Футболдан әйелдер арасындағы біріншіліктің 16-турында «Ақтөбе» командасы сырт алаңда «Жеңісті» 3:0 есебімен жеңді. Матчтан кейін «Ақтөбенің» жартылай қорғаушысы Карина Жұмабайқызы KFF League тілшісіне сұхбат беріп, «Жеңіске» қарсы ойын туралы, алдағы матчтар және Қазақстанға неліктен оралғаны туралы ойын ортаға салды.
– Карина, кезекті жеңістеріңізбен құттықтаймыз. Бүгінгі ойынның нәтижесіне қандай баға бересіз?
– Көп рақмет! Бүгін кезекті рет жеңіске жетіп, маңызды үш ұпайымызды олжаладық. Әрине, бұдан да көп гол соғуға болар еді, бірақ кей сәттерде мүмкіндігімізді толық пайдалана алмадық. Дегенмен, жеңіске жеткенімізге қуаныштымыз. Алдағы уақытта ойынымызды одан әрі жақсартуға тырысамыз.
– Келесі турда «Ақтөбе» «Қайсармен» кездеседі. Бұл ойыннан не күтесіз?
– Біз әр қарсыласқа, турнир кестесіндегі орны мен деңгейіне қарамай, бірдей жауапкершілікпен дайындаламыз. Келесі ойынды да сырт алаңда өткіземіз. Сондықтан жол үстінде де дайындықты жалғастырамыз. Команданың көңіл-күйі жақсы. Әр матчта жеңіске жеткіміз келеді.
– Өткен турда сіздер «БИІК-Шымкенттен» басым түстіңіздер. Көпшілік бұл ойын чемпиондық тағдырын шешті деп есептейді. Бұған көзқарасыңыз қандай?
– Иә, бұл өте маңызды матч болды. Бірақ бәрі шешілді деп айтуға әлі ерте. Чемпионат ұзақ, алда әлі бірнеше тур бар. Сондықтан босаңсуға болмайды. Қазір әрбір ойын – алтынға бергісіз. Соңына дейін күресеміз.
– «Ақтөбе» мен «БИІК»-ке дейін сіз Ресей чемпионатында ойнадыңыз. Ұлттық құраманың шетелде ойнайтын санаулы футболшыларының бірі едіңіз. Неліктен Қазақстанға қайта оралдыңыз? Шетелден ұсыныстар болды ма?
– Иә, шетелде ойнап, жақсы тәжірибе жинадым. Өзімді басқа чемпионатта сынап көргім келді және ол арманым орындалды. Елге оралған соң бірнеше ұсыныс болды. Бірақ мен «Ақтөбені» саналы түрде таңдадым. Мұндағы бапкерлер құрамын жақсы білемін, көптеген ойыншылармен бұрыннан таныспын, бір-бірімізді жақсы түсінеміз. Клубтың өз мақсаты мен амбициясы бар, ең бастысы – өз орнымда екенімді сезінемін. Бұл – менің жолым, менің таңдауым.