29 және 30 шілдеде Қазақстан Бірінші лигасының 15-тур ойындары өтті. «Астана-Ж» кезекті ойында қарсыласын ойсырата жеңіп, сенімді нәтижеге қол жеткізді. Ал «Жайық» клубына «Атырау-Ж» командасы табанды қарсылық көрсетіп, үш ұпай алу оңайға соқпады.
Матч нәтижелері:
Солтүстік-шығыс конференциясы
«Ұлытау-Ж» – «Тобол-Ж» – 1:4
«Жетісу-Ж» – «Астана-Ж» – 1:7
«Қызылжар-Ж» – «Елімай-Ж» – 1:2
«Жеңіс-Ж» – «Алтай-Ж» – 2:0
«Шахтер-Ж» – «Оқжетпес-Ж» – 6:1
Бұл турдың шымылдығы Жезқазғанда түрілді. Турнир кестесінің соңында тұрған «Ұлытау-Ж» өз алаңында «Тобыл-Ж» командасын қабылдады. Қостанайлықтар 4:1 есебімен жеңіске жеткенімен, бұл матч оларға оңайға соққан жоқ. Есепті алаң иелері ашып, «Тобылға» жауап қайтаруға тура келді.
Конференцияның жеке көшбасшысы – «Астана-Ж» кезекті сенімді жеңісіне қол жеткізді. Олар Талдықорғанда «Жетісу-Ж» командасын 7:1 есебімен ойсырата жеңді. Айта кетейік, бірінші тайм 0:0 есебімен аяқталып, ешқандай басымдық байқалмаған еді. Бірақ екінші кезеңде жас шабуылшы Арсен Ахметов алаңға шығып, хет-трик жасап, ойынның тағдырын шешті.
Турдың орталық ойыны Петропавлда өтті. «Қызылжар-Ж» өз алаңында «Елімай-М» командасын қабылдады. Жергілікті команда алғаш болып есеп ашты, алайда семейліктер үзіліске дейін таразы басын теңестірді. Ал екінші таймда жеңіс голын соқты. Қорытынды есеп – 1:2 «Елімай-Ж» пайдасына. Бұл үш ұпай олардың турнир кестесінде қарсыласын басып озуға мүмкіндік берді.
«Жеңіс-Ж» өз алаңында «Алтай-Ж» командасын 2:0 есебімен сенімді жеңді. Бұл нәтиже арқылы астаналықтар турнир кестесінде Өскемен командасын қуып жетуге жақындады.
Ал «Шахтер-Ж» өз алаңында «Оқжетпес-Ж» клубын 6:1 есебімен ойсырата жеңді. Көкшетаулықтар тек матчтың соңғы минуттарында ғана бір гол соғып, алаңнан құралақан кетпеді.
Оңтүстік-батыс конференциясы
«Тұран-Ж» – «Жас Қыран» – 1:1
«Арыс» – «Каспий-Ж» – 1:2
«Талас» – Jeyran – 2:0
«Мақтаарал» – «Ордабасы-Ж» – 0:2
«Атырау-Ж» – «Жайық» – 0:1
Тур фавориттердің сүрінуімен басталды. Бірінші болып «Жас Қыран» көшбасшы «Жайықты» қуып жетіп, жеке көш бастау мүмкіндігін пайдалана алмады. Алматылықтар «Тұран-Ж» командасымен сырт алаңда кездесіп, есеп ашқанымен, басымдықты сақтап қала алмады. Қорытынды есеп – 1:1.
Сол секілді «Арыс» та көшбасшыны қуып жетуге мүмкіндік алған еді. Алайда, турнир кестесінің төменгі жағында тұрған «Каспий-Ж»-мен өз алаңында кездесіп, 1:2 есебімен жеңіліп қалды.
«Талас» өз алаңында маусым басынан бері бірде-бір ұпай алмаған Jeyran командасын еш қиындықсыз жеңді. Қорытынды есеп – 2:0. Бұл ойында Расул Қоныс дубль авторы атанды.
«Мақтаарал» клубындағы кризис әлі жалғасуда. Премьер-лигада ойнаған тәжірибесі бар команда қатарынан үшінші рет ұтылып, үш ойында бірде-бір гол соққан жоқ. Бұл жолы олар өз алаңында «Ордабасы» жастарына 0:2 есебімен есе жіберді.
Турнир көшбасшысы «Жайық» кезекті жеңісіне қол жеткізіп, кестедегі басымдығын ұлғайтты. Оралдықтар «Атырау-Ж» командасын сырт алаңда 1:0 есебімен жеңіп, жалғыз голды матчтың соңғы минуттарында соқты.
Келесі, 16-тур ойындары 5-6 тамыз күндері өтеді.