16-17 тамыз күндері футболдан ел чемпионатының 21-тур ойындары өтеді. Бұл турда жанкүйерлердің назары Алматыдағы «Қайрат» – «Елімай» және Шымкенттегі «Ордабасы» – «Тобыл» арасындағы кездесулерге ауады.
16 тамыз
«Қайрат» (Алматы) – «Елімай» (Семей)
Басталуы: 18:00
Өтетін орны: «Орталық» стадион (Алматы қ.)
Кездесулер тарихы:
Ойындар – 3
«Қайраттың» жеңісі – 1
«Елімайдың» жеңісі – 1
Тең нәтижелер – 1
Чемпионат көшбасшысын бұл турда қиын матч күтіп тұр. Өйткені «Қайрат» қазір өте тығыз кестеде ойын өткізіп жүр. Бұл матч «Қайраттың» Чемпиондар лигасындағы екі сырт алаңдағы ойын арасына қойылған. Өткен сейсенбіде «сары-қаралар» Братиславада «Слованмен» 120 минут ойнады. Ал алдағы сәрсенбіде оларды Глазгода «Селтикпен» өтетін кездесу күтіп тұр. Сондықтан «Қайраттың» бапкерлер штабы кейбір көшбасшы ойыншыларға демалыс беруі әбден мүмкін.
Сондай-ақ «Елімай» да осал қарсылас емес. Семейліктер өткен турда «Ақтөбені» өз алаңында 2:1 есебімен жеңіп, кезекті рет жеңіске жетуге жігерленіп отыр. Бұған қоса, былтырғы ел чемпионына қарсы «Қайраттың» бұрынғы футболшылары, қазір «Елімай» сапында доп теуіп жүрген Рамазан Оразов, Акмал Бақтияров және Ғалымжан Кенжебек өздерінің бар шеберлігін көрсетуге тырысатыны сөзсіз. Айта кетсек, биыл 18 мамырда Семейде өткен бірінші айналымдағы ойын 1:0 есебімен «Елімайдың» пайдасына шешілген. Дегенмен былтыр «Елімай» Алматыдағы матчта 1:4 есебімен ірі есеппен жеңілгенін де ұмытпаған жөн.
«Қызылжар» (Петропавл) – «Жеңіс» (Астана)
Басталуы: 18:00
Өтетін орны: «Қарасай» стадионы (Петропавл қ.)
Кездесулер тарихы:
Ойындар – 40
«Қызылжардың» жеңісі – 18
«Жеңістің» жеңісі – 13
Тең нәтижелер – 9
Елорданың «Жеңісі» жоғары топқа оралғалы бері «Қызылжарды» жеңе алмай келеді. Тіпті петропавлдықтардың қақпасына бірде-бір гол соқпаған. Жалпы статистика да солтүстікқазақстандықтардың басымдығын көрсетіп тұр. Дегенмен, биылғы бірінші айналымда екі ұжым тең түскен. Соңғы нәтижелерге қарасақ, тоғыз тур бойы жеңілмей келе жатқан «Жеңіс» Петропавлдағы матчтың фавориті саналып отыр. Ал «Қызылжар» дәл осы кезеңде бар-жоғы бір жеңіс пен 7 ұпай ғана еншілеген.
«Тұран» (Түркістан) – «Қайсар» (Қызылорда)
Басталуы: 20:00
Өтетін орны: «Түркістан Арена» стадионы (Түркістан қ.)
Кездесулер тарихы:
Ойындар – 5
«Тұранның» жеңісі – 0
«Қайсардың» жеңісі – 2
Тең нәтижелер – 3
Өткен турда «Тұран» қатарынан 11 (Қазақстан кубогын қоса есептегенде 12) ойынға жалғасқан жеңіліс сериясын тоқтатты. Сырт алаңда «Атырау» клубымен кездесіп, 1:1 есебімен тең түсті. Енді түркістандықтар өз алаңында турнир кестесінің екінші жартысында орналасқан «Қайсарға» қарсы ойнайды. Осы турда жеңіске жетіп, жағдайын жақсартып алуға мүмкіндік бар. Бірақ статистика «Тұранның» жеңісіне сенбейді. «Тұран» қызылордалықтарды әлі күнге дейін жеңбеген, ал соңғы екі ойында гол соқпай жеңілген. Биылғы бірінші айналымдағы матч 1:0 есебімен «Қайсардың» пайдасына аяқталған.
«Ақтөбе» (Ақтөбе) – «Оқжетпес» (Көкшетау)
Басталуы: 20:00
Өтетін орны: Қобыланды батыр атындағы стадион (Ақтөбе қ.)
Кездесулер тарихы:
Ойындар – 42
«Ақтөбенің» жеңісі – 27
«Оқжетпестің» жеңісі – 7
Тең нәтижелер – 8
Өткен турда «Оқжетпес» өз алаңында «Жетісудан» ұтылғанымен, қарсыласына регламент ережесін бұзғаны үшін техникалық жеңіліс берілді. Сөйтіп көкшетаулықтар 3 ұпайға ие болды. Енді олар сырт алаңдағы «Ақтөбемен» кездеседі. Бұл матчқа «Ақтөбені» жуырда ғана тағайындалған жаңа бас бапкер Николай Костов дайындап шығады. Сондықтан алаң иелері ойыншылар жаңа бапкермен, жанкүйерлерінің қолдауымен жеңіске жетуге тырысады. Бірінші айналымда Көкшетауда өткен кездесуде «Оқжетпес» қарсыластарына 1:3 есебімен есе жіберген.
«Астана» (Астана) – «Ұлытау» (Жезқазған)
Басталуы: 20:00
Өтетін орны: «Астана Арена» стадионы (Астана қ.)
Кездесулер тарихы:
Ойындар – 1
«Астананың» жеңісі – 1
«Ұлытаудың» жеңісі – 0
Тең нәтижелер – 0
Еурокубок ойындарына байланысты кейінгі екі тур ойындарына қатыспаған елорданың «Астанасы» өз алаңында чемпионат дебютанты «Ұлытауды» қабылдайды. Екі команда арасындағы алғашқы кездесу Жезқазғанда өтіп, қонақтар 2:0 есебімен жеңіске жеткен еді. Дегенмен «Астана» үш күн бұрын ғана Конференция лигасының іріктеу кезеңінде «Лозаннамен» ойнағандықтан, шаршаңқы болуы мүмкін. Соған қарамастан, алаң иелері бұл ойында айқын фаворит саналады.
«Ордабасы» (Шымкент) – «Тобыл» (Қостанай)
Басталуы: 20:00
Өтетін орны: Қажымұқан Мұңайтпасов атындағы стадион (Шымкент қ.)
Кездесулер тарихы:
Ойындар – 68
«Ордабасының» жеңісі – 18
«Тобылдың» жеңісі – 33
Тең нәтижелер – 17
Отандық футбол жанкүйерлерін Шымкентте өте қызықты ойын күтіп тұрғаны анық. Бұл – екі ұжымның биыл біріншіліктегі алғашқы кездесуі. «Тобыл» мен «Ордабасы» арасындағы алғашқы ойын 9-тур аясында Қостанайда өтуі тиіс болған. Алайда форс-мажорға байланысты ойын кейінге шегерілген. Жалпы статистикада «Тобылдың» басымдығы байқалады. Бірақ Шымкенттегі екі кездесуде қостанайлықтар жеңіске жете алмаған. Сондықтан бұл жолғы нәтиже қалай болары белгісіз, бірақ қызық болары сөзсіз.
«Жетісу» (Талдықорған) – «Атырау» (Атырау)
Басталуы: 20:00
Өтетін орны: «Жетісу» стадионы (Талдықорған қ.)
Кездесулер тарихы:
Ойындар – 52
«Жетісудың» жеңісі – 17
«Атыраудың» жеңісі – 23
Тең нәтижелер – 12
Соңғы кезде бұл жұптың арасындағы ойындарда қызық бір заңдылық байқалады: соңғы 8 матчтың бірде-бірі талдықорғандықтардың пайдасына аяқталмаған. Қонақтар 6 рет жеңіп, 2 рет тең түскен. Биыл бірінші айналымда Атырауда өткен матч тең аяқталса, өткен жылғы Талдықорғандағы ойында «мұнайшылар» жеңіске жетті. Бұл жолы да екі командаға ұпай ауадай қажет. Сондықтан тартысты әрі ымырасыз ойын күтіп тұр.
