7-8 тамыз күндері футболдан Бірінші лиганың 17-тур ойындары өтеді. Бұл турдың негізгі ойыны Өскеменде өтпек. Мұнда турнир кестесінің үшінші сатысында тұрған «Алтай» өз алаңында көшбасшы «Каспийді» қабылдайды.
7 тамыз
ТУРДЫҢ ОРТАЛЫҚ ОЙЫНЫ
«Алтай» (Өскемен) – «Каспий» (Ақтау)
Матчтың басталуы – 17:00
Өтетін орны: «Восток» стадионы, Өскемен қаласы
Кездесулер тарихы: 8 матч
«Алтайдың» жеңісі – 4
«Каспийдің» жеңісі – 3
Тең ойын – 1
17-турдың негізгі матчы саналатын «Алтай» мен «Каспий» арасындағы ойынды жанкүйерлер тағатсыздана күтіп отыр. Өйткені Өскемендегі ойынның нәтижесі қос команда үшін де аса маңызды. Сондай-ақ олардың басты бәсекелестері – Ertis пен «Шахтер» бұл тартысты назардан тыс қалдырмайды.
Қазіргі таңда «теңізшілер» сенімді түрде турнир кестесінде көш бастап келеді. Ал «Алтай» «Каспийден» 6 ұпайға қалып, әзірге үшінші сатыда тұр. Егер алаң иелері бұл ойында жеңіске жетсе, онда ұпай айырмасын үшке дейін қысқартып, екінші орынға көтерілуі мүмкін. Екі ұжым арасындағы алғашқы айналымда Вахид Масудовтың шәкірттері Ақтауда жеңіске жеткен болатын.
«Қайрат-Жастар» (Алматы) – «Ақтөбе-Ж» (Ақтөбе)
Матчтың басталуы – 17:00
Өтетін орны: Т. Сегізбаев атындағы академия стадионы, Алматы қаласы
Кездесулер тарихы: 5 матч
«Қайрат-Жастардың» жеңісі – 2
«Ақтөбе-Ж»-нің жеңісі – 1
Тең ойын – 2
«Қайрат» пен «Ақтөбенің» кез келген кездесуі жанкүйерлер назарынан тыс қалмайды. Бұл жолы жасыл алаңда олардың жастар құрамалары кездеседі. Алайда бұл дуэль де бірте-бірте қызықты өрбіп келеді. Бір қызығы, алматылықтар өз алаңында «қызыл-ақтарды» бірде-бір рет жеңбеген. Бір рет тең нәтиже тіркелсе, бір ойында жеңіліп қалған. Бірінші айналымда Ақтөбеде өткен кездесуде 1:1 есебі тіркелген.
«Ақтөбе-Ж» – биылғы маусымда әлі жеңіске жетпеген Бірінші лигадағы жалғыз команда. Бірақ олар 16 турда жинаған 5 ұпайдың біреуін дәл осы «Қайрат-Жастарға» қарсы ойында еншілеген.
«Оңтүстік» (Шымкент) – SD Family (Астана)
Матчтың басталуы – 17:00
Өтетін орны: «Намыс» стадионы, Шымкент қаласы
Кездесулер тарихы: 2 матч
«Оңтүстіктің» жеңісі – 2
SD Family-дің жеңісі – 0
Тең ойын – жоқ
«Оңтүстік» ұжымы турнир кестесінде SD Family командасынан екі ұпай айырмашылығымен екі саты жоғары тұр. Алайда елордалықтар сырт алаңда жеңіске жетсе, шымкенттіктерден озып кетуі мүмкін. Дегенмен екі клубтың жеке кездесулер статистикасына қарайтын болсақ, SD Family-дің бұл ойында ұпай алу мүмкіндігі тым аз. Командалар биылғы маусымда екі рет кездескен. «Оңтүстік» қарсыласын алдымен Қазақстан кубогының іріктеу кезеңінде 3:2 есебімен, кейін чемпионатта 3:0 нәтижесімен жеңген болатын.
8 тамыз
«Шахтер» (Қарағанды) – «Екібастұз» (Екібастұз)
Матчтың басталуы – 17:00
Өтетін орны: «Шахтер» стадионы, Қарағанды қаласы
Кездесулер тарихы: 17 матч
«Шахтердің» жеңісі – 10
«Екібастұздың» жеңісі – 4
Тең ойын – 3
Қарағандының «Шахтері» өз алаңында ел ішінде «кеншілер» атанып кеткен қарсыласын қабылдайды. Бұл кездесу нағыз «кеншілер дербиі» болмақ. 2025 жылға дейін екі клуб тек Премьер-лига және Қазақстан кубогында ғана кездескен. Ал Бірінші лигадағы алғашқы ойында 2:2 есебі тіркелді. Сол ойында «Шахтер» жеңіліп жатып, қосымша минутта таразы басын теңестірген еді. Бұл жолы «Шахтерге» ұпай жоғалтуға болмайды. Егер үздік үштікке ілескісі келсе, онда маңызды үш ұпайды олжалауы қажет.
«Жетісай» (Жетісай) – «Хан-Тәңірі» (Алматы)
Матчтың басталуы – 17:00
Өтетін орны: Орталық стадион, Жетісай қаласы
Кездесулер тарихы: 4 матч
«Жетісайдың» жеңісі – 0
«Хан-Тәңірінің» жеңісі – 4
Тең ойын – жоқ
Статистикаға көз жүгіртер болсақ, «Жетісай» бұл кездесуге фаворит ретінде шығуы тиіс. Өйткені олар турнир кестесінде «Хан-Тәңірінен» 12 ұпайға озып кеткен. Бұдан бөлек, турнир кестесінде бес саты жоғары тұр. Сонымен қатар алматылықтар кейінгі бес ойыннан бері жеңіс не екенін білмей келеді. Дегенмен «Жетісай» бұл қарсыласынан әлі күнге дейін ұпай ала алмаған. Алғашқы айналымда да «Хан-Тәңірінен» 0:2 есебімен жеңілген. Бұл жолы жетісайлықтар жеңіліс сериясына нүкте қоя ала ма екен?
«Тараз» (Тараз) – «Түркістан» (Түркістан)
Матчтың басталуы – 19:00
Өтетін орны: Орталық стадион, Тараз қаласы
Кездесулер тарихы: 6 матч
«Тараздың» жеңісі – 4
«Түркістанның» жеңісі – 2
Тең ойын – жоқ
Қос ұжым да биылғы маусымды аса сәтті өткізіп жатқан жоқ. Екеуі де турнир кестесінің төменгі жағында орналасқан. «Түркістан» әзірге қауіпті аймақта тұр. Ал «Тараз» «Түркістаннан» бар болғаны бір саты жоғары. Дегенмен екі клуб арасында 7 ұпай айырмашылығы бар. Айта кетерлігі, түркістандықтар биылғы маусымдағы жалғыз жеңісін дәл осы «Таразға» қарсы алғашқы айналымда тіркеген. Бірақ өткен жылы Таразда өткен матч 5:1 есебімен алаң иелерінің ірі жеңісімен аяқталған болатын.
AKAS (Алматы) – Ertis (Павлодар)
Матчтың басталуы – 19:00
Өтетін орны: «Жас Қыран» стадионы, Алматы қаласы
Кездесулер тарихы: 2 матч
AKAS-тың жеңісі – 0
Ertis-тің жеңісі – 1
Тең ойын – 1
Бұл ойында лиганың басты фавориттерінің бірі – Ertis және Бірінші лигаға биыл ғана қосылған дебютант – AKAS кездеседі. Командалар биыл екі мәрте кездесті. Кубоктағы алғашқы матч 1:1 есебімен тең аяқталса, чемпионаттың алғашқы айналымында павлодарлықтар өз алаңында 1:0 есебімен әрең жеңіске жеткен болатын. Алматыдағы матчта Ertis фаворит саналса да, AKAS оңай беріле қоймас. Бұл ойын да қызықты өтетіні анық.