9-10 тамыз күндері Премьер-лига командалары арасындағы Қазақстан чемпионатының 20-турына жоспарланған бес ойыны өтеді. Еурокубокта өнер көрсетіп жүрген «Қайрат» пен «Астана» бұл турдағы ойындарын кейінге шегерген. Ал турдың орталық ойыны Семейде «Елімай» мен «Ақтөбе» арасында өтпек.
9 тамыз
«Ұлытау» (Жезқазған) – «Қызылжар» (Петропавл)
Матч басталуы – 17:00
Өтетін орны: «Металлург» стадионы (Жезқазған қ.)
Кездесулер тарихы:
Ойындар саны – 1
«Ұлытаудың» жеңісі – 0
«Қызылжардың» жеңісі – 1
Тең ойын – 0
Турдың шымылдығы «Ұлытау» мен «Қызылжар» арасындағы ойынмен ашылады. Қазіргі таңда «Қызылжар» турнир кестесінде 9-шы, «Ұлытау» 12-орында тұр. Екеуінің арасына әзірге 6 ұпай бөліп тұр. Дегенмен, жезқазғандықтар «Қызылжарға» қарағанда бір ойын кем өткізген, сондықтан бұл матчта жеңіске жетсе, қарсыластарын ұпай бойынша қуып жетуі мүмкін. Алайда кейінгі кездесулерде екі команда да тұрақсыз нәтиже көрсетіп жүр. «Ұлытау» 6 матч бойы жеңіске жете алмаса, «Қызылжар» үш ойында қатарынан ұтылып, бірде-бір гол соққан жоқ (0:5).
«Оқжетпес» (Көкшетау) – «Жетісу» (Талдықорған)
Матч басталуы – 17:00
Өтетін орны: «Оқжетпес» стадионы (Көкшетау қ.)
Кездесулер тарихы:
Ойындар саны – 50
«Оқжетпестің» жеңісі – 19
«Жетісудың» жеңісі – 20
Тең ойын – 11
Екі команда арасындағы ойын өте тартысты өтпек. Өйткені, екі клубтың статистикасына көз жүгіртсек, аса қатты алшақтық жоқ. «Жетісу» жеңіс бойынша бір ойын алда тұрғанымен, доп айырмасы жағынан көкшетаулықтар басымдыққа ие – 56:53. Дегенмен кейінгі уақытта «Оқжетпес» футболшылары жақсы ойнап жүр, әрі өз алаңында фаворит саналады. Екі ұжым арасындағы кейінгі екі кездесуде де көкшетаулықтар жеңіске жеткен.
«Атырау» (Атырау) – «Тұран» (Түркістан)
Матч басталуы – 18:00
Өтетін орны: «Мұнайшы» стадионы (Атырау қ.)
Кездесулер тарихы:
Ойындар саны – 9
«Атыраудың» жеңісі – 3
«Тұранның» жеңісі – 4
Тең ойын – 2
Атырауда турнир кестесінің соңында тұрған екі команда ойнайды. Алаң иелері кейінгі 4 турда 5 ұпай жинап, нәтижесін жақсартып келеді. Ал «Тұран» қатарынан 11 ойында жеңілген (барлық турнирді қоса есептегенде – 12). Түркістандықтар соңғы рет жеңіске 10 мамырда дәл осы «Атырауға» қарсы ойында жеткен еді. Бір қызығы, ол кезде түркістандықтарды қазіргі «Атырау» жаттықтырушысы Виталий Жуковский басқарған болатын.
10 тамыз
«Елімай» (Семей) – «Ақтөбе» (Ақтөбе)
Матч басталуы – 18:00
Өтетін орны: «Спартак» стадионы (Семей қ.)
Кездесулер тарихы:
Ойындар – 5
«Елімайдың» жеңісі – 2
«Ақтөбенің» жеңісі – 2
Тең ойын – 1
Турдың орталық ойыны Семейде жергілікті «Елімай» мен «Ақтөбе» арасында өтпек. Қазіргі таңда барлық жанкүйердің назары осы ойынға ауып отыр. Оның бірнеше себебі бар. Мәселен, екі клуб турнир кестесінде қатар орналасқан. Сондай-ақ кейінгі турларда екі команданың да жолы болар емес. Кейінгі бес турда «Елімай» бір-ақ рет жеңіске жетсе, «Ақтөбе» екі мәрте ұтылып, соңғы екі ойында гол соға алмады. Статистика бойынша да екі командада ешқандай да басымдық жоқ. Тіпті гол айырмасы да бірдей – 7:7.
«Қайсар» (Қызылорда) – «Ордабасы» (Шымкент)
Матч басталуы – 20:00
Өтетін орны: Ғани Мұратбаев атындағы стадион (Қызылорда қ.)
Кездесулер тарихы:
Ойындар саны – 55
«Қайсардың» жеңісі – 21
«Ордабасының» жеңісі – 22
Тең ойын – 12
Бұл матчта «Ордабасы» қағаз жүзінде фаворит саналады. Өйткені қонақтар турнир кестесінде қызылордалықтардан 4 саты жоғары тұр. Сондай-ақ «Ордабасы» қарсыластарынан 10 ұпай көп жинаған. Бірінші айналымда Шымкентте өткен кездесуде «Ордабасы» «Қайсарды» 5:0 есебімен жеңген еді. Дегенмен, Қызылордадағы соңғы кездесу «Қайсардың» жеңісімен (2:1) аяқталған. Жалпы, бұл бәсекеде көбіне алаң иелері жеңіске жетеді.