31 шілде мен 1 тамыз күндері футболдан Бірінші лиганың 16-тур ойындары өтеді. Турдың орталық ойыны Павлодарда жергілікті Ertis пен қарағандылық «Шахтер» арасында өтпек.
31 шілде
«Екібастұз» (Екібастұз) – «Қайрат-Жастар» (Алматы)
Басталуы: 17:00
Өтетін орны: «Шахтер» стадионы, Екібастұз
Кездесулер тарихы:
Ойын саны: 19
«Екібастұздың» жеңістері: 2
«Қайрат-Жастардың» жеңістері: 10
Тең ойындар: 7
«Екібастұз» өз алаңында «Қайрат-Жастарды» қабылдайды. Алматылық ұжым кездесудің фавориті саналады. Өйткені олар турнир кестесінде алаң иелерінен жоғары орналасқан және жеке кездесулерде де басымдыққа ие. Кейінгі үш ойында алматылықтар «кеншілерді» 14:1 есебімен ұтқан. Биылғы бірінші айналымда «Қайрат-Жастар» «Екібастұзды» 7:0 есебімен ойсырата жеңген.
Алайда өткен турда «сары-қаралар» өз алаңында Ertis-тен 0:3 есебімен жеңіліп қалды. Ал «Екібастұз» сырт алаңда Ақтөбе-Ж клубын 4:3 есебімен тізе бүктірді. Сондықтан бұл матч тартысты әрі қызықты өтетіні сөзсіз.
«Ақтөбе-Ж» (Ақтөбе) – «Алтай» (Өскемен)
Басталуы: 17:00
Өтетін орны: ОСДЮСШОР стадионы, Ақтөбе
Кездесулер тарихы:
Ойын саны: 3
«Ақтөбе-Ж»-ның жеңістері: 0
«Алтайдың» жеңістері: 2
Тең ойындар: 1
«Ақтөбе-Ж» командасы чемпионатта әлі күнге дейін жеңіске жете алмай келеді. Бірақ команданың мақсаты – Бірінші лигада қалу. Ал «Алтай» қазіргі таңда үздік бестікке еніп, Премьер-лига жолдамасына үміткер саналады. Команда кейінгі үш ойында қатарынан жеңіске жетті. Өскемендіктер бірінші айналымда «Ақтөбе-Ж»-мен тең ойнаған (0:0). Сондықтан бұл жолы да тосын нәтиже тіркелуі мүмкін.
«Хан-Тәңірі» (Алматы) – AKAS (Алматы)
Басталуы: 19:00
Өтетін орны: «Хан-Тәңірі» стадионы, Алматы
Кездесулер тарихы:
Ойын саны: 2
«Хан-Тәңірінің» жеңістері: 0
AKAS-тың жеңістері: 1
Тең ойындар: 1
«Хан-Тәңірі» биылғы маусымда өз мүмкіндігін толық көрсете алмай келеді. Ал лиганың дебютанты AKAS – өте сенімді ойын көрсетіп жүр. Екі клуб арасындағы бірінші айналымда AKAS жеңісті жұлып алған болатын. Турнир кестесінде AKAS «Хан-Тәңірінен» сегіз ұпайға алда. Алайда бұл – дерби. Мұндай ойындарда бұрынғы есеп-қисап жүрмейтіні белгілі. Кез келген нәтижелер тіркелуі мүмкін.
1 тамыз
«Түркістан» (Түркістан) – «Оңтүстік» (Шымкент)
Басталуы: 17:00
Өтетін орны: О. Жарылқапов атындағы стадион, Түркістан
Кездесулер тарихы:
Ойын саны: 6
«Түркістанның» жеңістері: 1
«Оңтүстіктің» жеңістері: 3
Тең ойындар: 2
Бұл ойынды оңтүстік дербиі деуге болады. Дегенмен кездесудің фавориті айқын. Алаң иелері турнир кестесінде соңғы орында, ал қонақтар олардан 15 ұпайға ұзап кеткен. Бірінші айналымда шымкенттіктер түркістандық ұжымды 3:0 есебімен ұтқан. Алайда бұған дейінгі Түркістандағы кездесуде «Оңтүстік» ұжымы жеңіліп қалған болатын.
«Каспий» (Ақтау) – «Тараз» (Тараз)
Басталуы: 19:00
Өтетін орны: BS Arena, Ақтау
Кездесулер тарихы:
Ойын саны: 31
«Каспийдің» жеңістері: 10
«Тараздың» жеңістері: 18
Тең ойындар: 3
Қазіргі маусымда екі команданың мақсаты әртүрлі. Дегенмен Ақтауда өтетін ойынның тартысты боларына күмән жоқ. Жалпы статистика бойынша да, Бірінші лигадағы кездесулерде де «Тараз» басым. Бірақ соңғы үш кездесуде «Каспий» жеңіске жеткен. Биылғы алғашқы ойында да «Тараз» жеңіліп қалған. Сондықтан бұл жолы да ойын екі командаға оңай соқпайды.
Ertis (Павлодар) – «Шахтер» (Қарағанды)
Басталуы: 19:00
Өтетін орны: «Орталық» стадион, Павлодар
Кездесулер тарихы:
Ойын саны: 80
Ertis жеңістері: 41
«Шахтердің» жеңістері: 18
Тең ойындар: 21
Бұл – турдың орталық матчы! Жеңіске жеткен команда «Каспиймен» бәсекелестікті жалғастырады. Ал жеңілген ұжым үздік үштіктен шығып қалуы мүмкін. Қарағандыда өткен бірінші айналымдағы ойында есеп 0:0 болған. Кейінгі ойында екі команда да қатарынан екі рет жеңіске жетіп, қақпасына гол өткізбеді. Бұл жолғы кездесуде жанкүйерлер гол көріп қалуы әбден мүмкін.
SD Family (Астана) – «Жетісай» (Жетісай)
Басталуы: 19:00
Өтетін орны: «Жас Қыран» стадионы, Алматы
Кездесулер тарихы:
Ойын саны: 4
SD Family жеңістері: 3
«Жетісайдың» жеңістері: 1
Тең ойындар: 0
Биылғы маусымда «Жетісай» тұрақты ойын көрсетіп жүр. Соның нәтижесінде турнир кестесінде үздік командаларға жақын орналасқан. Ал SD Family ондықтың соңында тұр. Биыл астаналық команда стадионын жөндеп жатқандықтан, барлық үй матчтарын Алматыда өткізіп келеді. Дегенмен SD Family «Жетісайды» бұған дейін үш рет жеңіп, бір мәрте ғана ұтылған. Бірінші айналымда сырт алаңда жеңіске жеткен. Сондықтан бұл ойында нақты фаворит жоқ.