SD Family клубының футболшысы Қуандық Бекенов KFF-League сайтына сұхбат беріп, өзі туралы, клубқа қалай келгені және футболдағы арманы туралы әңгімелеп берді.
Қарапайым ауыл жігітінің өмірі әп-сәтте өзгеріп шыға келді. Футболда арнайы білімі болмаса да, Бірінші лига клубымен кәсіби келісімшартқа қол қойды. Ал елордалық команда Президенттің өңірлердегі талантты жастарды іздеу жөніндегі бастамасын сөз жүзінде емес, іс жүзінде жүзеге асырып келеді.
– Қуандық, өзің жайлы қысқаша айтып өтсең. Қай өңірденсің, қай позицияда ойнайсың?
– Мен 1996 жылы Абай облысы, Мақаншы ауданына қарасты Қарабұлақ ауылында дүниеге келгенмін. Алаңда сол қапталдағы жартылай қорғаушы болып ойнаймын.
– Ал SD Family клубына қалай келдің?
– Аудандық турнирде менің ойынымды Дидар Сыдықбек (SD Family басшысы – ред.) көріп, ұсыныс жасады. Сол арқылы клубқа келдім. Мұнда келгеніме өте қуаныштымын, қойылған талаптардың бәрін орындап жатырмын. Физикалық және психологиялық тұрғыдан дайынмын. Бірінші лигада ойнағым келеді.
– Кәсіби футболдағы алғашқы әсеріңмен бөліссең.
– Шынымды айтсам, бұл жерге кәсіби футболшы ретінде келемін деп ойлаған жоқпын. Ұсынысты естігенде қатты қуандым. Шақырғаны және мүмкіндік бергені үшін Дидарға үлкен алғыс айтамын! Енді өзімді көрсету үшін еңбектеніп, барымды саламын.
– Бірінші лига командасының талаптарына психологиялық әрі физикалық тұрғыдан дайынмын деп ойлайсың ба?
– Иә, толық дайынмын деп ойлаймын!
– Жыл басында кәсіби клубпен келісімшартқа отырамын деп тіпті ойламаған да шығарсың. Демек, өмірде мүмкін емес нәрсе жоқ. Үлкен футболдағы арман-мақсатың қандай?
– Ең бірінші мақсатым – SD Family командасының негізгі құрам ойыншысы атану. Одан кейін, егер бәрі жақсы болып жатса, Қазақстан ұлттық құрамасында ойнағым келеді.