11-12 тамыз күндері футболдан әйелдер арасындағы ел чемпионатының 17-тур ойындары өтті. Турнир кестесінің көшбасшылары – БИІК-Шымкент пен «Ақтөбе» қарсыластарын ірі есеппен жеңді.
Ойын нәтижелері:
«Астана» – «Оқжетпес» – 8:1
«Атырау» – «Жеңіс» – 1:5
«Қайрат» – «Жетісу» – 3:1
«Қызылжар» – «Тобыл» – 4:0
«Ақтөбе» – «Ұлытау» – 7:0
«Томирис-Тұран» – «Қайсар» – 5:2
«Елімай» – БИІК-Шымкент – 1:7
17-турдың алғашқы ойыны елордада «Астана» мен «Оқжетпес» арасында өтті. Алаң иелері турнир кестесінің соңында тұрған қарсыласына аяушылық танытпай, ірі есеппен тізе бүктірді. «Астана» ойыншылары бірінші таймда үш гол соқса, екінші таймда қарқынын арттырып, тағы бес мәрте «Оқжетпес» қақпасына дәл көздеді. Адина Бейбіт пен Ажар Шүкетаева дубль авторы атанды. Матч соңында қонақтар жалғыз жұбаныш голын соқты – 8:1.
«Жеңіс» сырт алаңда «Атыраумен» кездесіп, 5:1 есебімен жеңіске жетті. Бірінші таймда алаң иелері елордалықтарға лайықты қарсылық көрсеткенімен, ары қарайғы уақытта шамалары жетпеді. Бұл «Жеңістің» кейінгі жеті турдағы алтыншы жеңісі.
Жүлделі орындардан үмітті «Қайрат» өз алаңында «Жетісуды» сенімді түрде жеңді – 3:1. Екінші таймда алаңға шыққан Аяжан Қожабекова дубль авторы атанып, командасына маңызды жеңіс сыйлады.
Бұл турда «Қызылжар» қатарынан үшінші жеңісіне қол жеткізді. Сондай-ақ соңғы үш ойында да қақпасына бірде-бір гол өткізген жоқ. Бұл жолы петропавлдықтар өз алаңында «Тобылдың» қақпасына жауапсыз төрт гол соқты.
«Ақтөбе» өз алаңында «Ұлытауды» қабылдап, 7:0 есебімен ойсырата жеңді. Бір қызығы, команданың үздік сұрмергені Алина Литвиненко мергендігімен көзге түсе алған жоқ. Дегенмен кезекті үш ұпайын олжалаған алаң иелері ұпай саны бойынша БИІК-пен теңесті.
Қызылорданың «Қайсары» бір апта ішінде екі ойын өткізіп, екеуінде де жеңілді. Алдымен «Ақтөбеден» ірі есеппен ұтылса, кейіннен «Томирис-Тұранға» да есе жіберді. Түркістандық команда қарсыласын өз алаңында 5:2 есебімен жеңді.
Турдың соңғы ойыны Семейде «Елімай» – БИІК-Шымкент командаларының арасында өтті. Алаң иелері ойынның алтыншы минутында есеп ашқанымен, үзіліске дейін шымкенттіктер таразы басын теңестіріп қана қоймай, алға шықты. Екінші таймда БИІК-тің басымдығына күмән қалмады. Қонақтар 7:1 есебімен жеңіске жетті. БИІК-тің шабуылшысы Лагоали Присцилла Крето хет-трик жасады. Лиганың үздік сұрмергені Гүлнара Габелия бір голмен көзге түсті. Осылайша БИІК турнир кестесінде ұпай саны бойынша «Ақтөбемен» теңесіп, гол айырмашылығының арқасында бірінші орынға көтеріліп алдыді. Дегенмен «қызыл-ақтардың» еншісінде ойналмаған бір матч бар екенін ескерген жөн.
Әйелдер лигасының 18-тур ойындары 18 тамызда өтеді.