Футболдан әйелдер арасындағы ел біріншілігінің 16-турында «Жеңіс» өз алаңында «Ақтөбені» қабылдап, 0:3 есебімен жеңіліп қалды. Матчтан соң елордалық клубтың жартылай қорғаушысы Лейла Садықова KFF League сайтына сұхбат беріп, сәтсіздіктің себептерін, қарсыластың шеберлігін атап өтті. Сондай-ақ маусымның қалған бөлігіне қатысты жоспарын айтты.
– Лейла, матч жайлы әсеріңізбен бөліссеңіз.
– «Ақтөбеге» қарсы ойын өте тартысты өтті. Матч қарқыны жоғары болды, шиеленісті ойын болатынын алғашқы минуттардан-ақ сездік. Әрине, «Ақтөбе» футболшыларының деңгейі бізден жоғары. Бізге тәжірибе жетіспеді. Биыл тәжірибе жинақтап, келесі маусымда жақсы ойын көрсетеміз деп ойлаймын.
– Бұған дейін «Жеңіс» жеңіліссіз келе жатқан еді. Жеңісті жолды жалғастыруға не кедергі болды деп ойлайсыз?
– Иә, біз өз алаңымызда да, сырт алаңда да жақсы ойын көрсетіп, жеңіске жетіп жүрдік. Команда тәуір ойын өрнегін көрсетті. Бірақ бүгін «Ақтөбе» мықтырақ болды. Дегенмен, бұл біз үшін жақсы сабақ әрі тәжірибе жинауға тамаша мүмкіндік болды.
– Маусымның қалған бөлігіне қандай мақсаттар қойып отырсыздар?
– Турнир кестесінде үздік бестікке енуге тырысамыз. Бұл үшін бар күшімізді саламыз. Әрине, басты мақсат – қалған ойындардың барлығында жеңіске жету. Команда тек жоғары нәтижеге ұмтылып отыр.