ҚФФ Бақылау, тәртіптік және әдеп комитетінің шешімдері
Бақылау, тәртіптік және әдеп комитеті төмендегі өтініштерді қарап, чемпионат регламентінің бұзылғанын анықтады.
1. 2025 жылғы футбол маусымындағы Қазақстан Республикасы чемпионатының 20-турындағы «Оқжетпес» – «Жетісу» және «Жеңіс» – «Қайрат» командалары арасындағы ойындардың төрешілер есебі;
2. Ақмола облысы дене шынықтыру және спорт басқармасы жанындағы «Оқжетпес» футбол клубы» ШЖҚ МКК директоры М. Тілешовтың (шығыс №01-17/505, 11.08.2025 ж.) өтініші;
3. 2025 жылғы 7 тамызда өткен Қазақстан Республикасы футболдан Екінші лига клубтары арасындағы біріншіліктің «Солтүстік-Шығыс» конференциясы, 16-турдағы «Елімай Ж» – «Жеңіс Ж» матчының инспектор есебі.
1. «Оқжетпес» – «Жетісу» матчындағы ереже бұзу фактісі
Регламенттің 6.56-тармағына сәйкес, бір турда бір ойыншының әртүрлі клуб сапында өнер көрсетуіне тыйым салынады.
Ойыншы Нұрбол Әнуарбеков 2025 жылғы 9 мамырда өткен 20-турдың кейінге шегерілген «Жеңіс» – «Қайрат» матчында және 11 тамызда өткен 20-турдағы «Жетісу» – «Оқжетпес» матчында алаңға шыққан. Бұл – ереже бұзу.
Регламенттің 6.119-тармағына сәйкес, ойыншыларды матчқа қатыстыруға клубтардың өздері жауапты.
Шешім: жоғарыда аталған матчтың нәтижесін жойып, «Жетісу» командасына 0:3 есебімен техникалық жеңіліс беру.
2. «Елімай Ж» – «Жеңіс Ж» матчындағы ереже бұзу фактісі
2025 жылғы 7 тамызда өткен Екінші лиганың «Солтүстік-Шығыс» конференциясындағы 16-турда матч инспекторының есебі бойынша, «Елімай Ж» клубының ойыншысы Төлеухан Еділдің заңсыз қатысқаны анықталды.
Шешім: жоғарыда аталған матчтың нәтижесін жою және «Елімай Ж» командасына 0:3 есебімен техникалық жеңіліс беру.
Қосымша
Барлық клуб ойыншыларды қатыстыру мәселелері бойынша тұрақты түрде Дирекция қызметкерлерінен кеңес алып отырады. Дирекция әрбір сұрауға толық әрі нақты нұсқаулық береді. Алайда, осы жағдайларда «Жетісу» клубынан ешқандай жазбаша да, телефон арқылы да өтініш немесе сұрау түскен жоқ.
Өткен жылдардағы ұқсас жағдайлар:
· 2023 жыл – бір турда бір ойыншының әртүрлі клуб сапында ойнауы. XIX турдағы «Қайрат» – «Тобыл» матчының нәтижесі жойылып, «Тобыл» клубына 0:3 есебімен техникалық жеңіліс берілген.
· 2022 жыл – «Астана» – «Шахтер» матчында легионерлер саны бойынша лимиттің бұзылуы. Рұқсат етілген 6 шетелдік ойыншының орнына алаңда бір мезетте 7 ойыншы болған. Матч 0:0 есебімен аяқталғанына қарамастан, «Астана» клубына 0:3 есебімен техникалық жеңіліс берілген.
Дирекцияның ескертуі: регламенттің, әсіресе қайталанатын, ереже бұзулары өрескел деп бағаланып, ең қатаң санкциялар қолданылады. Барлық клуб ойыншыларды қатыстыруды қатаң бақылап, уақытылы кеңес алу үшін Дирекцияға жүгінуге міндетті.