5-6 тамыз күндері футболдан Екінші лиганың 16-тур ойындары өтті. Турдағы ең елеулі оқиға – Jeyran мен «Атырау-Ж» арасындағы кездесуде тіркелді. Алматылық клуб маусымдағы алғашқы жеңісіне қол жеткізіп, алғашқы ұпайын еншіледі.
«Солтүстік-шығыс» конференциясының нәтижелері:
«Тобыл-Ж» – «Жетісу-Ж» – 6:0
«Елімай-Ж» – «Жеңіс-Ж» – 1:1
«Астана-Ж» – SD Family-Ж – 8:0
«Оқжетпес-Ж» – «Ұлытау-Ж» – 2:0
«Алтай-Ж» – «Шахтер-Ж» – 0:2
Турдың шымылдығы Қостанайда «Тобыл» мен «Жетісу» жастар командалары арасындағы матчпен ашылды. Алаң иелері қарсыласына еш мүмкіндік бермей, кездесудің тағдырын бірінші таймда-ақ шешіп қойды. «Тобыл-Ж» командасы бірінші таймда – 4, екінші таймда тағы екі гол соғып, ірі есеппен жеңіске жетті – 6:0.
Ал Семейдің «Елімай-Ж» командасы өз алаңында «Жеңіс-Ж» клубын қабылдап, жеңіске жете алмады. Бірінші таймның ортасында алаң иелері есеп ашқанымен, кездесудің соңына қарай астаналықтар таразы басын теңестіріп кетті – 1:1.
Турнир кестесінің төменгі сатысында орналасқан «Оқжетпес-Ж» бен «Ұлытау-Ж» командалары арасындағы матч көкшетаулықтардың пайдасына шешілді – 2:0. Үш ұпай олжалаған «Оқжетпес-Ж» бір саты жоғары көтерілді.
Ал көшбасшыны өкшелеп келе жатқан Қарағандының «Шахтер-Ж» ұжымы Өскеменде «Алтай-Ж» командасының қақпасына әр таймда бір голдан соғып, 0:2 есебімен жеңіске жетті.
Турнир кестесінде жеке-дара көш бастап тұрған «Астана-Ж» өз алаңында SD Family командасын қабылдап, қарсылас қақпасына жауапсыз 8 (!) гол соқты. Астаналық футболшылар бірінші таймда бес, екінші таймда үш мәрте мергендік танытты. Руслан Уәлихан – хет-трик авторы атанды.
«Оңтүстік-батыс» конференциясының нәтижелері:
«Жайық» – «Тұран-Ж» – 2:1
«Каспий-Ж» – «Мақтаарал» – 3:1
Jeyran – «Атырау-Ж» – 1:0
«Ордабасы-Ж» – «Қайсар-Ж» – 3:0
«Жас Қыран» – «Арыс» – 2:1
Оралдың «Жайық» клубы өз алаңында «Тұран-Ж» командасын қабылдап, 2:1 есебімен жеңіске жетті. Кездесудің есебін бірінші болып қонақтар ашқанымен, батысқазақстандықтар бірінші таймның соңында есепті теңестіріп, екінші таймның ортасында жеңіс голын соқты.
Бұл турда «Мақтаарал» тағы да ұпай жоғалтты. Бір кездері Премьер-лигада ойнаған клуб қатарынан төртінші рет жеңілді. Бұл жолы олар Ақтауда «Каспий-Ж» командасына жол берді. «Мақтаарал» есепті бірінші болып ашқанымен, кейіннен ақтаулықтар үш гол соғып, жеңісті жұлып алды – 3:1.
16-турдың басты сенсациясын Jeyran футбол клубы тіркеді. Өйткені алматылық команда кәсіби деңгейдегі алғашқы жеңісіне қол жеткізді. Маусым басталғалы бірде-бір ұпай ала алмаған Jeyran алғаш рет өз қақпасына гол өткізбей, 1:0 есебімен жеңіске жетті. Тарихи жеңіс голының авторы – Темірбек Дәрменов.
«Ордабасы-Ж» мен «Қайсар-Ж» арасындағы жастар текетіресінде шымкенттік команда 3:0 есебімен жеңіске жетіп, турнир кестесінде қызылордалықтардан озып кетті. Дегенмен, «Қайсар-Ж» клубын бір ойын кем өткізген.
«Жас Қыран» кезекті жеңісіне қол жеткізіп, «Жайықты» өкшелеп келеді. Бұл турда «Жас Қыран» өз алаңында «Арыс» клубын қабылдап, қиындықпен болса да жеңіске жетті. Бірінші таймда қонақтар 0:1 есебімен алда тұрғанымен, екінші таймда алаң иелері екі гол соғып, жігерлі жеңіске қол жеткізді – 2:1.
Екінші лиганың 17-тур ойындары 12-13 тамыз күндері өтеді.
