9-10 тамыз күндері футболдан ел біріншілігінің 20-тур ойындары өтті. Бұл турда барша жанкүйердің назары Семейдегі «Елімай» мен «Ақтөбе» арасындағы кездесуге ауғаны рас. Екі команда да жанкүйерлер сенімін ақтап, жоғары деңгейдегі ойынды көрсетті.
Тур нәтижелері:
«Ұлытау» – «Қызылжар» – 1:1
«Оқжетпес» – «Жетісу» – 1:2
«Атырау» – «Тұран» – 1:1
«Елімай» – «Ақтөбе» – 2:1
«Қайсар» – «Ордабасы» – 1:1
9 тамыз
«Ұлытау» (Жезқазған) – «Қызылжар» (Петропавл) – 1:1 (0:1)
Голдар: Жаңғылышбай, 5 (0:1); Таубай, 85 (1:1)
Бас төреші: Сариев (Орал)
Ескерту: Терехов, Митрофанов, Таубай – Козленко, Гбамбле, Нойок, Валиуллин
Екі командаға да бұл ойында жеңіс ауадай қажет еді. Өйткені екеуі де турнир кестесінде қауіпті аймаққа тым жақын тұр. Алайда командалар тең нәтижеге разы болысты. Қонақтар ойын басында белсенділік танытып, бірінші таймда есепте алға шықты. Матч соңына дейін «Қызылжар» алда тұрғанымен, 85-минутта алаң иелері таразы басын теңестіріп кетті – 1:1.
«Оқжетпес» (Көкшетау) – «Жетісу» (Талдықорған) – 1:2 (1:1)
Голдар: Турай, 22 (0:1); Жұмат, 45 (пенальтиден – 1:1); Әнуарбеков, 77 (1:2)
Бас төреші: Суликанов (Ақтөбе)
Ескерту: Адахаджиев, Қалмырза, Сатанов, Мұхамед, Мужиков – Кәрімов
Аластан шығару: Қашкен, 45+1 («Жетісу»)
Бірінші айналымдағы кездесуде «Оқжетпес» сырт алаңда «Жетісуды» 3:1 есебімен жеңгеннен кейін, бұл матчта да алаң иелері фаворит саналған еді. Алайда «Жетісу» бұл жолы қарымта қайтарып, жеңіске жетті. Алаң иелері ойын бойы басымдыққа ие болып, тіпті екінші таймда бір футболшы артық ойнаса да жеңіске жете алмады.
«Атырау» (Атырау) – «Тұран» (Түркістан) – 1:1 (0:0)
Голдар: Назымханов, 56 (0:1); Дорофеев, 85 (1:1)
Бас төреші: Ноженко (Павлодар)
Ескерту: Афанасенко, Рыжук, Милойко – Гошев, Аббас
Қатарынан 11 ойында жеңілген «Тұран» бірінші рет тең ойнап, бір ұпайға қол жеткізді. Егер «Тұран» бұл турда да жеңілгенде, турнир кестесінде соңғы орынға түсіп қалар еді. Абырой болғанда тең нәтиже тіркеліп, өз орнын сақтап қалды. Қонақтар екінші тайм ортасында есеп ашып, соңына дейін алда тұрды. Бірақ 85-минутта Константин Дорофеев таразы басын теңестірді – 1:1. Бұл нәтиже екі ұжымды да қанағаттандырмағаны анық.
10 тамыз
Тур матчы
«Елімай» (Семей) – «Ақтөбе» (Ақтөбе) – 2:1 (0:1)
Голдар: Жайро Жан, 27 (пенальтиден – 0:1); Кенжебек, 53 (пенальтиден – 1:1); Кенжебек, 64 (2:1)
Бас төреші: Абдуллаев (Қаратау)
Ескерту: Адамбаев, Беланчич, Төлібай – Таңжарықов, Корзун, Жуков, Шушеначев
Ұлы Абайдың 180 жылдық мерейтойына тұспа-тұс келген ойында «Елімай» азулы «Ақтөбе» клубын өз алаңында тізе бүктіріп, жанкүйерлерге тамаша тарту жасады. «Спартак» стадионында ойынды тамашалауға келген жанкүйерлердің саны да аз болмады. Кездесудің бірінші таймында қонақтар пенальтиден гол соғып, жергілікті жанкүйерлердің көңілін су сепкендей басып тастады. Алайда екінші таймда «Елімай» ойын тізгінін өз қолына алып, 2:1 есебімен жеңісті жұлып алды. Екі голды да Ғалымжан Кенжебек соқты.
«Қайсар» (Қызылорда) – «Ордабасы» (Шымкент) – 1:1 (1:0)
Голдар: Жақсылықов, 41 (пенальтиден – 1:0); Антич, 76 (1:1)
Бас төреші: Есмұратов (Астана)
Ескерту: жоқ – Вакулко, Малый
Турдың соңғы ойыны Қызылордада өтіп, «Қайсар» өз алаңында «Ордабасымен» тең түсті. Кездесудің бірінші таймында Айбар Жақсылықов бұрын ойнаған командасына пенальтиден гол соқса, екінші таймда шымкенттіктер Античтің голының арқасында таразы басын теңестірді.
21-тур ойындары:
16 тамыз
«Қайрат» – «Елімай»
«Қызылжар» – «Жеңіс»
«Тұран» – «Қайсар»
17 тамыз
«Ақтөбе» – «Оқжетпес»
«Астана» – «Ұлытау»
«Ордабасы» – «Тобыл»
«Жетісу» – «Атырау»