«Елімай» жастар командасының бас бапкері Серікбек Қаппаров KFF-League порталына сұхбат беріп, командасының осы маусымдағы басты мақсаты туралы айтып, Екінші лигада ойындар санын арттыруға қатысты ұсынысын білдірді.
– Серікбек Мақсұтбекұлы, «Елімай-Ж» маусымның бірінші айналымын «Солтүстік-шығыс» конференциясында үздік үштіктің қатарында аяқтады. Жалпы, биыл командаға нақты мақсат қойылған ба?
– Бірінші айналым біз үшін жаман өткен жоқ. Бірақ кейбір матчтарда ұпай олжалай алмағанымыз өкінішті. Сол ойындарда ұпай алғанымызда, қазір көшбасшылар қатарындағы орнымызды нығайта түсер едік. Дегенмен, ойынымыз да, нәтижеміз де жаман емес. Ал маусым алдындағы нақты міндеттерге келер болсақ, бізге басшылық тарапынан «міндетті түрде осындай орын алыңдар» деген талап қойылған жоқ. Өйткені былтырғы құраммен салыстырғанда, биыл команда 60 пайызға жаңарды. Жас ойыншылар көптеп қосылды. Біздің басты мақсатымыз – сол жастарды тәрбиелеу, оларды дамыту, шеберліктерін шыңдап, негізгі құрамға дайындау.
– Негізгі командаға лайықты ойыншыларды дайындау бағытында жұмыс қалай жүріп жатыр? Қазірдің өзінде «Елімайдың» негізгі құрамына қосылуға қабілетті футболшылар бар ма?
– «Елімай» қайта жаңғырудан бұрын өңірде бір ғана клуб – «Алтай» ғана болған. Ол клубтың өзі де кейінгі жылдары қиындықтарды бастан өткерді. Соның салдарынан көптеген жас футболшы жасөспірімдер футболынан ересектер қатарына өте алмай, мансабын ерте аяқтауға мәжбүр болды. Ал қазір жағдай мүлде өзгерді. Жастар үшін нақты мақсат бар. Одан бөлек, «Елімайдың» бас бапкері Андрей Карпович біздің жігіттерді негізгі құраммен бірге жаттығуға шақырып отырады. Бұл – ойыншыларға үлкен мотивация. Олар соған ұмтылады. Аттарын атап жатпай-ақ қояйын, бірақ «Елімай-Ж» сапында болашақта негізгі құрамда ойнап, қаламызды Премьер-лигада лайықты деңгейде таныта алатын футболшылар бар.
– Ал жастар құрамы қайдан жасақталып жатыр?
– Негізінен өзіміздің футбол орталығымыздың тәрбиеленушілері және Абай облысының түкпір-түкпірінен шыққан талантты жастар. Біз басқа аймақтардан ойыншы шақыртпаймыз. Өйткені басты мақсат – Семей қаласы мен облыс жастарын қолдау.
– Биылғы Екінші лига чемпионатын толыққанды, кәсіби деңгейдегі турнир деуге келе ме?
– Әрине, толыққанды турнир деп айтуға болады. Тек бір ғана мәселе – ойын саны көбейсе екен деймін. Қазір Екінші лига екі конференцияға бөлінген, әрқайсысында 11 командадан. Бұл – логистика тұрғысынан өте дұрыс шешім. Бірақ ойынды көбейту мақсатында маусым басталар алдында немесе соңында қосымша турнир өткізуге болар еді. Сонда біз бір маусымда 20 емес, кем дегенде 25 ойын өткізетін едік. Бұл – ойыншылардың дамуына оң әсер етеді.
– Клуб жастар құрамына жеткілікті деңгейде көңіл бөлініп отыр ма? Мәселелеріңіз кейінге шегеріліп, назардан тыс қалып қойып жатқан жоқ па?
– Жоқ, клуб тарапынан бізге жан-жақты қолдау көрсетіліп отыр. Маусым басталмай тұрып, бізге «Қайрат» клубының базасында оқу-жаттығу жиынын ұйымдастырып берді. Ал маусым барысында қандай да бір сұрақтар туындаса, клуб оларды шешуге тырысады.
– Биыл «Астана-Ж» ұжымын қуып жету қиынға соғатыны белгілі. Соған қарамастан, «Елімай-Ж» үшін қандай нәтиже – ең жақсы нәтиже болмақ?
– «Тәбет тамақ үстінде ашылады» деген жақсы сөз бар. Алда – екінші айналым. Қазір қарсыластар бізге көшбасшылардың бірі ретінде дайындалып келеді. Әрине, қиын болатыны анық. Бірақ футболшылар мен бапкерлер штабы өз алдына мақсат қойды. Яғни, маусымды үздік үштікте аяқтау. Қазіргі таңда сол бағытпен келе жатырмыз. Қорытынды қалай болатынын уақыт көрсетеді. Бірақ бұл мақсатты орындауға бар күшімізді саламыз!