Кәсіби клубтар арасындағы жарыстар өткізу дирекциясының басшысы Бақытжан Пазылхайыр клубтарды жекешелендіру үшін негізгі қадамдардың бірі – көрермендерге ойындарды сапалы ұсыну екенін мәлімдеді.
«Лигадағы реформалар мен Қазақстан футбол федерациясы басшысы М. Омаровтың биылғы міндеттерінің бірі – хабар тарату сапасын жақсарту және олардың қолжетімділігін қамтамасыз ету. Бұл бағытта біз маңызды қадам жасаймыз – матчтардың тікелей эфирлерін YouTube арнасында көрсетеміз. Хабар тарататын телеарналармен жұмыс істей отырып, мен бұл процестің әр кезеңіне тікелей қатысып жатырмын. Үшінші турға дейін студияларда болып, әрбір трансляция кезеңімен танысамын. Барлық жігіттерге атқарған жұмыстары үшін алғыс айтамын. Біздің басты бағалаушымыз – көрермен.
Биыл біз алдымызға мынадай мақсатты қойып отырмыз: ҚПЛ-да кем дегенде 7-8 камера, Бірінші және Әйелдер лигасында – 5-6 камера, Екінші лигада – 3-4 камералы ЖТС көмегімен жоғары сапалы хабар тарату. Трансляцияларда операторлар мен режиссерлерден бастап комментаторларға дейін нағыз кәсіпқойлардың жұмыс істеуі маңызды. Медиа өнімді көрерменнің үміттері мен талаптарына сай жасау үшін қолдан келгеннің бәрін жасаймыз. Иә, ойынның сапасы, төрешілер деңгейі, инфрақұрылымның дамуы да маңызды. Бұл бағыттарды кешенді түрде дамытып отырамыз. Біз тек осылай ғана алға жылжимыз», – деді дирекция басшысы.
