12-13 шілде күндері футболдан Қазақстан Премьер-лигасының 16-туры аясында бес кездесу өтеді. Футбол комментаторы Виктор Кирилюк KFF League порталына сұхбат беріп, 16-тур ойындарына қатысты өз пікірін ортаға салды.
«Ұлытау» – «Елімай»
«Ұлытауда» аздаған өзгерістер болып жатыр. Команданың тізгінін жаңа бас бапкер алды. Әдетте мұндай жағдайда клуб бірден серпіліс көрсетіп, нәтижелері жақсара бастайды. Алайда «Елімай» ұлттық құрамаға шақыртылып жүрген бірқатар ойыншыны қатарға қосып, айтарлықтай күшейді. Бас бапкер Карповичке оларды біртіндеп ойынға қосуға уақыт жоқ, себебі бірден нәтиже қажет. Сондықтан семейліктерге бұл матч аса қиындық тудырмайды деп ойлаймын.
«Тұран» – «Қызылжар»
Петропавлдық клуб бұл турда өздеріне ыңғайлы, оң жамбасына келетін қарсыласпен ойнайды. Қазір «Қызылжарға» ұпай ауадай қажет, ал дәл мұндай ойындарда үш ұпайдан айырылуға болмайды. Түркістан клубы құрамын айтарлықтай жаңартып, ауыр соққыдан кейін ес жия алмай отыр. Қазіргі жағдайында «Тұран» – кез келген қарсылас үшін оңай олжа. Бұл ойында «Қызылжар» жеңіске жетеді деп болжаймын.
«Жеңіс» – «Жетісу»
Тур өткен сайын «Жеңіс» қарқынын арттырып келеді. Ал Смаковта ойыншыларды таңдау мүмкіндігі шектеулі. «Жеңісте» Адилионың ойыны жүріп тұр, оған қоса тәжірибелі шабуылшы Лобжанидзе бар. Грузиялық форвард отандық футболды жақсы біледі. Бұл матчта тартыс болады деп ойлаймын. Астаналықтар жеңбесе де, жеңілуі екіталай. Командалар арасындағы деңгей айырмашылығы шешуші рөл атқаруы мүмкін.
«Тобыл» – «Оқжетпес»
Қостанайлықтар тұрақты ойын өрнегін көрсетіп жүр. Қайрат Нұрдәулетовтің «Оқжетпеске» келгеніне көп бола қойған жоқ. Сондықтан ол әзірге өз идеяларын толық енгізе алмай, алдыңғы бапкердің жүйесін уақытша жалғастыруға мәжбүр. Мұны толық жүзеге асыру оңай емес. Бірінші айналымда «Тобыл» «Оқжетпесті» бір доп айырмашылығымен жеңген еді, бұл жолы да нәтижесі соған ұқсас болады деп есептеймін.
«Ордабасы» – «Астана»
Мариннің шәкірттері Грузияда өте ауыр матч өткізді. Футболшылар толық қалпына келіп үлгермеуі мүмкін, уақыт тым тығыз. Ал «Астана» үшін бұл – негізгі құрамды сәл тынықтырып, Еурокубок ойындарына дайындық жасауға таптырмас мүмкіндік. Бабаян – стратег бапкер. Ол энергияны көп қажет ететін футболды ұнатпайды. Қарсыласын доп үшін күресте екінші таймның ортасына қарай шаршатып, нәтижені ойыншылардың жеке шеберлігі арқылы шешкенді құп көреді. «Астана» бұл ойында 2 доп айырмасымен жеңіске жетуге қауқарлы.