Әйелдер арасындағы Қазақстан чемпионатының 17-турында «Астана» өз алаңында Көкшетаудың «Оқжетпес» командасын қабылдап, 8:1 есебімен ойсырата жеңді. Елорда клубының жартылай қорғаушысы Жансұлу Нұрғазина KFF League сайтына берген сұхбатында матч жайлы және алдағы «Тобылмен» өтетін ойын алдындағы жоспарымен бөлісті.
– Жансұлу, жеңіс құтты болсын. Ойын жайлы не айтасыз? Нәтижені қалай бағалайсыз?
– Әрине, біз бұдан да жақсы нәтиже көрсеткіміз келді, бірақ бар күшімізді салдық. Бірнеше жеңіліс пен ауыр ойындардан кейін көптен күткен үш ұпайға қол жеткіздік. Бұл нәтиже - жаңа жеңістердің бастамасы болады деп сенемін.
– Бүгін маусымдағы бесінші голыңызды соқтыңыз. Қандай әсердесіз?
– Иә, маусымға аздап кеш қосылдым десем болады, бірақ бұдан әрі де көбірек гол соғып, өз ойынымды көрсетуді, дамуды және командаға көмектесуді жоспарлап отырмын.
– «Оқжетпес» те сіздер сияқты легионерсіз, құрамы толығымен футбол орталығының тәрбиеленушілерінен құралған. Турнир кестесінде соңғы орында тұрған командаға қарсы ойнау қалай болды?
– Біз ешқашан қарсыласымызды төмен бағалаған жоқпыз. «Оқжетпестің» талантты ойыншылары көп және болашағы зор. Тек команда жас болғандықтан, әзірге тәжірибе жетіспейді. Уақыт өте келе олар жақсы нәтиже көрсетеді деп сенемін.
– Келесі ойын «Тобылмен» болақ. Аталған матчтан не күтесіз?
– Тек жеңіс. Біз толық дайынбыз, өйткені бірінші айналымда олармен тең түскенбіз, ал ол нәтиже бізді қанағаттандырмады.