2-3 тамыз күндері футболдан Қазақстан Премьер-лигасының 19-тур ойындары өтті. Осы турға жоспарланған «Астана» – «Қайсар» матчы кейінге шегерілгендіктен, «Қайрат» турнир кестесінде жеке-дара көш бастады.
Матч нәтижелері:
«Оқжетпес» – «Елімай» – 1:1
«Қайрат» – «Ұлытау» – 1:0
«Қызылжар» – «Тобыл» – 0:2
«Ордабасы» – «Атырау» – 2:2
«Ақтөбе» – «Жеңіс» – 0:2
«Жетісу» – «Тұран» – 1:0
2 тамыз
«Оқжетпес» (Көкшетау) – «Елімай» (Семей) – 1:1 (0:0)
Голдар: Жұмат, 54 (1:0); Кенжебек, 66 (пенальтиден – 1:1)
Төреші: Исмұратов (Астана)
Ескерту: жоқ – Адамбаев, Бахтияров
Бірінші айналымда «Оқжетпес» Семейде «Елімайды» 2:0 есебімен жеңген болатын. Бұл жолы Абай облысының командасы есе қайтаруға тырысқанымен, мақсатына жете алмады. Екінші тайм басында алаң иелері сапынан Дәурен Жұмат есеп ашса, араға көп уақыт салмай қонақтар пенальтиден таразы басын теңестірді – 1:1.
«Қайрат» (Алматы) – «Ұлытау» (Жезқазған) – 1:0 (1:0)
Гол: Элмилсон, 41 (1:0)
Төреші: Суликанов (Ақтөбе)
Ескерту: Сәдібеков, Громыко – Вачиберадзе, Кейлер, Пайович, Мәуленов
Рафаэль Уразбахтин Чемпиондар лигасындағы «Слованға» қарсы маңызды матч алдында негізгі ойыншыларға демалыс беріп, алаңға жиі шыға бермейтін футболшыларға мүмкіндік беріп көрді. Алматылықтар допқа көбірек иелік етіп, үнемі шабуылда ойнады. Дегенмен, кездесудегі жалғыз әрі жеңіс голын Элмилсон соқты. Бұл – оның команда сапындағы алғашқы голы. «Қайрат» кезекті үш ұпайын олжалап, турнир кестесінде бірінші орынға көтеріліп алды.
«Қызылжар» (Петропавл) – «Тобыл» (Қостанай) – 0:2 (0:1)
Голдар: Кавнич, 20 (0:1); Ғалым, 83 (0:2)
Төреші: Ысқақов (Астана)
Ескерту: Буранчиев, Себаи – Жұмашев
Алаңнан қуылған: Себаи, 85 («Қызылжар»)
Петропавлдағы кездесу тартысты өткенімен, «Тобыл» футболшыларының жеке шеберлігі барлығын шешіп кетті. Бірінші таймда Кавнич есеп ашса, ойын соңына қарай Бейбіт Ғалым Премьер-лигадағы алғашқы голын соғып, командасына жеңіс сыйлады. Осылайша, қостанайлықтар «Астанамен» арадағы айырмашылықты екі ұпайға қысқартты.
3 тамыз
«Ордабасы» (Шымкент) – «Атырау» – 2:2 (2:0)
Голдар: Астанов, 3 (пенальтиден – 1:0); Имнадзе, 26 (2:0); Юденков, 51 (2:1); Дорофеев, 79 (2:2)
Төреші: Байымбет (Тараз)
Ескерту: Тұрсынбай, Капацина, Вакулко, Малый, Имнадзе – Абубакар, Чунчуков
«Ордабасы» футболшылары алғашқы минуттардан-ақ басымдық танытып, бірінші таймда 2:0 есебімен өз пайдасына аяқтаған еді. Алайда екінші таймда «Атырау» қарымта қайтарып, Юденков пен Дорофеевтің голдарының арқасында есепті теңестіріп кетті – 2:2.
ТУР МАТЧЫ
«Ақтөбе» – «Жеңіс» – 0:2 (0:0)
Голдар: Өміртаев, 59 (автогол – 0:1); Адилио, 90+6 (0:2)
Алаңнан қуылған: Қайыров, 83 («Ақтөбе»)
Төреші: Ноженко (Талдықорған)
«Ақтөбе» футболшылары Еурокубоктан кейінгі қиын кездесуде өз алаңында «Жеңістен» жеңіліп қалды. Бірінші тайм тең дәрежеде өткенімен, екінші таймда қонақтардың аздаған басымдығы байқалды. Алдымен Оралхан Өміртаев байқаусызда өз қақпасына гол соғып алса, матч аяқталар тұста Бағдат Қайыров алаңнан қуылып, командасын қиын жағдайда тастап кетті. Қонақтар төреші тарапынан қосылған қосымша минутта тағы бір гол соғып, алаң иелерінен 0:2 есебімен жеңіп кетті.
«Жетісу» – «Тұран» – 1:0 (0:0)
Гол: Қашкен, 90+5 (1:0)
Алаңнан қуылған: Асан, 87 («Тұран»)
Төреші: Сәриев (Орал)
Түркістанның «Тұран» клубы мамырдан бері ұпай олжала алмай келеді. Матч барысында «Жетісу» қонақтарға қарағанда тәуір ойнағанымен, ұзақ уақыт бойы «Тұранның» қорғанысын бұза алмады. Тек ойын соңында Асылбек Асан алаңнан қуылып, талдықорғандықтар сан басымдығына ие болғанда ғана гол соғып, жеңісті жұлып алды. Гол авторы – Дінмұхаммед Қашкен. Бұл – оның ҚПЛ-дегі алғашқы голы.
Ал «Тұран» қатарынан 11-рет жеңіліп, турнир кестесінде соңғы орнында тұрған «Атыраудан» екі-ақ ұпай алда тұр. Енді келесі турда «Тұран» «Атырауға» қонаққа барады.
Ескерту:
«Астана» – «Қайсар» матчы елордалық клубтың Конференция лигасындағы ойынына байланысты кейінге шегерілді.
20-тур ойындары:
9 тамыз
«Ұлытау» – «Қызылжар»
«Оқжетпес» – «Жетісу»
«Атырау» – «Тұран»
10 тамыз
«Елімай» – «Ақтөбе»
«Тобыл» – «Астана»
«Қайсар» – «Ордабасы»