Футболдан Бірінші лига бәсекесінің 17-турында басты қаһарманға айналып, «Каспий» қақпасына үш гол соққан «Алтай» ойыншысы Ибрагим Дадаев матчтан кейін KFF-League сайтына сұхбат беріп, кездесуден кейінгі әсерімен бөлісті. Сондай-ақ ол «Алтайдың» алдағы жоспары мен өзінің биылғы маусымдағы жеке мақсаттары туралы айтты.
– Ибрагим, көшбасшы командаға қарсы ойындағы тамаша жеңіс пен алғашқы хет-трик жасауыңмен шын жүректен құттықтаймыз! Матчтан кейінгі сезімің қандай болды?
– Көп рақмет! Бұл сезімді сөзбен айтып жеткізу мүмкін емес. Бұл – мансабымдағы ең керемет матч болды. Енді мұндай сәтті қайта-қайта бастан өткергім келеді.
– Бұған дейін сен аса көп гол соға бермейтін едің, ал биылғы маусымда қоржыныңда қазірдің өзінде 10 гол бар. Мұны немен түсіндіресің?
– Мұнда бапкерлік құрамның еңбегі зор деп ойлаймын. Олар маған шабуылда толық еркіндік берді. Тәжірибелі маман Вахид Масудов менің барлық мықты қырымды ашуға көмектесті.
– Жалпы биыл «Алтайдың» сәтті өнер көрсетуінің сыры неде деп ойлайсың?
– Ең алдымен, бізде тамаша ұжым бар. Бір-біріміз үшін барымызды салып, аянбай ойнағандықтан, жеңіске жетіп жүрміз. Бұдан бөлек, клуб басшылығы мен облыс әкімі тарапынан көрсетіліп отырған қолдау да өте маңызды рөл атқарады. Біз жақсы нәтиже көрсету үшін барлық жағдай жасалған. Сол сенімді ақтауға тырысамыз.
– «Алтай» биылғы маусымда басты бәсекелестерін төрт рет тізе бүктірді. Өзіңді Премьер-лига жолдамасына үміткерлер қатарында деп санайсың ба? Команда ішінде бұл жайында не айтылады?
– Әрине, Премьер-лигаға шығу – біздің негізгі мақсатымыз. Үлкен футболды Өскеменге қайта әкелгіміз келеді. Әрі оны мүмкіндігінше тезірек жүзеге асырғымыз келеді.
– Кейінгі уақытта Өскеменде футболға қызығушылық артты ма?
– Иә, біздің жеңістеріміздің нәтижесінде қалада футболға деген қызығушылық айтарлықтай өсті. «Восток» стадионына келетін жанкүйерлердің саны көбейді, олардың ойыншыларға деген ықыласы зор. Сондай-ақ Өскемендегі балалар арасында да футболға деген үлкен қызығушылық пайда болды.
– Саған отандық жетекші клубтар қызығушылық танытып жатқан болар. Жоғары топта өзіңді сынап көргің келе ме?
– Иә, әрине, өзге клубтардан қызығушылық бар. Маған ойыны ұнайтын екі-үш команда бар. Әрине, жоғары деңгейде өзімді сынап көргім келеді. Бұл – биылғы маусымдағы жеке мақсаттарымның бірі. Бірақ тағы да айтамын, ең алдымен Премьер-лигаға «Алтаймен» бірге шыққым келеді!