған қыркүйектегі матчтарының қорытынды тізіміне енбей қалған кездегі әсері туралы ой бөлісті.
– Александр, соңғы күндеріңіз тосын оқиғаларға толы болды. Әуелі, «Тұранға» гол соғып, «Тобылды» чемпионаттың ықтимал көшбасшысы еткеніңіз үшін құттықтаймыз. Сол сәтте қандай сезімде болдыңыз?
– Көп рақмет, өте қуанышты сәт болды. Жүрегім жылып, ерекше әсер алдым. Футболшы үшін командаға пайда тигізіп, жеңіске үлес қосу – әрқашан ең бақытты сәттердің бірі. Өйткені біз осы үшін өмір сүріп келеміз.
– Дегенмен, араға бірнеше күн салып, Қазақстан ұлттық құрамасының 2026 жылғы әлем чемпионатының іріктеу кезеңіндегі қыркүйек айына жоспарланған матчтардың қорытынды тізіміне енбей қалғаныңызды білдіңіз. Бұл жаңалық сізге ауыр тиді ме, әлде мұндайды алдын ала сездіңіз бе?
– Әрине, көңілім түсті. Бірақ бұл – өзімді әрі қарай дамытуға тиіспін дегенді білдіреді. Көбірек еңбектеніп, жақсы ойнау қажет. Барлығы соған байланысты.
– Сіз – Қостанайдың тумасысыз. Туған қалаңызға ұзақ жылдан кейін қайта оралдыңыз. «Тобыл» жанкүйерлерімен ортақ тіл табу қиын болған жоқ па?
– Жоқ, бейімделуім тез өтті. Маған мұндағы орта жақын әрі таныс. Айта кету керек, мен болмаған жылдары Қостанай қатты өзгеріпті, айтарлықтай көркейген. Қала қарқынды дамып жатыр: жаңа ғимараттар, көрікті орындар көбейген. Бұл, әрине, қуантады.
– Өзіңізді алаңдағы қай позицияда ыңғайлы сезінесіз? Міндеттеріңіз қандай? Кейде сізді еркін футболшы ретінде көреді, тіпті бас бапкер Нұрбол Жұмасқалиев толық еркіндік береді деген пікір бар. Бұл қаншалықты рас?
– Сырттай солай көрінуі мүмкін. Бірақ әр ойынға Нұрбол Жәрдемұлы нақты тапсырма береді, біз соны орындауға тырысамыз. Егер бапкер сені белгілі бір позицияда ойнауға қойса, онда міндетті түрде сол жерде ойнауың керек.
– «Тобыл» Кубоктың финалына шықты. Демек, маусым соңында команда алдында маңызды әрі күрделі екі міндет тұр. Ұжым екеуін де сәтті орындауға дайын ба?
– Дұрыс айтасыз, міндет оңай емес. Бірақ біз чемпионатта да, Кубокта да соңына дейін күресеміз. Бас бапкердің жетекшілігімен команда өңіріміздің, Қостанай қаласының намысын қорғауға дайын.
– Ал сіз үшін қайсысы маңыздырақ – Кубоктағы жеңіс пе, әлде Премьер-лигада ма?
– Мен үшін екеуі де бірдей құнды. Көбірек жүлде алып, жанкүйерлерімізді қуантқым келеді.
